Levítico 2
2
Kawsaykunamanta ofrendakuna
1Pipas kawsaykunamanta ofrendata apamuspaqa, fino harinatam apamuwanqa, chaymanñataqmi aceitetawan inciensota tallinqa. 2Chay ofrendataqa Aaronpa miraynin sacerdotekunamanmi apanqa, hinaptinmi sacerdoteñataq chay fino harina ofrendamanta huk aptayta hurqospan altarpi kañanqa. Chay ofrendaqa yuyarinapaq ofrendam hinaspa ñoqapaq miskillaña asnariq kañana ofrendam. 3Chay ofrendamanta puchuqñataqmi Aaronpaqwan mirayninkunapaq kanqa. Chay ofrendaqa kañasqa ofrendakunamanta ñoqallapaqña chuya ofrendam.
4Hornopi ruwasqa ofrendata pipas ofrecewaspanqa, aceiteyuq fino harinamanta ruwasqa tortillakunatawan aceitewan tallisqa galletakunatam apamunqa. Chaykunaqa mana levadurayuqmi kanqa.
5Sartenpi ruwasqa ofrendata pipas ofrecewaspanqa, fino harinamanta aceitewan chapusqa tortillakunatam apamuwanqa, chayqa mana levadurayuqmi kanqa. 6Chayta pakiparuspam hawanman aceiteta tallinki. Chayqa kawsaykunamanta ofrendam.
7Mankapi ruwasqa ofrendata pipas ofrecewaspanqa fino harinamanta aceitewan chapusqa tortillakunatam apamunqa. 8Chayna ofrendata ñoqapaq ruwaruspam, sacerdoteman apanki, payñataqmi altarman apaykunqa. 9Chaypim sacerdote, lliw ofrendamanta asniqta hurqonqa, hinaspam altarpi kañanqa yuyarinapaq ofrenda kasqanrayku. Chayqa ñoqapaq miskillaña asnariq ofrendam. 10Chay ofrendamanta puchuqñataqmi Tayta Diosman ofrecesqa kaspa chuya kasqanrayku Aaronpaqwan mirayninkunapaq kanqa.
11Ñoqa Tayta Diosman kawsaykunamanta ofrendata ofrecewaspaykichikqa amam levadurataqa hinankichikchu, nitaqmi mieltapas kañapuwankichikchu. 12Levaduratawan mieltaqa ofrecewankichik punta cosechaykichikmanta ofrendata hinam. Ichaqa amam miskillaña asnariq ofrendata hinaqa altarpiqa kañankichikchu.
13Kawsaykunamanta llapallan ofrendataqa kachichasqatam apamunki, tukuy ofrenda apamusqaykipiqa amam kachiqa pisinqachu, chay kachiqa Diosnikiwan pacto ruwasqaykim.
14Pipas tarpusqanmanta punta kaq allinnin rurunta ofrecewaspanqa, puntata poqoq kawsaytam hamkasqata hinaspa chamchasqata apamunqa. Chayqa kawsaykunamanta punta kaq allinnin ofrendam. 15Chaypa hawanmanmi aceitetawan inciensota tallinki. Chayqa kawsaykunamanta ofrendam. 16Hinaptinmi sacerdote, aceiteyuq inciensoyuq chamchasqa ofrendata kañanqa. Chayqa Tayta Diospaq kañasqa ofrendam.
Currently Selected:
Levítico 2: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012