Lamentaciones 3
3
Librasqa kanankumanta
1Ñoqam kani Tayta Diospa piñakuyninpi ñakariq runa.
2Paymi mana kanchaypa kanan tutayayninta pusawarqa.
3Sapa kutillam makinwan castigawarqa.
4Aycha qaraytapas paymi machuyarachin,
paytaqmi tulluykunatapas ñutuparun.
5Llakikuytawan ñakariytam
perqata hina muyuriqniypi hatarirachin.
6Ñawpaq watakunapi wañuqta hinam,
tutayaq ukullapi kawsachiwarqa.
7Lloqsiyta mana atinaypaqmi kayninta chayninta wichqaruwarqa,
llasaq cadenakunawanmi ñakarichiwarqa.
8Yanapaykuwananpaq qayakuptiypas,
manam kaqpaqpas hapirqachu.
9Ñanniytapas labrasqa rumikunawanmi wichqarurqa,
risqay ñanniykunatapas huklawmanmi muyurachirqa.
10Ukumari hinam payqa wateqawarqa,
pakakuq león hinam payqa wateqawarqa.
11Ñanniymanta pantarachiwaspam llikiparuwarqa,
paqway mancharisqatam saqeruwarqa.
12Wañurachiwananpaqmi flechanta ñoqa lawman chutariykurqa.
13Flechankuna kacharimusqanmi sonqoyman yaykuruwarqa.
14Llaqtamasiykunapa asipayananñam rikuriruni,
sapa punchaw takipayananñam rikuriruni.
15Tayta Diosmi llakikuywan huntaykuwarqa,
qatqe ajenjowan hinam sinkarachiwarqa.
16Pampaman ñupuruwaspam kiruyta pakiruwarqa,
pampaman wischuykuwaspam allpata akurachiwarqa.
17Sonqoymantam hawkayay karunchakurun,
kusikuy kawsaytapas manañam tariniñachu.
18Chayraykum kaynata nini:
Kallpaypas tukurunñam,
Diospi hapipakuyniypas chinkarunñam, nispay.
19Ñakarisqaytawan sapallay kasqaytam yuyarini,
ajenjo hina qatqe llakikuyniytam yuyarini.
20Chaykunatam sumaqta yuyarini,
hinaspam manaña kallpayuq kachkani.
21Chaywanpas paypim hapipakuni,
chayraykum yuyaymanaspay nini:
22Tayta Diospa kuyapayakuyninraykum mana puchukarunchikchu,
llakipayakuyninqa mana haykapipas tukuqmi.
23Paypa kuyapayakuyninqa sapa tutapaytam musoqlla,
mayna hatunmi cheqap kayninpas, nispa.
24Ñoqam nini:
“Tayta Diosmi tukuy ima kapuwaqniyqa,
Chayrakum payllapi hapipakullasaq” nispay.
25Tayta Diosqa ancha allinmi hapipakuqninkunapaqqa,
ancha allinmi maskaqninkunapaqqa.
26Tayta Dios yanapawananchikpaqqa
upallalla suyaymi aswan allinqa.
27Runapaqqa warma kasqanmantapuni yugo apaymi aswan allin.
28Runata Tayta Dios kamachiptinqa,
sapallan tiyaspanyá upallalla suyachun.
29Uchuychakuspayá siminta allpakama churachun,
ichapas Tayta Diosqa yanapaykunmanraq.
30Pim laqechuqninman uyanta qochun,
pasaypaq penqayman churasqa kachun.
31Señorqa manam wiñaypaqchu runataqa saqerun.
32Pitapas llakichispanqa paymantam llakipayarikun,
ancha kuyapayakuq kasqanraykum llakipayarikun.
33Payqa manam munanchu runakuna llakichiytaqa,
nitaqmi munanchu runakuna ñakarichiytapas.
34Kay pachapi carcelasqa runakunata
sarutyachkaq hina ñakarichiqtaqa,
35Tukuy imapa hawanpi Diospa qayllanpi
runamasinpa derechon qewiruqtaqa,
36runapa quejanta qewiruqtaqa
Tayta Diosmi llumpayta cheqnin.
37¿Pitaq imatapas rimanman
Señorpuni mana kamachikuptinqa?
38¿Manachu hanaq pachamanta runapa allinninpaq kaqpas
otaq mana allinninpaq kaqpas hamun?
39¿Imanasqataq runa quejakun huchapi kawsachkaspaqa?
40Imaynam kawsasqanchiktayá allinta qawarikusun,
huktawanyá Tayta Diosman kutirikusun.
41Hanaq pachapi Diosman sonqonchikta kicharisun,
makinchiktapas haywarispa kaynata nisun:
42Ñoqaykum contraykipi huchallikuruniku,
chayraykum mana pampachawarqankikuchu.
43Anchata piñakuspaykim qatikachawarqankiku,
mana llakipayarispam wañuchiwarqankiku.
44Mañakusqaykuta mana uyarinaykipaqmi,
puyukunawan harkarachikurqanki.
45Llapallan runakunapa qayllanpim
penqaypaq millakuypaqta ruwaruwarqankiku.
46Llapallan enemigoykum contraykupi rimarqaku.
47Mancharikuypaq trampakunam,
ñakariywan llakikuymi,
hawaykuman chayaramurqa.
48Kuyasqay llaqtay tuñisqa kaptinmi,
weqeykunapas mayu hinaraq kallparichkan.
49Mana taniytam weqellaykuna sutuchkan,
manañam hawkayaypas kanñachu,
50hanaq pachamanta Tayta Dios qawarimunankama.
51Llaqtaypi warmikuna ñakarisqankuta qawaspaymi
ñawiykunapas nanay-nanay kanankama waqachkani.
52Alton pawaq animalta hinam
enemigoykuna yanqamanta hapiruwarqaku,
53kawsachkaqllatam pozoman wischuykuwarqaku,
hinaspam rumiwan taparuwarqaku.
54Yakupas umaykamam pampaykuwarqa,
chaymi nirqani: “Wañukusaqñachá”, nispay.
55Dios Taytalláy, pozo ukumantam sutikita qayakamullarqani,
56qanmi uyariykullawarqanki,
mañakusqaytam chaskiykullawarqanki,
57qayakamusqay punchawpim asuykamuwaspayki:
“Ama manchakuychu” niykullawarqanki.
58Señorlláy, qanmi nanaykachikuwarqanki,
vidallaytam libraykuwarqanki.
59Dios Taytalláy, ñakarisqaytam rikurqanki,
yanapaykuwaspayki allin arreglota ruwaykullaway.
60Qanmi vengakuy munawasqankuta rikurqanki,
contraypi tanteasqankutapas yachankim.
61Dios Taytalláy, kamiwasqankutam uyarirqanki,
contraypi mana allinkuna tanteasqankutam uyarirqanki.
62Ñataq-ñataq contraypi rimasqankutam uyarirqanki,
enemigoykuna contraypi kasqantam qawarqanki.
63Tukuy ruwasqankupi burlakuwasqankuta qawariy,
takita takisparaq asipayawasqankuta qawariy.
64Dios Taytalláy,
imam ruwasqankuman hina paykunaman pagaykapuy.
65Paykunapa sonqonkuta rumiyarachiy,
paykunaman ñakayniki pasaypaqta chayachun.
66Dios Taytalláy,
paykunatayá piñakuspayki qatikachay,
qayllaykimanta kay pachapi chinkarachiy.
Currently Selected:
Lamentaciones 3: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012