YONAS 3
3
Kusta vi Yonas hay Ninive
1Ma-Vatɗina di yoboyna valamu tam Yonas sem ma ma'na lo ala: 2Yonas, fokaŋ kulo'o, tuɗaŋ hay hoyok-ziyn ma ŋolla yum Ninive, naŋ ma di yoboyn ma nan daŋgina.
3Yonas fokay kulo'o, kalay hay Ninive, ki Ma-Vatɗina di talam nala. Ninive namna mi hoyok-ziyn ma ŋolo, a ŋuyum goy kafe, naŋ tuɗ buur ɦidi. 4Hay buurta jewta, Yonas poy hay hoyok-ziyna, nam ka siwela di'e: Hey! Hini buur dok-fiɗi ɦawa Ninive ma ɓulak goyo.
5Sum sa hay Ninivena vi hay Lawna. Nisi kaf vul gatta kay li laata, cuk sligar-bolla tisiya,#3:5 Sligar-bolla Kayni ɗek do'olla hiɗi hot yamda gaata. tam sa ŋulon pa ta-ta tam sa gurayn dab 6Lawta kayni co hay hum mul ma Ninivena. Nam fok goy kay zlamda-mulda valamu, fok sligar-tuwna ma mulda goyo, cuk sligar-bolla talamu, mus gaa hay butuw-kuna.
7Mulla hiɗi sa ŋulo sa vunamna cuk sumun goy hay hoyok-ziyn Ninive kaf hiɗi gatta ala: «Sa ti vaɗi, tuɗ farayn goy tiɗi, layayn noŋ kaf ti vaɗi lay, muuriyan tiɗi lay, ci niyɗi lay kafe». 8Cuk sligar-bolla tam sumuna hiɗi farayn noŋ kafe, gigekaw tiy tam Lawna hiɗi donom noŋ kafe, law ma joona nisi hinim goy noŋ kafe, jiw-zlata ta nisi la' tam tuwsita nisi hina' goy noŋ kafe. 9Sa wiɗi, kla, la Lawn hot bugolom tam ɦiyda valam klasige, kay a nay ma ba goyɗi?
10Wulini hay li ma Lawn wi ala nisi tun caw var kisiya, ka hot bugolsi tam hagata visi ta joota kaw, nam muɗ varta valamu kay joot ta nam var kay li tisiya, nam min li joot tisi loɗi.
Currently Selected:
YONAS 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001