ŊAƁTA 35
35
Hoyok-ziyna vi sa Levitna
1Ma-Vatɗina di tam Musus hay fulda vi Mowab, goboy hiɗi Yordan, ɗiger vok Yeriko. Nam dum ala: 2Naŋ ma vul hagata tam sum sa Israyella ala, hoyok-ziy ma vuli ir misina nisi ma vul kuɗum mi sa Levitna kay nisi ma lak ziy hayamu. Voora vi hoyok-ziy namna lakŋi nigi ma vulum mi sa Levitna. 3Vulsi hoyok-ziya kay nisi lak hayamu, voora valamu nam vi farayna visiya, hiɗi slena visi noŋ kaf. 4Voora vi hoyok-ziyna ma nigi vulum mi sa Levitn ɗawni, jaram ma li jay goy hiɗi hoyok-ziyn ir goldoŋ birim kep, hay gal hoyok-ziyn kaf. 5Goy bugol hoyok-ziyna, nigi ma ŋaɓ goldoŋ birim ma' kay gal ma kuɗuwna, goldoŋ birim ma' kay gal ma kayamna, goldoŋ birim ma' kay gal ma vulatina, goldoŋ birim ma' kay gal ma gaana. Hoyok-ziyn ma hin goy waya. Kayni mi voora vi hoyok-ziyna visiya. 6Jar hoyok-ziy ma nigi vulum mi sa Levitna, hoyok-ziy ma ŋay hayamna ma li karkiya kay sum sa ci matna ma pir goy hayamu, hoyok-ziy hena dok-fiɗi yam ma'. 7Hoyok-ziy ma nigi ma vulum mi sa Levitna noŋ pet, dok-fiɗi yam glafandi, hiɗi voora valam kafe. 8Nisi sa hoyok-ziyna ŋolla ma vul mi sa Levitna ŋolo, sa hoyok-ziyna visi kiɗaya ma vul mi sa Levitn kiɗay lay; jaf marige kaw ma vul hoyok-ziyn mi sa Levitn ɗawni ŋray dig vocota valamu valamu.
Hoyok-ziy ma ŋayna, sa ma job yam busuwna
9Ma-Vatɗina di tam Musus: 10Naŋ ma di tam gurona vi Israyel ala: Hay li ma nigi haw Yordanawa kulo'o, la nigi coowa hay nagata Kanaan, 11nigi ma hin hoyok-ziy mara goyo, kay sa ma ci mati kuɗ minda valamɗina ma pir kay ŋay hayamu. 12Nam ma lin mi hoyok-ziy ma ŋayna, kay san ma ŋay tuwam kay sa ma job yam matna, jew a nam col vok tokŋa, a nisi ka kitata valamu. 13Hoyok-ziy ma nigi vulsitn ɗawni, ma ŋayn jaram karkiya. 14Nigi ma vulsi hoyok-ziyn ɦidi goy bugol Yordan, nigi ma vulsi hoyok-ziyn ɦidi kalaf hay Kanaan, kayni mi hoyok-ziy ma ŋayna. 15Hoyok-ziy namna ma karkiyan lakŋi gurona vi Israyel ma ŋay hayamu, sa ma pulla ma ka li ziy jarsin kaw, san gigekaw ma ɓalam vi sa'a ma pir kay ŋay hay hoyok-ziy namna.
16La san ci sugolom hiɗi va ma kawaya, la sugolomna cap mita, sa namna mi sa ma ci mati, nigi cum mat lay. 17La nam sli goorhoyo hay ɓalamu, cum hiɗi namu, nam capawa mita ni, nam mi sa ma ci mati, sa namna nigi cum mat lay. 18La nam sli zugul hay ɓalamu, cum hiɗi namu, nam capawa mita ni, nam mi sa ma ci mati, sa namna nigi cum mat lay. 19Sa ma job yam sa ma mitina ma cum goy mati; la nam ŋafawa hiɗi namu, nam cum goy mati. 20La san tupa tam sugolomna hiɗi dikam talam gawi, lebo la nam gum kalam hiɗi va'a, hiɗi dikam talam gaw jewe, la san kayni cap mita, 21lebo la nam cum hiɗi ɓalamu, hiɗi dikam talam gawi, la san kayni cap mita, sa ma cumna kitata valam ti mitta, kay nam mi sa ma ci mati; la sa ma job yam busuwn fumawa, nam cum goy mati.
22May la san tupa tam sugolomna hiɗi dikam talam gaw jewɗi, lebo nam gum kalam hiɗi va'a, hiɗi varta kay lum joo hay dikam jewɗi, 23lebo nam gum kalam hiɗi goorhoyona bay wum jewe, nam cap mita, la dikam may gaw talam jewe kay gar a lum jooɗi, 24tokŋa ma ka kitat jar sa ma ci matna hiɗi sa ma job yam busuwn ɗawni, ɗuwum kuɗ gat na'ta lakŋi. 25Tokŋa ma but sa ma ci matna goy hay ɓam sa ma job yam busuwna, hotom hay hoyok-ziyna ma nam pir kay ŋay hayna. Nam ma mus ɗawni ta-ta cub mitta vi mul ŋol ma-ɗifinna ma mul ma peldetna ka hoki kalamna.
26La sa ma ci matna piray goy hay hoyok-ziy ma nam ŋay hayamna pa, 27la sa ma job yam busuwna ŋafawa hiɗi namu goy gine hiɗi hoyok-ziy ma ŋayna, la sa ma job yam busuwna cumawa goy mati, busuw san kayni may kalamɗi. 28Kay sa ma ci matna as mus hay ziyna ma ŋayna ta-ta mul ŋol ma-ɗifinna mit goy tuwa; hay li ma mul ŋol ma-ɗifinna mitawa, nam ma hot hay nagata valamu may.
29Gatta lakŋi nigi ma li kuɗa'a, gurona vigi ma li kuɗa kaw, hay liyn kaf ma nigi ma lak hayamna. 30La ci mati, cum nam mat lay. Kayn di ala hay li ma sum sara wum hiɗi irsiya. La wum mi sa kep ɦawa'a ni, nigi as cum mat deɗi.
31Sa ma nagay kay ti mitta nigi as muɗum hiɗi gurjuɗi, kay kitata valam kayn ti mitta. 32Nigi ma muɗ sa hiɗi gurjuɗi, a nam ma pir goy hay liy ma ŋayna, hotay hay nagata valamu bugol mitta vi mul ŋol ma ɗifinna kayni may hay liyamɗi. 33Nagata ta nigi lakay haya'ta nigi ma muɗa' liwisɗi, kay busuwna muɗ nagat liwisi; a por nagat kayni, nigi ma hok busuw goyo, ma li ɗawni mi busuwna vi sa ma ci matna. 34Nagata ta nigi tuɗ lak haya'ta ɗawni, nigi ma muɗa' liwisɗi, kay nan ka jargiya; kay nanu mi Ma-Vatɗina ma mus jar gurona vi Israyel.
Currently Selected:
ŊAƁTA 35: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001