1 TIMOTEWUS 2
2
Siɗawta kay sumun kafe
1Kay na'ta nan gatgi suw pet kayni kay nigi ma li giɗel-delta, kay nigi ma li siɗawta, siɗaw kay sumuna, li lop ma slugona kaw kay sumun kafe, 2siɗaw kay muliyana hiɗi sum sa lakay kulo hay liy ma ŋulona kafe, kay nay ma lak hay irita ta toyta, ta ŋal kiliŋga, hay poyta bay joota hiɗi hormota. 3Kay kayni ŋaa'a ŋolo kir Lawna ma su'da vaya, 4nam ma min ala sumun kaf ma fi su'da, co tam wida vi gasita kaw. 5Kay Lawna ka kepe, sa ma tap jar Lawna hiɗi sumuna ka kepe kaw, sa namna mi Kristu Yesu. 6Nam ma vul tuwam goyo kay but sumun kaf goyo, di-goyta ta li hay liyna va'ta. 7Nam tunanawa sa ma kus yoboyna, tunanawa apostolaya kaw -- nan di gasita, nan ka sinɗi -- nam tunanawa kay hat sa waana hay vida hiɗi gasita.
8Nan min kayn ala sum sa jufayna ma siɗaw hay liyn kaf, nisi ma yaw ɓisi ma peldetna kulo'o, bay ɦiyda, bay ci-wayta kaw.
Lopna vi boyna
1 Pet 1:3-6; Tit 2:3-5
9Nala kaw boyna ma cukum mi sligara ma bay suburta, irsi zulo kay sumuna, hot yisi gaa'a kaw, yisi ma gum gaana nisi ma gitim ɗol-ɗolɗi, gan tuwsi hiɗi orɗi, hiɗi kermenɗi, hiɗi sligar ma jifiy ma gus lop ŋollaɗi kaw, 10may mi lop ma ŋaana ma ɗek goy ala nisin si boy sa viyna sa sun Lawna. 11Nala cata ma hum hatta hay musta kiliŋga hiɗi hot-yamda gaata; 12kay nan may vul hagata tam cata a na' ma vul hattaɗi, a na' ma sli ŋolda kay jufa'ɗi kaw, may na' ma mus ŋal kiliŋ'. 13Kay Adam ini jewe, Eva ini bugolda may. 14Adam ɗuti goyɗi, may ɗuti goyn ti cata, na' kal hay raw-goyta jewe. 15May na'a ma fi su'da hay vu'da vi goora, la nisi so tuwsi hay vida, hay minda, hay lita-peldetta kaw, hiɗi yisi hoti gaa'a.
Currently Selected:
1 TIMOTEWUS 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001