GATTA-SEM-MA'TA 9
9
Gi-humda kay ŋel-vunda vi sa Israyella
1Humgiya, nigi sa Israyella, vaydi nigi ma ɦaw Yordan kulo'o, kay kal sli nagata vi sum sa gaŋeraŋi, dono suwgi nigi kaw, hoyok-ziy ma ŋulona ma gulmun ini talamu ta-ta kulo hay dukalawna, 2sum sa ŋulo'o sa wuli kulo fiyoko, gurona vi Anak, sa nigi wisina, sa nigi humi labara visina, sa ma col dig gurona vi Anak mi gige? 3Wigi goy vaydi haraŋ ala Ma-Vatɗina Lawna vigiya ka tuɗ vokgiya, ki kuta-ŋalta nala, nam kay tuwamu ma vatsi goyo, namu ma hotsi yisi gaa vokgiya, nigi ma vatsi goy gosoyo, ki Ma-Vatɗina di tigi nala.
4Hay li ma Ma-Vatɗina Lawna vigiya munsiyawa vokgiya, nigi ma li ŋali kay di hay dikgi ala: Ma-Vatɗin cukma hay nagat na'ta kayni kuɗ ɗigerta vuma'a, nigi ma di naɗi, kay Ma-Vatɗin munsi vokgi ɗawni kuɗ joota vi jaf-sum sa hay nagat na'tana. 5Mayɗi, nigi cuk hay nagat na'ta ɗawni kuɗ gasita vigiya hiɗi ɗigerta vi dikgiɗi, may nigi cuk hay nagat na'ta ɗawni kuɗ joota vi jaf-sum sa Lawn min digiɗsi vokgina, lo kay hob vun yoboy ma Ma-Vatɗin yi va kalamu tam sumaygiya, tam Abraham, tam Isaak, tam Yakub kaw. 6Wigi goy ŋaa'a ala Ma-Vatɗina Lawna vigiya vulgi nagat na'ta ta ŋaata kay nigi lak haya' ɗawni, kuɗ ɗigerta vigiɗi, kay nigi kayni si sum sa yigi ɗeŋe.
7Humgi ma gigiya, va ma nigi ɓulak dik Ma-Vatɗin hiɗi nam hay fuldana yigi ma jokomɗi, hay li ma nigi kalay goy hay Egipte pa ta-ta hay liyn tani, nigi ŋel vun Ma-Vatɗina. 8Hay Horeb, nigi ɓulak dik Ma-Vatɗina; Ma-Vatɗina dikam ɓulak katgiya, ta-ta nam min kay vatgi kirɓicik'. 9Hay li ma nan jik kulo kay hiɗiyna, kay yaw table hiɗiyna, hiɗiyna vi bonota ta Ma-Vatɗin juna' hiɗi nigiya, nan mus kulo kay hiɗiyta ir buur dok-fiɗi, ti fuɗi ci niyɗi kaw; 10nala Ma-Vatɗina vulan tablena ma hiɗiyna ma ma'na ɗoy hiɗi ɓalam namu, ŋray ca hiɗi yoboy ma Ma-Vatɗin kay tuwamu dum tigiya kaf kulo kay hiɗiyta, goy jar kuta, hay buur ma tokŋa. 11Ma-Vatɗina vulan tablena ma ma'na, tablena ma hiɗiyna, ma yum tablena vi bonota kayni hay vatta vi buurta dok-fiɗita.
12Ma-Vatɗina ka di tan ala: Fokaŋ kulo'o, jikaŋ gaa kat sumuna vaŋ gosoyo; kay sumuna vaŋu sa naŋ kalsiyay goy hay Egipte pana muɗ tuwsiyawa liwisi, nisi calawa goyo hay hagata ta nan ɗeksi ka'ta, nigi kot va ma sli tuw sanawa hiɗi kaway ma yorayna. 13Ma-Vatɗin danu: Sumun kayni nan wisiyawa, nisiya si sum sa yisi ɗeŋe. 14Hinan vatsi goyo, ɦassi sesi goyo kay nagat noŋo; naŋ hayɗini nan ma laŋ jafaŋ dono'o, ŋolo kaw suw jaf-sum nisina. 15Nan hoti bugolanu, nan jik gaa kay hiɗiyta, tablena vi bonota ma ma'na ka hay ɓanu, hiɗiyn ay sliy ku kafe hay na'ta. 16Nan ɗuwa, nan wi kayni nigi liy suluku kat Ma-Vatɗina Lawna vigiya, nigi yor goor-put ma kawaynawa, nigi calawa goyo hiɗi hagata ta Ma-Vatɗina Lawna vigi ɗekgitta. 17Nan yaw tablena ma ma'na, nan cukum gaa'a hiɗi ɓan ma' kafe, nan tom goy kirgi kafe. 18Nan gi tuwan gaa vok Ma-Vatɗina sem mara lo, buur dok-fiɗi, bay ti fuwa, bay ci niyo, kuɗ sulukŋ kaf ma nigi lumu, hay li ma nigi li sle ma joo kir Ma-Vatɗina, kay ɓulakam dikamu. 19Kay nan muɗi nari kay ɦiyda vi Ma-Vatɗina, kay nam muɗi ɦiy dono ŋolo, min vatgi goyo kaw. May Ma-Vatɗina hum siɗawta vanu sem mara'a lo. 20Ma-Vatɗina muɗ ɦiy ŋolo kat Aaron, ta-ta nam mini kay cum goyo; may hay na'ta kayni nan siɗawamu kay Aaron kaw. 21Nan vi goor-putna ma kalgi hay jootna, nan ŋalam goyo hay kuta, nan duwumu, guɗufum goyo, ta-ta nam muɗ ki butuw-kun nala, nan cuk butuw-kuna valam hay niy ma vidikŋa ma may kulo kay hiɗiyt pana.
22Hay Tabeera, hay Masa, hay Kibrot-Hattava, nigi ɓulak dik Ma-Vatɗin kafe. 23Hay li ma Ma-Vatɗina cukgi hay Kades-Barneya pa, nam digi ala: Tuɗgiya, sligi nagata ta nan min vulgiya, nigi ŋel vun Ma-Vatɗina Lawna vigiya, nigi min vi kuɗumɗi, nigi min humum delemɗi kaw. 24Nigi si sum sa ŋel vun Ma-Vatɗina jewe hay liy ma nan wigin pa.
25Nan gi tuwan gaa vok Ma-Vatɗina, nan guɗof gaa vokomu ta-ta ir buur dok-fiɗi, kay Ma-Vatɗina di ala nam min vatgi goyo. 26Nan siɗaw Ma-Vatɗina, nan di ala: Bum-Sumuna Ma-Vatɗina, sumuna vaŋu, vocota vaŋu sa naŋ butsi goy hay Egipte pa hiɗi ŋolda vaŋu, sa naŋ kalsiyay goy hay Egipte pa hiɗi donota vaŋu naŋ ma vatsi goyɗi. 27Humaŋ ma gaŋ kay sa sunda vaŋu, Abraham, Isaak hiɗi Yakub. Naŋ ma tun ŋalda vaŋu kay ŋel-vunda vi sum nisin kaynɗi, tun ŋalaŋ kay joota hiɗi sulukŋa visiɗi, 28la naɗi, sum sa hay nagata ta naŋ kalma'ay goy haya' pata ɗawn ma di ala: Kay Ma-Vatɗina gaŋeraŋa valam kay kalsi hay nagata ta nam yi va kalamu kay vulsiya mayɗi, kay nam kaasiyawa gawi, nam kalsi ay goyo kay cisi goyo hay fulda. 29May nisi kayni si sumuna vaŋu hiɗi vocota vaŋu sa naŋ kalsiyay goyo hiɗi donota vaŋu ta ŋolda, hiɗi ɓaŋ goy meɗiya kaw.
Currently Selected:
GATTA-SEM-MA'TA 9: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001