Eclesiastés 2
2
1Sonqoypim nirqani: “Kunanqa munasqayta ruwaspayá kusikusaq”, nispay. Ichaqa chaypas waspiy hinallam kasqa. 2Hinaspaymi yacharurqani asikuyqa mana yuyayniyuqpa ruwaynin kasqanta; kusikuyñataq mana imapaqpas valeq kasqanta.
3Yachayta sonqoyman churaykuspaymi tantearurqani aychayta vinowan kusichiyta, hinaspam upyakuyman qokururqani, kay pachapi pisi kawsayninpi llapa runa tukuy ima ruwasqanmanta imatam hurqosqankuta yachanaypaq.
4Hatun kaqkunatam ruwarqani,
palaciokunatam ruwakurqani,
uvaskunatam plantakurqani.
5Chakrakunatawan huertakunatam ruwakurqani,
chaypim tukuy rikchaq frutakunata plantarqani.
6Plantasqay sachakunata parqonaypaqmi
pozokunata yakupaq ruwakurqani.
7Criadokunata criadakunatam rantirqani,
karqam wasiypi naceq criadoykunapas.
Ñoqamanta ñawpaqta Jerusalenpi yachaqkunamantaqa,
vacaykunawan ovejaykunapas achkallañam kapuwarqa.
8 # 1 R 10.23-27; 2 Cr 9.22-27. Qorita qollqetam montokururqani,
llapa reykunapa huklaw llaqtakunapa kapuqninkunatam huñukururqani.
Takiqkunatapas qarikunata warmikunatam huñururqani,
tukuy rikchaq tocanakunatam ruwakururqani,
runakuna aychanta kusichinanpaq ruwasqanta hina ruwaspaymi
ñoqapas kusikurqani,
warmiykunapas achkallañam karqa.
9Ancha reqsisqam rikurirurqani,
ñoqamanta ñawpaqta Jerusalenpi kaqkunamantapas
aswan kapuqniyuqmi rikurirurqani,
chaywanpas ancha yachayniyuqmi karqani.
10Tukuy ima munasqayta ruwaspaymi
aychayta tukuy imawan kusichirqani,
chaykuna ruwasqaywanmi sonqoy kusikurqa,
chay kusikuymi llamkasqaypa pagon karqa.
11Chaymantam tukuy ima ruwasqayta qawarirqani,
pisipaywan llamkasqaytam qawarirqani,
hinaspam yuyaymanarqani
chaykunaqa tukuruqlla kasqanta,
runata ñakarichispa chinkaruqlla kasqanta.
12Chaymantam yuyaymanarqani
yachayniyuq kaymanta, mana yachayniyuq kaymanta hinaspa
mana tanteoyuq kaymanta.
¿Imataraqtaq qepay hamuq rey ruwanman?
Manam imatapas ruwanqachu,
aswanqa ruwasqa kaqkunallatam.
13Kaytam rikurqani:
Imaynam achkiypas tutayaymantaqa aswan allin,
chaynam yachayniyuq kaypas mana yachayniyuq kaymantaqa aswan allin.
14Yachayniyuq runaqa ñawintam allinta kicharin,
mana yachayniyuqmi ichaqa tutayaypi purin.
Ichaqa iskayninkutam hina chaynallata imapas pasanqa.
15Chaymi sonqoypi nirqani:
“Mana yachayniyuqta pasasqanchá ñoqatapas pasaruwanqa,
chaynaqa ¿imapaqtaq allin yachayniyuq kayniypas?” nispay.
Chaypas yanqapaqmi.
16Yachayniyuqtapas mana yachayniyuqtapas
lliwmi qonqarunqaku;
tiempopa risqanman hinam imapas qonqasqa,
yachayniyuqpas mana yachayniyuqpas chaynallam wañunqaku.
17Chayraykum kawsayniytapas cheqnirurqani, kay pachapi tukuy ima ruwaypas amiruypaqña kasqanrayku. Tukuy imapas huk qawaykuyllam, waspiy hinallam. 18Kay pachapi tukuy ima ruwasqaykunatapas cheqnipakururqanim, qepay hamuqman saqenayta yuyaymanarispay. 19¿Pitaq yachan qepay hamuqqa yachayniyuq otaq mana yachayniyuqpas kanayta? Ichaqa paymi, kay pachapi yachayniyta tukuspa ñakariywan tukuy ima llamkasqaypi munaychakunqa. ¡Chaypas yanqallapaqmi!
20Chaymi kay pachapi tukuy ima ruwasqayta qawarispa, pisipaywan llamkasqaymanta ñakakurqani. 21Runaqa yachaywan, yuyaywan, sumaqta tanteaspa ruwasqantam, mana imallapipas yanapaykuqninman saqeykunqa. ¡Chaypas yanqallapaqmi!
22¿Imatataq runa hurqokun kay pachapi tutatapas punchawcharispa ñakariywan llamkasqanmanta? 23Runapa kawsakuyninqa nanaypa ñakariypa huntasqanmi, tutapas yuyaymanarispanmi mana puñuyta tarinchu. ¡Chaypas yanqallapaqmi!
24Runapaqqa allinqa kanman mikukuspa tomakuspa llamkayninpa rurunwan kusikuymi. Tukuy kaykunaqa Diosmantam hamun. 25Mana Dioswanqa ¿pitaq mikunman hinaspa kusikunman? 26Kuyasqan runamanqa Diosmi qon yachayta, yuyayniyuq kayta hinaspa kusikuyta. Huchasapa runamanñataqmi qon llamkaspa tukuy ima montosqanta Diospa kuyasqan runaman saqenanpaq. ¡Chaypas yanqapaqmi hinaspa runata ñakarichiqllam!
Currently Selected:
Eclesiastés 2: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012