Romanos 1
1
Cartapa qallariyninmanta
1Jesucristopa serviqnin ñoqa Pablom, rimaykamuykichik. Diosmi apostolnin kanaypaq qayaykuwaspan allin noticiata willakunaypaq akllaykuwarqa.
2Chaytam profetankunatakama ñawpaqmantaraq Dios prometekurqa Chuya Qellqapi. 3Kay allin noticiaqa Diospa Churin Señorninchik Jesucristomanta willakuymi. Paymi aychaman hina nacemurqa Davidpa mirayninmanta. 4Chuya Espirituman hinañataqmi, wañusqanmanta kawsarimusqanrayku, Diospa atiyniyuq Churinwan sutichasqa karqa. 5Diospa kuyakuyninman hinam apóstol kanaypaq Jesucristontakama akllasqa karqani, chaynapi llapallan nacionkuna Jesucristopi iñispanku payllataña kasukunankupaq. 6Chay runakuna hinam qamkunapas Jesucristopaq akllasqaña kachkankichik.
7Chaymi Roma llaqtapi Diospa kuyasqankunaman qellqamuykichik, Diosmi kuyasunkichik, hinaspam payllapaqña kawsanaykichikpaq qayasurqankichik. Dios Taytanchikpa chaynataq Señorninchik Jesucristopa kuyakuyninwan hawkayayninyá qamkunawan kachun.
Roma llaqtapi kaqkunata watukuy munasqanmanta
8Imamantapas puntataqa, iñisqaykichikmanta tukuy hinastinpi allinta willakusqankuta yachaspaymi Jesucristopa sutinpi llapallaykichikmanta Diosman graciasta qoni. 9Churin Jesucristomanta allin noticiata tukuy sonqoywan willakuspay servisqay Diosmi yachan qamkunapaq tukuy tiempo mana qonqaspay mañakusqayta. 10Mañakuchkanitaqmi, Dios munaptinqa imaynapas qamkuna watukaykamuyta. 11Qamkunawan tupaykuytam llumpayta munachkani Chuya Espiritupa atiyninta qoykunaypaq chaynapi qaqa hina sayanaykichikpaq, 12hinaspa hukninchikmanta hukninchikkama iñiyninchikpi kallpanchanakunanchikpaq.
13 #
Hch 19.21. Wawqe-panillaykuna yachaychikyá, achka kutipim qamkunaman chayaykamuyta munarqani, ichaqa hamuyta munaptiypas sasachakuykunam harkawarqa. Anchatam munachkani wakin llaqtakunapi hina qamkunapipas iñiqkuna miraykachiyta. 14Griegokunamanpas, #1.14 Mana griego nispaqa nichkan mana estudioyuq runakunatam.mana griegokunamanpas, yachayniyuqkunamanpas chaynataq mana yachayniyuqkunamanpas willakunaymantam debekuni. 15Chayraykum Roma llaqtaykichikpipas llumpayta munachkani Jesucristomanta allin noticiakuna willaykuyta.
Allin noticiaqa atiyniyuqmi
16Jesucristomanta allin noticia willakuytaqa manam penqakunichu, chayqa Diospa atiyninmi haykam iñiqkunata salvananpaq, puntataqa judiokunata chaynataq mana judiokunatapas. 17#Hab 2.4.Kay allin noticiam reqsichiwanchik, imaynam mana huchayuqpaqña Diospa chaskiwasqanchikta, chayqa Diospi hapipakuspa iñikuptillanchikmi. Chuya Qellqapim kaynata nin:
“Allin ruwaq runaqa iñikuspallam kawsanqa”, nispa.
Runapa huchallikusqanmanta
18Diosmi piñakuyninta hanaq pachamanta kacharimun runakunapa mana allin ruwayninpa chaynataq mana llakipayakuq kayninpa contranpi. Paykunam mana allin kawsayninkuwan cheqap kaqkuna reqsinata harkakunku. 19Paykunaqa Diosmantaqa yachankuñam, kikin Dios reqsichikusqanrayku. 20Diospa mana rikuy atina kaqninkunapas, wiñaypaq atiyninpas chaynataq Dios kayninpas, kay pacha unanchasqa kasqanmantapunim tukuy ima unanchasqankunapi reqsichikun. Chaynaqa, manam pipas ninmanchu:
“Diosmantaqa manam imatapas yacharqanichu”, nispaqa.
21Paykunaqa Diosta reqsichkaspankupas manam Diosta hinachu hatuncharqaku, nitaqmi graciastapas qorqakuchu. Aswanraqmi yanqakunata yuyaymanaspanku mana allin sonqonkuta tutayarachinku. 22Yachaysapapaq hapikuchkaspankupas mana yachayniyuqmi rikurirunku. 23Wiñay kawsaq Tukuy Atiyniyuq Dios yupaychaytam tikrarunku, hinaspam wañuq runakunapa rikchaynintaña chaynataq alton pawaqkunapa, tawa chakiyuq animalkunapa, pampan puriq urukunapa rikchaynintaña yupaychanku.
24Chayraykum Diospas millakuypaq kawsakuymanña kachaykun, mana allin sonqonkupa munasqanpi purinankupaq, chaynapim kikinkupura qanrakuspanku hatun millakuypaq kaqkunata ruwanakunku. 25Diospa cheqap kaqninkunatam tukuy llulla kaqkunamanña tikrarunku, hinaspam unanchaq Diosta qonqaruspanku unanchasqan kaqkunataña yupaychaspa servinku. ¡Diosllam wiñaypaq yupaychasqaqa kanan! Amén.
26Chayraykum Diospas millakuypaq ruwaykunamanña saqeykun. Chaynapim warmikunapas manaña qariwan kaspa mana ruwanakunataña ruwanku. 27Chaynallataqmi qarikunapas, manaña warmiwan kaspa, kalintapi animal hinaña kallpakachaspanku qaripuraña munapayanakunku, hinaspam millakuypaq mana ruwana kaqkunata kikinkupura ruwanakunku, chaynapim chay millakuypaq kaqkuna ruwasqankumanta castigota cuerponkupi chaskispa ñakarichkanku.
28Diosta mana kaqpaq hina hapisqankuraykum, Diospas mana allinkuna yuyaymanaymanña saqeykun, chaynapi mana ruwana kaqkunataña ruwanankupaq. 29Chaymi paykunaqa kay mana allin ruwaypa huntasqan kachkanku: Waqllikuqkuna, millakuypaq kaqta ruwaqkuna, qollqella kuyaqkuna chaynataq hukpa kaqninta munapayaqkuna, runa wañuchiqkuna, kikillanpaq munaqkuna, engañakuqkuna peleolla kuyaqkuna, cuento qepikuna, 30runamasinpa qepanpi rimaqkuna, yanqakunamanta tumpakuqkuna, Diostapas cheqniqkuna, kutipakuqkuna, hatun tukuqkuna, mana allin ruwayllapi yuyaymanaqkuna hinaspa tayta-mamankutapas mana kasukuqkuna, 31allin kaqkunatapas mana entiendey munaqkuna, rimasqankutapas mana ruwayman churaqkuna, mana kuyapayakuqkuna, paykunaqa manam pitapas llakipayankuchu. 32Paykunaqa yachankum chayna ruwaqkunaqa wañuypaq Diospa sentenciasqan kasqankuta, ichaqa yachachkaspankupas hinallam ruwanku, hinaspam chay mana allin ruwaqkunapa ruwasqanwanpas kusikunku.
Currently Selected:
Romanos 1: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012