Hechos 28
28
Malta sutiyuq islapi Pablopa kasqanmanta
1Lliwniyku salvakuruspaykuñam yacharurqaniku chay islapa sutinqa Malta kasqanta. 2Chay islapi yachaqkunam kuyakuyllawanña chaskiykuwarqaku, paraptin chirimusqanraykum ninata ratachispa niwarqaku:
Lliwchaykichikyá qonikuychik, nispanku.
3Pabloñataqmi chaki yantata hoqariykuspan ninaman hinaykuchkarqa, hinaptinmi venenoyuq maqta uru ninamanta ayqechkaspan Pablopa makinman wankukururqa. 4Chay islapi yachaqkunañataqmi Pablopa makinpi maqta uru warkurayaqta rikuspanku ninakurqaku:
Kay runaqa cheqaptapas runa wañuchiqchusmi kanman, chaychusmi lamar qochamanta librakuruptinpas justicia ruwaq mamacha mana kawsananta munanchu, nispanku.
5Ichaqa Pabloñataqmi chay maqta uruta ninaman taspiykurqa, paytaqa manam imanarqachu. 6Lliwchankum suyachkarqaku punkipakurunqach otaqchá qonqayta wañusqa wichiykunqa, nispanku. Unayniqmanta manaña imapas pasaptinmi piensarurqaku Pabloqa huk dios kasqanta.
7Chay islapi kamachikuqmi karqa Publio sutiyuq, paypa chakrankunam ñoqaykupa hichpallaykupi karqa. Chaymi samaykachiwaspanku kimsa punchawpuni atiendeykuwarqaku. 8Publiopa taytanmi camapi calenturawan hinaspa diarreawan kachkarqa. Pablom watukuspan Diosta mañapurqa, paypa umanman makinta churaykuptinmi sanoyarurqa. 9Chay islapi yachaq wakin onqoqkunapas chayta yacharuspankum Pabloman hamurqaku hinaspam sanoyarqaku. 10Paykunam llumpayta agradecekuwaspanku kuyakuyninkuta qowarqaku. Huk barcopiña lloqsiptiykum tukuy ima pisiwaqniykuta qowarqaku.
Roma llaqtaman Pablopa chayasqanmanta
11Chay islapi kimsa killa karuspaykum Alejandría llaqtamanta hamuq barcopiña lloqsirqaniku, chay islapim samachkarqa poqoy tiempo pasanankama. Chay barcopa umanpim Cástor chaynataq Pólux dioskunapa rikchayninkuna llaqllasqa kasqa. 12Barcopa sayanan Siracusa llaqtaman chayaruspaykum kimsa punchaw qeparqaniku. 13Chaymantam rirqaniku lamar qochapa patallanta Regio llaqtaman chayanaykukama. Paqarinnintin punchawñataqmi qepayku lawmanta wayramuptin iskay punchawpi Puteoli llaqtaman chayarurqaniku. 14Chaypim wakin iñiqmasinchikkunata tarirqaniku, hinaptinmi ruegawarqaku huk semana paykunawan kanaykupaq. Chayñam Roma llaqtaman chayarqaniku. 15Roma llaqtapi iñiqkunam chayanaykuta yachasqakuña hinaspam “Apio Foro” nisqa plazakama taripamuwasqaku, wakinñataqmi “Kimsa Taberna” nisqa sitiokama taripamuwarqaku. Paykunata Pablo rikuykuspanmi Diosman graciasta qospan aswanraq kallpanchakurqa. 16Roma llaqtaman chayaruptiykum Pablota saqeykurqaku huk soldadopa cuidasqan sapaq wasipi yachananpaq.
Roma llaqtapi Pablopa willakusqanmanta
17Chayasqaykumanta kimsa punchawmanmi Romapi judiokunapa kamachiqninkunata Pablo qayachimurqa, huñunakuruptinkum nirqa:
Wawqeykuna, ñoqaqa manam imatapas ruwarqanichu ayllunchikkunapa contranpiqa otaq ñawpa taytanchikkunapa costumbrenkunapa contranpiqa, chaywanpas castanchikkunam Jerusalén llaqtapi presota entregawarqaku Roma llaqtayuq kamachikuqkunaman. 18Chaymi paykuna tapuwaspanku wañuchiwanankupaq hinaqa mana imatapas tarispanku kachaykuwayta munawarqaku. 19#Hch 25.11.Aswanqa castanchikkuna chayta mana munaptinkuñataqmi kikin rey Cesarña juzgawananpaq mañakurqani. Chaywanpas manam ayllunchikkunata acusanaypaqchu. 20Chaynapim qayachimurqaykichik qamkunawan tupaykuptinchik willanaypaq. Israel miraykunapa suyasqanku hamurusqanmanta willasqayraykum kay cadenawan watasqa kachkani.
21Hinaptinmi paykunañataq nirqaku:
Qanmantaqa manam ima cartatapas Judea lawmantaqa chaskirqanikuchu, manataqmi mayqan llaqtamasinchikkuna hamuqpas qampa contraykipiqa imatapas niwarqakuchu. 22Ichaqa imam piensasqaykitam uyariyta munaniku, ñoqaykuqa yachanikum tukuy hinastinpi iñiqkunapa contranpi rimasqankuta, nispanku.
23Chaykunamanta rimanankupaq huk punchawtaña akllaruptinkum, Pablopa samakusqanman achka runakuna hamurqaku, hinaptinmi tutapaymanta tardeykuqkama Diospa munaychakusqanmanta paykunaman willarqa. Moisespa hinaspa profetakunapa qellqasqanta qawachispanmi Jesusmanta convencechiyta munarqa. 24Hinaptinmi wakinqa Pablopa nisqanta creerqaku, wakinñataqmi mana creerqakuchu. 25Mana huk sonqolla kaspa asurikuptinkum Pablo nirqa:
Allintapunim ñawpaq taytanchikkunamanqa Chuya Espíritu profeta Isaiasnintakama kaynata nirqa:
26“Rispayki wak llaqtata kaynata nimuy:
Uyarispapas manam entiendenkichikchu,
qawakuspapas manam rikunkichikchu.
27 #
Is 6.9-10. Kay runakunapa sonqonqa rumiyarunmi,
paykunaqa rikurirun sasa uyarikuqmi,
ñawinkutapas wichqarunkum mana qawakunankupaq,
upa tukurunkum mana uyarikunankupaq,
chaynapi tukuy sonqonkuwan mana entiendenankupaq,
chaynapi mana kutirikamuwanankupaq,
chaynapi mana sanoyachinaypaq”.
28Chaynata Pablo rimaruspanmi nirqa:
Kunanmantaqa yachaychikyá, Diospa salvacionninqa mana judío kaqkunamanpas willasqañam kanqa, paykunam ichaqa uyarinqaku, nispa.
29 # 28.29 Kay textoqa ñawpaq manuscritokunapiqa manam kanchu. [Pablo kaynata niruptinmi judiokuna pasakurqaku kikinkupura llumpayta atipanakustin].
30Pablom chay arriendasqan wasipi iskay wata yacharqa, hinaspam lliw watukuqninkunata chaskirqa. 31Mana manchakuspanmi Diospa munaychakuyninmanta willakuq, pipapas mana harkakusqanmi Señor Jesucristomanta yachachiq.
Currently Selected:
Hechos 28: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012