1 TIMOTEWUS 3
3
Sa ŋom-tapna hiɗi sa sun-tapna
Tit 1:5-9; 1 Pet 5:1-4
1Yoboy namna kayni gasiya, la san min li lop ma ŋom-tapna, nam vilek lop ma ŋaanawa. 2Kay na'ta la litigekaw sa ma ŋom-tapna ma lin mi sa ma law ma joo'o may kuɗumɗi, jufna vi cat kepe, tel tuwamu, yali, tap tuwam hiɗi sumuna, vi sumun ŋaa'a, wi yal kay hat sumuna, 3tuwam may vuli goy tam dolaynɗi, waskayɗi, ɗiliya, gar cireptaɗi, dar gurjutɗi kaw, 4sa ma ŋom ziyna valam ŋaa'a, sa ma gurona valam gati kuɗum ŋaa'a, hay hum-vunda kaw. 5May la sa wi yal kay ŋom ziyna valamɗi, nam as kot tuw ekklesiyata vi Lawn ɗawn kottige? 6Nam ma lin mi sa ma hamay wuliɗi, kay la nam mi sa ma hamay wuliya, subur-tuwta ma kal hayamu, nam ma nig gaa hay kitata vi Matna. 7Nam ma lin mi sa ma sum sa goy jiyna li di-goyta ŋaata kalamu kaw, kay la naɗi nam ma kal hay ŋulda, nam ɗawn ma nig gaa hay jawta vi Matna kaw.
8Sa sun-tapna kaw ma li tuwsi a sumun slisi yisi kulo'o, ja jarsi goy hiɗi vun ma ma' ma'na, ɦoy kuɗ dolaynɗi, jaŋ kuɗ gurjutɗi, 9may nisi ma lin si sum sa ŋom ŋayayta vi vida hay tap-wida ta peldetta. 10nisi ma waksi jewe, la va ma joo may kisiɗi, bugolda nisi ma hinsi li lop ma sun-tapna may. 11Nala boyna kaw ma li tuwsi a sumun slisi yisi kulo'o, di vun ma tefleɗi, ci dolayn ŋolɗi, li slen pet hay gasita kaw. 12Sa ma sun-tapna ma lin mi jufna vi cat kepe, nam ma lin mi sa ma ŋom gurona valamu hiɗi ziyna valam ŋaa'a kaw. 13kay nisi sa li lopna vi sun-tapna ŋaa'a sesi muɗ tiy ŋolo, nisi jor voksi dono'o hay vida hay Kristu Yesu kaw.
14Nan ɗo slen kayni taŋu hiɗi varta ala hini neeɗa ɦawa nan ma coys goy vaŋu; 15may la yan vi neeɗa, hini kayni naŋ ma wi yal ma poy hay ziyna vi Lawna, namu mi Ekklesiyata vi Lawn ma irina, dolla hiɗi sem gasita ma tuni gaana. 16Nay as li di-goyt ala ŋayayta vi narta kuɗ Lawna na' ŋolo:
Nam ma vul tuwamawa goy haraŋi hay sliwna,
li goy ɗigere hay Ŋusta,
Sunda-wuralawna ɗuwumu kaw,
nisi kusi labara kalamu jar jaf-sumuna
sumun vi hayamu gaa hay nagata,
Nam viys kulo'o hay gajijita.#3:16 Ɗuw kayni hay Es 49:6.
Currently Selected:
1 TIMOTEWUS 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001