YONAS 4
4
Yonas muɗ ɦiy tam Ma-Vatɗina
1Lawta kayni ɓulak dik Yonas ŋolo, nam muɗ ɦiya. 2Nam tiy tam Ma-Vatɗina di'e: Hih! Ma-Vatɗina, kayni mi law ma nan dumu hay li ma nan ay hay nagata van tuwanɗi su? Kuɗ na'ta kayni nan gar kay pir hay Tarsis. Kay nan wi ala naŋu mi Lawn ma slugo'o ma wi haw sumuna, naŋu mi sa ma muɗ ɦiy gosoyɗi, ŋaata vaŋu na' ka ŋol lay, la naŋ var kay li va ma joo'o tam sa'a kaw, hot bugolaŋ bay lopo. 3Wulin kayni, Ma-Vatɗina, marya naŋ sli ciwta vanu, mitta kiran ŋaa'a suw mus ma irina. 4Ma-Vatɗina hotom dita: Wulini naŋ muɗi ɦiy kayn hay liyam su?
5Wulini Yonas hin hoyok-ziyna, nam kalay musi goy hay galam ma kuɗuwna, ɗawni nan kot balak ma ŋolla kepe kulo kalam ŋusu. Nam ka cub va ma min li hay hoyok-ziyna. 6Wulini Ma-Vatɗina hin gu-terena day kulo'o kay li ŋus kay Yonas, kay a ɦiyda valam ma vat goyo kaw. Gu-tere namna li dik Yonas firi ŋolo. 7May hay buurta ka'ta hay graw culumta, Ma-Vatɗina gi jufulla aya, nam ka so'ol gu-teren goyo, nam miti goyo may. 8Hay li ma fatta dayay kulo'o, Ma-Vatɗina hin simeɗ ma kuna may hay gal kuɗuw pa vidik ŋolo. Fatta war Yonas ŋolo kalamu. Nam nig gaa'a ki ŋelay nala. Nam tun caw gar mitta; nam di'e: Mitta kiran jifiy ŋolo suw mus ma irina. 9Lawn di tam Yonas: A muɗ ɦiya kay terena kayni kiraŋ ŋaa'a su? Nam hot dita: Kiran ŋaa'a suwa kay muɗ ɦiya, mitta kaw kiran ŋaa'a lay. 10May Ma-Vatɗina dumu: Naŋ ka mak tuwaŋ kay terena ma naŋ mak tuwaŋ kay pum noŋɗina, wulum mi naŋɗi lay. Nam dayay kulo'o hay buur kepe, miti goyo hay buur kepe kaw. 11May nanu, hoyok-ziyn ma ŋolla Ninive, sumun hayam suw birim kis-ɦidi diram dok-ma', nisi wi yal kay poŋ ir ŋaata hiɗi jootɗi, naŋ min ala nisi ma muɗ kiran hawɗi may su? Farayn kaw ka hayam ŋol lay naɗi su?
Currently Selected:
YONAS 4: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001