GATTA-SEM-MA'TA 11
11
1Nigi ma min Ma-Vatɗina, Lawna vigiya, nigi ma li dok-dok kuɗ dita valamu, slen ma colina, gatta hiɗi vun-ma-gatna valamu. 2Wigi goy vaydi: Nan law kayni may tam gurona vigi sa bay wi hiɗi irsiya, sa bay hum hiɗi humsi tuwanaɗi, hatta vi Ma-Vatɗina Lawna vigiya, ŋolda valamu, donota valamu hiɗi ɓalam ma goy meɗayna, 3ɗekka valamu hiɗi lopna valamu, slen ma nam lum jar sum sa Egiptena kat mulla Farawn, mulla vi Egipte, kat nagata valam kaf kaw; 4slen ma nam lum kat sojena vi Egipte, kat kulumayna hiɗi keke-ma-duura valamu, nanige nam muɗ niy-lum ma slawn gaa kisiya, hay li ma nisi ka digiɗgiya, Ma-Vatɗina vatsi donota visi goy noŋ wah'-wah'. 5Slen ma nam lum hay fulda, ta-ta cota vigi hay liyn tani; 6slen ma nam lum kat Datan hiɗi Abiram, gurona vi Eliyab, gurona vi Ruben, nanige nagat mal vuna' goyo, na' basi gaa'a nisi hiɗi jafna visiya, guɗukŋa visiya hiɗi caw sle ma hin kuɗsina kaf jar sa Israyella noŋ kafe. 7Kay sle namna ma ŋulona ma Ma-Vatɗin lumna kayni irgi nigi wum kafe.
8Ki kayn nala nigi ma li kuɗ vun-ma-gatna kafe ma nan vulgit vaydi, kay nigi ma fi donota kay tuɗ sli nagata ta nigi min lak haya'ta, 9kay nigi ma ɦur buura vigi voko hay nagata ta Ma-Vatɗina yi va kalamu vun sumaygiya kay vulsiya, misi nisiya, mi jafna visiya, kayni ti nagata ta miira hiɗi yumda ka riŋ goy haya. 10Kay nagata ta nigi min kal haya'ta ɗawni may ki nagat Egipte ta nigi kalay goy haya' pata naɗi, kay ɗawni hay Egipte, hay li ma nigi cuk jafnawa, nigi ɦok niyn kalam kayn hiɗi segiya ki san ɦok niyn kay jardeŋ ma pi gun hayna nala.#11:10 Tan kayni ka law kay yal mara'a ma nisi ay go niyn hiɗi namna. 11Nagata ta nigi min kal haya'ta ɗawni ti nagata ta hiɗiyna hiɗi liyn ma lokŋa ka haya, ti nagata ta ci niyn ma si'ay kulo dukalawn pa; 12kayni ti nagata ta Ma-Vatɗina Lawna vigiya ka ŋoma'a, ti nagata ta Ma-Vatɗina iram ka cuki ka' dok-doko hay tun cawta pa ta-ta hay vatta vi busata.
Gi bolda hiɗi be'da
13La nigi hum kuɗ vun-ma-gatna vanu ma nan vulgit vaydina, la nigi min Ma-Vatɗina Lawna vigiya, la nigi girifimu hiɗi dikgi kafe, hiɗi ciwta vigi kafe kaw, 14nan ma hin niyn si hay nagata vigiya hay liyna valamu, niy ma gufuldana hiɗi ma waldana, nigi ma feɗ alkamarena, gulda-guldana hiɗi mula; 15nan ma goɗ hatna hay sinena vigiya kay farayna vigiya, nigi ma ti'e hoba kaw. 16Nigi ma li ŋali kay hin dikgi ɗut goyo hiɗi calta goytɗi, girifgi laway maraɗi, dab vokgi gaa vokomɗi lay. 17La naɗi Ma-Vatɗin ɗawn dikam ma ɓulak katgi dono ŋolo, nam ɗawn ma duk dukalawna, niyn ma si loɗi; nagat ma vuɗ jaf loɗi, nigi ma fi mitta hay nagata ta Ma-Vatɗin Lawn vulgita ɗawni.
18Yoboyna van kayni nigi ma ŋomom hay dikgiya, hay ciwta vigiya kaw, nigi ma junum hay ɓigiya ki ɗekka nala, nigi ma junum kulo kay vokgiya. 19Nigi ma hatam mi gurona vigiya, nigi ma dum tisiya hay li ma nigi ka vo hay ziyna, hay li ma nigi ka hay rogoyta, hay li ma nigi bur gaa'a, hay li ma nigi fok kulo'o kaw. 20Nigi ma ɗom kulo'o tam vun-ziyna vigiya, hay vun-galana. 21Nala hay li ma nigi co hay nagata ta Ma-Vatɗina yi va kalamu kay vula' mi sumaygit ɗawni, buura vigiya hiɗi buura vi gurona vigiya ma li ŋolo ki buura vi dukalawna kulo kay nagat nala.
22Kay la vun-ma-gatna namna ma nan digit kaf lakŋi nigi li kuɗumu, la nigi ŋomomu, la nigi min Ma-Vatɗina Lawna vigiya, la nigi tuɗ hay hagata valam kafe, la nigi jun tuwgi talamu, 23sum nisin kayni Ma-Vatɗina ma digiɗsi goy vokgi kafe, nigi ma sli nagata vi sum sa ŋulo'o, dono suwgi nigiya kaw. 24Liyn ma nigi jik hayam kafna nam ma muɗ vigiya, jar-liyna vigiya ma fokis hay fulda pa ta-ta hay Libaŋ, ma tun cawis tam niy-lumna Eufrata pa ta-ta tam niy-lumna ma gal vulatina. 25Sa as col dikgiɗi, ki Ma-Vatɗina Lawna vigi di tigi nala, nam ma gi narta hiɗi ɦuyumda hay dik sum sa nigi ma jik hay nagata visin kafe.
26Humgiya, vaydi nan tun vokgiya bolda hiɗi be'da. 27Bolda, la vun-ma-gatna vi Ma-Vatɗina Lawna vigiya ma nan vulgit vaydina nigi li kuɗumu; 28be'da, la nigi hum kuɗ vun-ma-gatna vi Ma-Vatɗina Lawna vigiɗi, la nigi cal goyo hay hagata ta nan ɗekgit vaydita, kay jun tuwgi kat Lawayn hegena ma nigi wumɗina.
29Hay li ma Ma-Vatɗina Lawna vigiya cogiyawa hay nagata ta nigi min kal haya'a kay muɗa' vigit ɗawni, nigi ma gi bolda kulo kay hiɗiyt Garizim, li be'da kulo kay hiɗiyt Ebal may. 30Hiɗiy namna ka hay gal hena vi Yordan, goy bugol hagata vi fatta ta ɗik gaata, hay nagata vi sa Kanaaniyana sa ka li ziy hay Araba, ɗiger vok Gilgal, goboy hiɗi gu-ma'asna vi More. 31Wulini nigi ma ɦaw Yordan kulo'o kay tuɗ sli nagata ta Ma-Vatɗina Lawna vigi vulgiya; nigi ma sli nagat na'ta, nigi ma lak haya'a.
32Gatta hiɗi slen ma colina ma nan vulgit vaydina nigi ma ŋomomu kay li lop hiɗi nam kafe.
Currently Selected:
GATTA-SEM-MA'TA 11: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001