Wɩlʋʋ KAJALAƔ TƆM
KAJALAƔ TƆM
Grɛɛsɩ ñɩma kʋnʋŋ taa lɛ, fransɩɩ tɔm piye «apocalypse» tɔbʋʋ lɛ se, mbʋ́ palɩzɩɣ nɛ pawɩlɩ ɛyáa yɔ. Mbʋ́ ɛyáa ɩɩnaɣ yaa paasɩŋ yɔ, ḿbʋ́ palɩzɩɣ nɛ pawɩlɩ-wɛ.
Weyi ɛma Wɩlʋʋ Takayaɣ yɔ, paa pɩɩla ɛzɩma yɔ, Yesu kɔma, ɛɖɛɛ nɛ pɩla waasɩ nɩɩlɛ nɛ pʋcɔ ɛma-kɛ. Alɩwaatʋ ńdʋ́ tɩ-taa Room ñɩma wiyaʋ caɣaɣ se poluŋ ɛ-tɛɛ ɛzɩ poluŋuu Ɛsɔ tɛɛ yɔ. Krɩstʋ ñɩma nabɛyɛ lakaɣ kʋñɔŋ pe-lidaʋ yɔɔ. Ɛlɛ́, pa-taa nabɛyɛ taawɛnɩ abalʋtʋ se petisi nɛ pala kʋñɔŋ ḿbʋ́.
Wɩlʋʋ Takayaɣ taa, potuki aduwa nɛ pɛkɛdɩɣ tɔm nɛ tɔm lɛɛtʋ. Tɔm kɛdʋʋ nɛ aduwa ana, a-taa sakɩyɛ lɩnɩ Nɔɔ Haʋ Kɩbɩm Takayaɣ taa. Kalɩtʋ pee nɛ matɩm ndɩ ndɩ mbʋ́ pɔyɔɔdʋʋ pʋ-tɔm takayaɣ kanɛ ka-taa yɔ, piheyiɣ-ɖʋ tɔm sɔsɔtʋ natʋyʋ. Yee ɖɩkpaɣ ɛzɩ kalɩtʋ piye 7 ñɩŋɖɛ yɔ, ɖɩwɩlɩɣ mbʋ́ pɩtɛma, yaa mbʋ́ pʋwɛ pi-ɖeɖe kiya yɔ. Kalɩtʋ piye 6 ñɩŋɖɛ ñawɩlɩɣ mbʋ́ pikizi tɛm yɔ. Mbʋ́ pʋhʋlʋmaa yɔ, pɩwɩlɩɣ wabɩyɛ. Mbʋ́ pɩsɛwa yɔ, pʋbʋ ñawɩlɩɣ helu helu lakasɩ. Anjaʋnaa sakɩyɛ tasɩ wɛʋ takayaɣ kanɛ ka-taa. Teŋgu kɛ lone nɖɩ́ ɖɩ-taa aleewaa tɩŋa kpeɣlaa yɔ. Coojo kɛ kɩwɛɛkɩm anjaʋ, nɛ kpɩna ñɛwɛɛ coojo tɛɛ. Ɛsɔtɔm takayaɣ taa lɛ, pɔyɔɔdʋʋ Babilooni tɔm nɛ pɔtɔŋ se pɩkɛ tɛtʋ ndʋ́ tɩ-taa kewiyaɣ fɛyɩ ɖeu yɔ. Cɩnɛ lɛ, Room ñɩma tɛtʋ sɔsɔtʋ ndʋ́ payaɣ-tʋ ɖɔɖɔ se Room yɔ, tɩ-tɔm pɔyɔɔdʋʋ.
Wɩlʋʋ Takayaɣ ŋgá Yohanɛɛsɩ mawa yɔ, ka-kajalaɣ hɔɔlʋʋ taa (1.1-3.22), ɖɩnaɣ takayɩsɩ lʋbɛ nzɩ́ pama-sɩ nɛ petiyini Krɩstʋ aŋgba lʋbɛ yɔ. Krɩstʋ aŋgba ana, aawɛ Azii hɔɔlʋʋ taa, Room ñɩma egeetiye nɖɩ́ ɖɩpɩsɩ sɔnɔ Turkii ɛjaɖɛ yɔ ɖɩ-taa. Krɩstʋ aŋgba lʋbɛ ana, ana pama Wɩlʋʋ Takayaɣ ŋ́gá (1.4, 11). Takayaɣ mayʋ tɩŋnɩ aŋgba lʋbɛ ana a-yɔɔ se ɛyɔɔdɩnɩ kedeŋa kpeekpe yɔɔ Krɩstʋ aŋgba tɩŋa.
Takayaɣ hɔɔlʋʋ naalɛ ñɩŋgʋ taa lɛ (4.20), mayʋ kpa ɛsɔdaa. Peeɖe ɛwɛɛ nɛ ɛnaɣ wondu ndʋ́ tɩlakɩ piti yɔ nɛ ɛkɛdɩɣ-ɖʋ tɩ-tɔm. Kpaɣnɩ ñʋʋ naanza ñɩŋgʋ nɛ ŋsɩɩnɩ hiu nɛ kʋɖʋmʋʋ ñɩŋgʋ taa, ɛcalɩɣ-ɖʋ wɩlʋʋ ɛzɩma Yesu Krɩstʋ sɩŋnɩ-ɖʋ se ɖɩkalɩ Nɔɔ Haʋ Kɩbɩm Takayaɣ nɛ ɖɩnɩɩ ka-taa tɔm yɔ. Ɛyɔɔdʋʋ ɖɔɖɔ se kedeŋa kpeekpe yɔɔ ɛyáa tɩŋa pʋwɛɛ se patɩlɩ Yesu Krɩstʋ Laŋhɛzɩyɛ Tɔm. Kpaɣnɩ ñʋʋ 12 ñɩŋgʋ nɛ ŋsɩɩnɩ 20 ñɩŋgʋ taa lɛ, ɛyɔɔdʋʋ you sɔsɔʋ ŋgʋ́ poyo eleeu yɔ, kʋ-tɔm. Yesu weyi ɛ nɛ ɛ-ɛsɛ yɔ, ɛlɩɣ nɛ ɛwɛɛ ɛzɩ heɣa yɔ. Ɛsɔ heɣa ŋ́gá, kala ka-tɩ ɛzɩ pʋtɔdɩyɛ heɣa yɔ, Kawaba pɩtɩŋa.
Ñʋŋ 21 nɛ 22 ñɩŋ yɔɔdʋʋ ɛjaɖɛ kɩfaɖɛ nɖɩ́ Ɛsɔ kaɣ-ɖɩ lɩzʋʋ yɔ ɖɩ-tɔm. Ɛjaɖɛ ńɖɩ́, pakaɣ naʋ ɖɩ-taa tɛtʋ ndʋ́ payaɣ-tʋ se Yeruusalɛm yɔ, tɩlɩnɩ ɛsɔdaa nɛ titiki ɛzɩ Ɛsɔ kʋjɔʋ yɔ. Ñʋŋ ɩnɛ, ɩ-naalɛ ɩtɛzɩɣnɩ Wɩlʋʋ Takayaɣ. Ɩnɩ tɛzɩɣnɩ ɖɔɖɔ Ɛsɔtɔm takayaɣ tɩŋa. Ɖɩnaɣ ñʋŋ ɩnɛ ɩ-taa ɖɔɖɔ Ɛsɔtɔm takayaɣ kajalaɣ hɔɔlʋʋ taa tɔm natʋyʋ. Kiɖe tɛɛ Tɔm Takayaɣ ñʋʋ 3.24 taa, pamawa se Kerubin ñɩma ɖɩɣ nʋmɔʋ ŋgʋ́ kiwoki wezuu tɩʋ cɔlɔ yɔ. Wɩlʋʋ Takayaɣ ñʋʋ 22.2 taa lɛ, ɖɩkalɩɣ se tɩʋ ŋgʋ́ kɩhaɣ wezuu yɔ, kɩwɛ tɛtʋ kadaɣ sɔsɔɔ hɛkʋ taa. Kɩ-hatʋ pakaɣ kpaɣʋ nɛ pawazɩna ɛyáa tɩŋa pa-kʋdɔmɩŋ.
Pama Wɩlʋʋ Takayaɣ kaɖɛ alɩwaatʋ yɔɔ. Kaɖɛ alɩwaatʋ ńdʋ́ tɩ-taa lɛ, eleeu kɩlɩ pɩtɩŋa ɖoŋ. Wɩlʋʋ Takayaɣ heyiɣ Krɩstʋ ñɩma se palʋbɩnɩ eleeu, nɛ paɖaŋ Ɛsɔ wabɩyɛ kpaagbaa ñɩnɖɛ.
Currently Selected:
Wɩlʋʋ KAJALAƔ TƆM: KABI
Highlight
Share
Copy
Want to have your highlights saved across all your devices? Sign up or sign in