Proverbios 31
31
Rey Lemuelpa rimarisqankunamanta
1Massá lawpi rey Lemuelpa rimarisqankuna; kay rimariykunawanmi Lemuelta maman yachachirqa:
2Wawalláy, wachakusqalláy,
Tayta Diosta mañakuptiy qowasqan wawalláy,
¿imatawanraqtaq nikiman?
3Ama warmikunapi kallpaykita tukuychu,
chayna warmikunaqa reykunatam tuñichinku.
4Lemuel,
manam allinchu reykunapa vino tomayninqa
manam allinchu kamachikuqkunapa aqa upyayninqa;
5yanqañataqmi kamachikuyta qonqaruspa
wakchakunapa derechonta qewirunmanku.
6Vinoqa llakisqa sonqoyuqkunapaqmi,
aqapas piñakuypa huntasqan sonqoyuqkunapaqmi;
7Paykunayá chayta upyaspa
sasachakuyninkutawan ñakariyninkuta qonqachunku.
8Qamqa mana rimarikuqkunapa rantinpiyá rimariy,
mana pipapas nanachikusqan kaqkunatayá nanachikuy;
9kallpawan rimarispayá justiciata ruway,
wakchakunatawan mana piniyuqkunatayá nanachikuy.
Allin warmiqa alabasqa kananmanta
10Allin warmiqa sasa tarinam,
alhaja rumimantapas aswan valorniyuqmi.
11Chayna warmipiqa qosanpas
tukuy sonqonwanmi confiakun,
manam imanpas pisinqachu.
12Payqa kawsanan punchawkamam
allinllata ruwaspan qosanta kusichinqa.
13Chayna warmiqa
millwatawan linota maskaspanmi
kusikuyllawanña tukuy imata ruwan.
14Payqa negociantepa barcon hinaraqmi
mikuytapas karumantaraq apamun.
15Tutaraq hatarispanmi
wawankunamanwan criadankunaman mikuchin.
16Allinta qawaykuspanmi chakratapas rantin,
hinaspam ganakusqan qollqewan uvasta plantan.
17Weqawninta sumaqta watakuykuspanmi
ganasllawanña llamkan.
18Negocio ruwasqantam allinta nanachikun,
sinchi tutakamam llamkanpas.
19Huknin makinwanmi kallapanta hapiykun
hukninwanñataqmi puchkatilluta tinkan.
20Wakchakunamanwan mana piniyuqkunamanmi imallantapas qoykun.
21Ritimuptinpas ayllunmantaqa manam llakikunchu,
ayllunkunaqa rakta pachayuq kasqanrayku.
22Payqa llikllakunatam awan,
pachankunapas fino telamantam.
23Qosanpas llaqtapa punkunkunapiqa ancha reqsisqam,
llaqtapa ancianonkunawan kuskam tiyanpas.
24Chayna warmiqa pachakunata siraspanmi rantikun,
chumpikunata awaruspanmi negociantekunaman rantikun.
25Kallpawan chaynataq respetasqa kaywanmi pachallikun,
payqa hamuq punchawkunamantapas asikunmi.
26Payqa yachaywanmi imatapas riman,
ancha kuyakuywantaqmi yachachimpas.
27Ayllunkuna imaynam kawsasqantam sumaqta qawan,
mana llamkayninpa chanintaqa manam mikunchu.
28Wawankunapas hatarispankum
¡ancha kusikuyniyuq! nispa sutichanku,
qosanpas alabaspam nin:
29Allin warmikunaqa achkallañam,
qanmi ichaqa llapallanta masyarunki, nispa.
30Kuyayllapaq kaywan buenamoza kayqa tukuruqllam,
Tayta Diosta respetaq warmim ichaqa alabasqa kanqa.
31Tukuy ima ruwasqantayá
lliw runa yachachun,
llaqtapa punkunkunapiyá
ruwayninkunamanta alabachunku.
Currently Selected:
Proverbios 31: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012