Juan 19
19
1Chaynata niptinkum Jesusta Pilato azoterqa. 2Soldadokunañataqmi kichkamanta coronata simparuspanku Jesuspa umanman churarqaku, hinachirqakutaqmi puka grosella capawanpas. 3Asuykuspankum nirqaku:
¡Kawsachun Judiokunapa reynin!
Chaynata nispankum uyanpi laqechurqaku.
4Pilatom musoqmanta lloqsimuspan nirqa:
Jesustam hurqomuchkani, yachaychikyá, paypiqa manam imatapas tarinichu sentencianaypaq hinaqa, nispa.
5Jesusmi hawaman lloqsimurqa kichkamanta coronayuq hinaspa puka grosella capawan churasqa. Chaymi Pilato nirqa:
¡Kayqaya kay runaqa! nispan.
6Sacerdotekunapa jefenkunañataqmi guardiakunapiwan Jesusta rikuykuspanku qaparirqaku:
¡Chakatay, chakatay! nispanku.
Pilatoñataqmi nirqa:
¡Qamkunayá chakatamuychik! Paypiqa manam imatapas tarinichu sentencianaypaq hinaqa, nispa.
7Judiokunañataqmi nirqaku:
Kanmi ñoqaykupa leyniyku, chayman hinaqa wañunanmi yachakun “Diospa Churinmi kani” nisqanrayku, nispanku.
8Chay nisqankuta uyariruspanmi Pilatoqa astawanraq mancharikurqa. 9Palacioman kutichispanmi Jesusta tapurqa:
¿Maymantataq kanki? nispan.
Jesusñataqmi mana imatapas rimarirqachu. 10Chaymi Pilato nirqa:
¿Manachu imatapas ninki? ¿Manachum yachanki kacharinaypaq otaq chakatanaypaqpas atiyniyuq kasqayta? nispan.
11Jesusñataqmi nirqa:
Sichum atiyta Dios mana qosuptikiqa manam imanawankimanchu. Chaynaqa, qampa makikiman ñoqata churamuqmi qanmantapas aswan huchayuqqa, nispa.
12Chayta uyariruspanmi Pilatoqa aswanraq munarqa kachaykuyta, chaymi judiokunañataq astawanraq qaparirqaku:
Payta kachaykuspaqa manam rey Cesarpa amistadninchu kanki. Pipas reypaq hapikuqqa rey Cesarpa enemigonmi, nispanku.
13Chaynata niptinkum Jesusta hawaman pusachimuspan sentencianan cortepi Pilato tiyaykurqa. Chay sitiopa sutinmi karqa Empedrado, hebreopiñataq Gábata. 14Pascua fiestapaq huk punchawllaña faltachkaptinmi, yaqa chawpi punchawta judiokunata Pilato nirqa:
Kayqaya reynikichikqa, nispan.
15Paykunañataqmi kaynata qaparirqaku:
¡Wañuchun, wañuchun! ¡Chakatay! nispanku.
Pilatoñataqmi nirqa:
¿Reynikichiktachu chakatarusaq? nispan.
Sacerdotekunapa kamachiqninkunañataqmi nirqaku:
Rey Cesarllam reyniykuqa, manam hukqa kanchu, nispanku.
16Hinaptinmi Pilatoqa paykunaman entregaykurqa Jesusta chakatanankupaq, chaymi Jesusta pasachirqaku.
Jesusta chakatasqankumanta
(Mt 27.32-44. Mr 15.21-32. Lc 23.26-43)
17Jesusmi lloqsirqa cruzninta hombrokuykuspa Calaverawan sutichasqanku sitioman, hebreopi sutinñataqmi Gólgota. 18Chaypim Jesusta chakatarqaku, kaylaw-waklaw waqtankunapipas iskay runakunatam chakatarqaku. 19Pilatom cruzpa umanpi qellqachirqa: “JUDIOKUNAPA REYNIN NAZARETMANTA KAQ JESÚS” niqta. 20Chay letrerotam achkaq judiokuna leerqaku, Jesusta chakatasqanku sitioqa llaqtapa hichpallanpi kasqanrayku. Chay letrerotaqa qellqachirqa kimsa rimaypim: Hebreopi, latinpi hinaspa griegopi. 21Pilatotañataqmi sacerdotekunapa kamachiqninkuna nirqaku:
Ama qellqaychu “judiokunapa Reyninmi” niqtaqa. Qellqaspaqa-qellqachiy: “Judiokunapa Reyninmi kani”, nispa niqta.
22Pilatoñataqmi nirqa:
Qellqasqayqa ñam qellqasqaña, nispa.
23Jesusta chakataruspankum llapa soldadokuna capanta tawa parteman llikirurqaku sapa soldadopaq hukta. Jesuspaqa karqataqmi mana costurayuq tunicanpas, chaynaqa karqa hanaymanta urayman awasqa kasqanrayku. 24#Sal 22.18.Soldadokunam ninakurqaku:
Ama llikispalla sortearusunchik mayqanninchikpaqpas kananpaq, nispanku.
Chaynapim Qellqapa kayna nisqan cumplikurqa:
“Pachaykunatam rakinakurqaku,
pachaypaqmi suertetaraq choqarqaku”, nispa.
Chaynatam soldadokuna ruwarqaku.
25Cruzpa hichpanpim kachkarqa Jesuspa maman, kachkarqataqmi mamanpa ñañanpas, Cleofaspa warmin Mariapas chaynataq Magdala llaqtayuq Mariapas. 26Jesusmi mamantawan kuyasqan discipulonta rikuruspan mamanta nirqa:
Warmi, chayqaya wawayki, nispa.
27Discipulontañataqmi nirqa:
Chayqaya mamayki, nispa.
Chay horamantam Jesuspa mamantaqa discipulonña wasinman pusarqa.
Jesuspa wañukusqanmanta
(Mt 27.45-56. Mr 15.33-41. Lc 23.44-49)
28 #
Sal 69.21. Kaykuna pasakuptinqa Jesusqa yacharqañam tukuy imapas cumplikusqanta, chaymi Qellqapa nisqan cumplikunanpaq nirqa:
Yakunayaruwanmi, nispa.
29Chaypim kachkarqa puyñupi vinagre, chaymi kaspipa puntanman esponjata wataykuspanku chayta vinagreman challpuykuspanku Jesusman haywarqaku. 30Jesusñataqmi vinagreta malliykuspan nirqa:
¡Tukusqañam! nispa.
Hinaspam umanta kumuykachispa espiritunta Taytanman entregaykuspa wañukurqa.
Jesuspa waqtanta soldado tuksirusqanmanta
31Pascua fiestapaq huk punchawllaña faltachkaptin preparakusqankuraykum judiokuna mana munarqakuchu samana punchawpi wañusqakuna cruzpi hinalla kananta, samana punchawqa karqa hatun punchawmi. Chaymi Pilatota mañakurqaku chakatasqakunapa piernanta pakichimunanpaq hinaspa cuerponkuta uraykachimunanpaq. 32Chaymi soldadokuna rispanku pakirqaku hukninpa piernankunata chaynataq iskay kaqpa piernankunatapas. 33Jesusman asuykuspa qawaykuptinkum wañusqaña kachkasqa, chaymi paypa piernankunataqa manaña pakirqakuñachu.
34Chaymi Jesuspa waqtanta huknin soldado lanzawan tuksirurqa, hinaptinmi yawarwan yaku pawaramurqa. 35Tukuy kaykunata rikuqmi chaynata willakun, willakuyninqa cheqapmi; paypas yachanmi cheqap nisqantaqa, chaynapi qamkunapas creenaykichikpaq. 36#Ex 12.46; Nm 9.12; Sal 34.20.Tukuy kaykunaqa pasakurqa Qellqapa “manam pakisqachu tullunqa karqa” nisqan cumplikunanpaqmi.
37 #
Zac 12.10; Ap 1.7. Huklawpipas Qellqaqa nichkantaqmi:
“Paykunaqa tuksirusqankutam rikunqaku”, nispa.
Jesusta pampasqankumanta
38Kaykunapa qepantam Arimatea llaqtayuq José ruegakurqa Pilatota, Jesuspa cuerponta qonanpaq. Joseyqa Jesuspa discipulonmi karqa, ichaqa judiokunata manchakusqanraykum mana musyachikuspalla qatikurqa. Pilato autorizaykuptinmi Joseyqa Jesuspa cuerponta aparqa. 39#Jn 3.1-2.Jesuswan rimananpaq huk kutipi tutallan riq Nicodemopas yaqa pachak libra mirrawan áloes chaqrusqata aparikuspanmi rirqa. 40Joseywan Nicodemom chay miski asnaqwan fino sabanasta chapurqaku hinaspam Jesuspa cuerponta wankururqaku, chaynataqa ruwarqaku wañuqkunata pampanankupaq judiokunapa costumbrenman hinam. 41Jesusta chakatasqanku sitiopim huerta karqa, chaypim manaraq pipapas pampakusqan musoq sepultura karqa. 42Chaypim hichpalla kasqanrayku Jesuspa cuerponta pamparurqaku, chaynataqa ruwarqaku judiokunapa samananku punchaw hichpamusqanraykum.
Currently Selected:
Juan 19: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012