GATTA-SEM-MA'TA 12
12
GATTA HIƊI DITA-COLITA
Ma-Vatɗina vul hagata kay sunum hay liyn ma nam vilekemna
1Kayni mi sle ma ɗoyna hiɗi gatta ma nigi ma ŋomomu, li kuɗumu kaw hay li ma nigi coowa hay nagata ta Ma-Vatɗina Lawna vigi min vulgiya kay nigi ma lak haya. 2Liyn ma jaf-sum sa nigi min digiɗsina li girifta mi lawayna visi hayamna nigi ma tom gaa kafe, liyn ma ini kulo kay hiɗiyna, kulo kay ɗiŋiriŋŋa, hiɗi ma ini gaa kuɗ gu ma goɗayn kaf kaw. 3Nigi ma ɦo giwin-ma-ɗifinna visi gaa'a, nigi ma to hiɗiyna visi gaa'a, nagan ma nisi inim kulo'o, ma nisi yum Asera nigi ma ŋalam goyo, lawayna visiya nigi ma ɦasam selem goyo hay liy namna.
4Nigi ma li ki kayn nala kat Ma-Vatɗina Lawna vigiɗi, 5may nigi ma gar Lawna Ma-Vatɗina vigi kayni, hay liyn ma nam vilekemawa jar jafna vigiya, kay tun semda valam haya, kayni mi liyn ma nigi ma tuɗ hayna. 6Nigi ma li ɗifin ma ŋal-goyna vigi hay liy namna, ɗifin ma ɦawana, gal-ma-doogona, vun sle ma vulum goyna, vulda kay hob vun sle ma yiy kigina, hiɗi vulda ɦawata vi luwayna hiɗi fukunayna vigiya ma vuɗi jewna. 7Nigi hiɗi jafna vigi ma ti vok Ma-Vatɗin ɗawni hay liy namna, lo nigi hiɗi jafna vigi ma li firiya kay slen ma nigi fum hay ɓigiya, ma Ma-Vatɗina Lawna vigi gigi bol hiɗi namna.
8Nigi ma li ŋray ca slen ma nay ka lum tan wulin kayn naɗi, kay tan kayni gigekaw lum mi sle ma kiram ŋaana, 9kay mige nigi bay co hay tun-sukka hiɗi vocota ta Ma-Vatɗina Lawna vigi min vulgiya tuwa. 10May nigi ma ɦaw Yordan kulo'o, nigi ma lak ziy hay nagata ta Ma-Vatɗina Lawna vigiya min vulgit voco'o, nam ma vulgi tun-sukka, hay li ma nam butgiyawa goy hay ɓam sa gawta kaf sa ka ŋuygiya, nigi ma lak ziy hay sle'ta. 11Ɗawni ma li mi liyn ma Ma-Vatɗina Lawna vigiya ma vilekemu kay tun semda valam haya. Ɗawni mi liyn ma nigi ma li vulda vi sle ma nan digi kalamna: Ɗifin ma ŋal-goyna, ɗifin ma ɦawana, gal-ma-doogona vigiya, slen ma vulum goyna, hiɗi slen ma nigi vilekemu kay hob vun sle ma nigi yi kigiya tam Ma-Vatɗina.
12Nigi ma li yuldeta vok Ma-Vatɗina Lawna vigiya: Nigiya hiɗi gurona vigiya sa jufayna hiɗi sa boyna, sa sunda vigiya sa jufayna hiɗi sa boyna, sa Levitna sa ka jargina, kay galla hiɗi vocota visi may hiɗi nigiɗi.
13Ligi ŋali, kay liyn ma irgi wum kafna nigi as li ɗifin hayam de deɗi; 14may nigi ma li ɗifin kayni hay liyn ma Ma-Vatɗina vilekemu jar jafna vigi mara kep, kayni mi liyn ma nan vulgi hagat kalamna. 15May hiɗi kayni kaf, hay li ma dikgi minawa, nigi as ŋat luwaya, mutum sliwamu, kuɗ bolda ta Ma-Vatɗina Lawna vigi ma gi kigiya, hay liyn kaf ma nigi min lak hayna, la sa ka liwisi, lebo sa ma liwisɗi kaw nisi as ti kafe, ki san ti sliw dukka hiɗi buɗugoor ɦawa nala,#12:15 Sliw dukŋa hiɗi buɗugoora sa may lum ɗifinɗi, kay na'ta gigekaw as kay mutumu. 16may, busuwna nigi ma tumɗi, nigi ma yamam goy gaa kay nagata ki niy ɦawa nala.
17Gal ma doogona vi alkamarena vigiya, vi vin ma jibetna, hiɗi mula, gurona vi luwayna hiɗi fukunayna vigi ma vuɗi jewna, vulda ta nigi li'e kay hob vun sle ma nigi yi kigiya, lebo vulda ɦawata, lebo sle ma nigi vulum goyna kaf nigi as tumu hay liyn ma musta vigiɗi. 18May nigi ma tum ɗawni goy vok Ma-Vatɗina Lawna vigiya, hay liyn ma Ma-Vatɗina Lawna vilekemawa, nigiya hiɗi gurona vigi sa jufayna, sa boyna kaw, sa sunda vigiya sa jufayna hiɗi sa boyna, hiɗi sa Levitna sa ka li ziy jargiya; nigi ma li firi vok Ma-Vatɗina, Lawna vigiya kay slen ma ŋaana kaf ma nigi fum hay ɓisiya. 19Hay li ma nigi ka hay nagata vigi dok-doko, ligi ŋali kay nigi ma curoɗ sum sa levitnɗi.
20Hay li ma Ma-Vatɗina Lawna vigiya ɦur vun-nagata vigiyawa goyo, ki nam di tigi nala, la dikgi minawa a ti sliwi, nigi ma ti sliwna ki nigi min nala. 21La liyn ma Ma-Vatɗina Lawna vigi vilekemu kay tun semda valam haya ka goy gine hiɗi nigiya, nigi as ŋat putu lebo ɦuwa ma Ma-Vatɗina vulgiya, ki nan vul hagat tigi nala, nigi as ti'e hay liyn ma ziyna vigi ka haya ki nigi min nala. 22Nigi as tumu ki san ti sliw dukga hiɗi buɗugoora ɦawa nala; sa ma ka liwisi hiɗi sa ma may liwisɗi kaw as ti kafe. 23May ligi ŋali, kay nigi ma ti busuwnɗi, kay busuwn kayn ti ciwta, nigi as ti ciwta hiɗi busuwnɗi. 24Nigi as tumɗi, nigi ma yamam goy gaa kay nagata ki niyn nala. 25Nigi as tumɗi, kay nigi ma lak hay sle'ta, nigiya hiɗi gurona vigi sa bugolgina, nigi ma lum mi sle ma ŋaa'a vok ir Ma-Vatɗina.
26May slen ma ir vigiya ma nigi gum goy ɗifini, hiɗi vulda vigiya ta hob vun sle ma nigi yi kigiya kaw, nigi ma maram hay liyn ma Ma-Vatɗina vilekemna. 27Nigi ma li ɗifin ma ŋal-goyna, sliwna hiɗi busuwna kaf kulo kay giwin-ma-ɗifinna vi Ma-Vatɗina Lawna vigiya, busuwna vi va ma nigi ŋatam ɗifinna ma ɦok kulo'o kay giwin-ma-ɗifinna vi Ma-Vatɗina Lawna vigiya, nigi ma tum sliwamu may.
28Yoboyn ma nan digit kafna nigi ma li kuɗumu, ŋomomu kaw, kay nigi ma lak hay sle'ta, nigiya hiɗi gurona vigi sa bugolgina, ta-ta dok-doko, kay nigi ma li sle ma ŋaana hiɗi ma ɗigera vok ir Ma-Vatɗina Lawna vigiya.
29Hay li ma Ma-Vatɗina Lawna vigiya vat jaf-sum sa nam min digiɗsi vokginawa goy kafe, hay li ma nigi digiɗsiyawa goyo, vurnaawa hay baŋalsiya, 30ligi ŋali, nigi ma vi tuwgi hay jawta kay sli kuɗsiɗi hay li ma nigi munsiyawa vokgiya. Ligi ŋali, kay nigi ma vi labara kay lawayna visiya, a nigi ma job ala sumun kayni girif lawayna visi ir nanige? Numa kaw min girifim nala, nigi ma di naɗi. 31Nigi ma li ki kayn nala kat Ma-Vatɗina Lawna vigi noŋɗi; kay nisi li slen ma liwisna kat Lawayna visiya, slen ma liwisi kir Ma-Vatɗina. Kay nisi ŋal gurona visi sa jufayna hiɗi sa boyna goy noŋo hay kuta kay subur lawayna visiya.
Currently Selected:
GATTA-SEM-MA'TA 12: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001