GATTA-SEM-MA'TA 10
10
1Hay liy namna kayni, Ma-Vatɗin dan ala: Ceɗaŋ table hiɗiyn ma' ki ma jewn nala, jikaŋay kulo tanu kay hiɗiyna; naŋ ma kot timgil ma guna kaw. 2Nan min ɗo hayamu yoboyn ma ay hay table ma jewna, ma naŋ tom goyna, bugol kayni naŋ ma burum hay timgilla. 3Nan kot timgilla hiɗi gu-kasiyana, nan ceɗ table-hiɗiyna ma' ki ma jewna nala, bugolda nan jik kulo kay hiɗiyna, tablena ma ma'na ka hay ɓanu. 4Yoboyna ma doogona ma ay ɗoy hay tablena ma jewna Ma-Vatɗina hot ɗom hay tablena namna ma ma'na, kayni mi yoboyn ma doogona, nam dumu kulo kay hiɗiyna, goy jar kuta pa, hay buur ma tokŋa; Ma-Vatɗina vulan yoboy namna hay ɓanu may. 5Nan hot bugolanu, nan jik gaa kay hiɗiyta, nan lak tablena hay timgilla ma nan kotomna, nam cuki hayam ca, ki Ma-Vatɗin vul hagata tanu nala.
6Sum sa Israyella yaways hay Beerot-Bene-Yaakan pa, kal hay Mosera. Kayni mi liyn ma Aaron mit hayna, nisi pum hay liy namna kaw. Goora valam Eliyazar vurna baŋalamu hay lopna vi ɗifinna. 7Nisi yaways hay ɗawn pa kalay hay Gudgoda, hay Yotbata, nagata ta niyn ka riŋ haya.
8Hay liyn namna kayni, Ma-Vatɗina poŋ ir jafna vi Levi goyo, kay nisi ma ziy timgilla vi bonota vi Ma-Vatɗina. Kay nisi ma lak vok Ma-Vatɗina kay li lopna valamu, kay gi bol kay sumuna hay semda valamu, (kayni mi slen ma nisi ka lumu ta-ta vaydi). 9Kuɗ na'ta kayni galla hiɗi vocota vi Levi may jar ɓosiyomnaɗi, Ma-Vatɗina mi vocota valamu, ki Ma-Vatɗina Lawna vigiya di tigi nala.
10Nan mus kulo kay hiɗiyta, ki jew nala, ir buur dok-fiɗi. Hay na'ta kayni Ma-Vatɗina hum siɗawta van lo, kay nam may min kay vatgi goyɗi. 11Ma-Vatɗina di tanu: Fokaŋ kulo'o, tuɗaŋu, tunaŋ vok sumuna. Naŋ ma narsi hay nagata ta nan yi va kanu vun sumaysi ala nan min vula' misiya.
Gatta kay lak hay hum-vunda hiɗi minda
12Wulin kayni, nigi sa Israyella, Ma-Vatɗina Lawna vigi jobom tigi kayni mi mige? Nam min kayn ala nigi ma li nar kuɗum nam Ma-Vatɗina Lawna vigiya, kay nigi ma poy hay hagata valam kafe, min Ma-Vatɗina Lawna vigiya, sunum kaw hiɗi dikgi kaf, hiɗi ciwta vigi kaf; 13Ma-Vatɗin job tigi kayn ala nigi ma li kuɗ vun-ma-gatna valamu hiɗi slen ma nan ɗom tigi vaydina kaw kay nigi ma lak hay sle'ta ɗisu? 14Humgiya dukalawna hiɗi dukalawna ma suw dukalawna nam vi Ma-Vatɗina Lawna vigiya, nagata hiɗi sle ma haya'na kaf kaw. 15Ma-Vatɗina jun kay li minda kayn hiɗi sumaygi tuta; bugolsi nisi kayni si jafna valamu, si nigiya, nam vilekgi goy jar jaf-sumun kaf ki nigi ka wi vaydi nala. 16Nigi ma ka gosay mi dikgiya, nigi ma li yigi ɗeŋɗi. 17Kay Ma-Vatɗina Lawna vigiya mi Lawna vi lawayna, Bum-Sumuna vi sumay sumuna, Lawn ma donona, ma narta kuɗumna, ma poŋ ir saɗina, ma yaw vulda vi saɗina, 18ma li ɗigerta mi sa ma kuyuna hiɗi cata duhulta, ma min sa ma pulla, vulum tina hiɗi sligara kaw. 19Nigi ma min sum sa pulla, kay nigi kaw ay pulu hay nagat Egipte. 20Nigi ma li nar kuɗ Ma-Vatɗina Lawna vigiya, nigi ma girifimu, nigi ma jun tuwgi talamu, nigi ma yi va kigiya hay semda valamu tuta. 21Namu mi gajijita vigiya, namu mi Lawna vigiya: Namu mi ma li slen ma ŋulona ma ɦuyumda kuɗumna jargiya, slen ma irgi wum wulin lakŋi. 22Sumaygiya kal hay Egipte kayni nisi ka ir sumun dok-siɗiya ɦawa, may wulin Ma-Vatɗina Lawna vigi biyagiyawa ŋolo ŋray ca ki mislek ma dukalawn nala.
Currently Selected:
GATTA-SEM-MA'TA 10: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001