Wɩlʋʋ 2
2
Pama takayaɣ Efɛɛzɩ Krɩstʋ ŋgbɛyɛ taa ñɩma
1Ɛyʋ ɛnʋ ɛtasɩ-m heyuu se: «Ma Ɛsɔ tiyiyu weyi ɛcɔŋnɩ Efɛɛzɩ Krɩstʋ ŋgbɛyɛ taa ñɩma yɔɔ yɔ takayaɣ nɛ ŋheyi-i se:
‹Weyi ma mɔnɖɔkɩ tɩɩnzɩ ńzɩ́ sɩ-lʋbɛ me-nesi kɩbanzɩ taa nɛ mɔnɖɔŋ sika kanɖʋnaa ḿbá pa-lʋbɛ pɛ-hɛkʋ taa yɔ, mɔntɔŋna se: 2mansɩm mbʋ́ ñɛ-ŋgbɛyɛ taa ñɩma lakɩ yɔ nɛ pa-pana ñaɣʋ nɛ ɛzɩma mbʋ́ pɔɖɔkʋʋ pa-tɩ yɔ. Manawa se paacaɣ se pa nɛ kañadɩnaa pɛkpɛndɩ. Pamaɣzɩ mbá pɔtɔŋ se pɛkɛ Yesu tiyiyaa yɔ nɛ pana se pɛkɛ cɛtɩyaa. 3Pɔɖɔkɩ pa-tɩ nɛ pala kʋñɔŋ mɔ-yɔɔ nɛ pɩtɛɖɛɛ-wɛ. 4Ɛlɛ́, ndʋ́ man-taa wɛnɩ-wɛ yɔ lɛ se: patatasɩ-m sɔɔlʋʋ ɛzɩ ɖooo paasɔɔlʋʋ-m yɔ. 5Pʋ-yɔɔ lɛ, pɔtɔzɩ ɖenɖe pucoɖi-wɛ yɔ, pɛlɛɣzɩ wɛtʋ nɛ pala mbʋ́ palakaɣ kajalaɣ taa yɔ. Pɩtɛkɛ ḿbʋ́, mɔnkɔŋ pɔ-cɔlɔ nɛ mɛlɛɣ pa-kanɖʋ. 6Piyele mbʋ́ palaba nɛ pʋwɛ ɖeu yɔ lɛ se: paacaɣ mbʋ́ Niikolaa ñɩma lakɩ yɔ kpem ɛzɩ ma ɖɔɖɔ yɔ.
7‹Weyi ɛwɛnɩ nɩŋgbaaŋ lɛ, ɛnɩɩ ndʋ́ Fezuu Kiɖeɖeu heyiɣ Krɩstʋ aŋgba taa ñɩma yɔ!
‹Weyi ɛwakɩ yɔ, mahaɣ-ɩ waɖɛ se ɛtɔɔ tɩʋ ŋgʋ́ kʋwɛ Ɛsɔ kaɖaɣ taa nɛ kɩhaɣ wezuu yɔ ki-pee.› »
Pama takayaɣ Smiirnɩ Krɩstʋ ŋgbɛyɛ taa ñɩma
8Ɛyʋ ɛnʋ ɛtasɩ-m heyuu se: «Ma Ɛsɔ tiyiyu weyi ɛcɔŋnɩ Smiirnɩ Krɩstʋ ŋgbɛyɛ taa ñɩma yɔɔ yɔ takayaɣ nɛ ŋheyi-i se:
‹Weyi ma mɛnkɛ Nʋmɔɖɛyʋ nɛ Ɛɖɩɣyɛ nɛ maasɩba nɛ menfe yɔ, mɔntɔŋna se: 9mana ñɛ-ŋgbɛyɛ taa ñɩma siziŋ nɩʋ nɛ pa-kʋñɔndʋtʋ. Ŋgʋ́, pɛkɛ ñɩm tɩnaa! Manɩ tɔm ɛzaɣ́tʋ ndʋ́ mbá pɛcɛtɩɣ se pɛkɛ Yuda ñɩma yɔ, pɔyɔɔdɩ-wɛ yɔ: pɛkɛ Satanɩ ŋgbɛyɛ taa ñɩma! 10Sɔɔndʋ ɛtaakpa-wɛ nɛ kʋñɔŋ ŋgʋ́ pɔkɔŋ tɔɔʋ yɔ. Nɩɩ se eleeu kɔŋ ñɛ-ŋgbɛyɛ taa ñɩma nabɛyɛ ɖʋʋ salaka se ɛtakɩ-mɩ nɛ ɛna. Ɩkɔŋ nɩʋ siziŋ kɩyakɩŋ hiu. Ɩla mbʋ́ pʋpɔzʋʋ yɔ nɛ pʋkɔɔ pɩsɩɩnɩ mɩ-sɩm wiye nɛ maha-mɩ wezuu hulaɣ.
11‹Weyi ɛwɛnɩ nɩŋgbaaŋ lɛ, ɛnɩɩ ndʋ́ Fezuu Kiɖeɖeu heyiɣ Krɩstʋ aŋgba taa ñɩma yɔ!
‹Weyi ɛwakɩ yɔ, sɩm naalɛ ñɩmbʋ ɛɛnaɣ ɛ-yɔɔ kaʋ.› »
Pama takayaɣ Pɛɛrgam Krɩstʋ ŋgbɛyɛ taa ñɩma
12Ɛyʋ ɛnʋ ɛtasɩ-m heyuu se: «Ma Ɛsɔ tiyiyu weyi ɛcɔŋnɩ Pɛɛrgam Krɩstʋ ŋgbɛyɛ taa ñɩma yɔɔ yɔ takayaɣ nɛ ŋheyi-i se:
‹Weyi ma mɛwɛnɩ sɩɣa ŋgá kɔ-nɔɔ taa cʋlʋtaa nɛ kapɩɣ cenje yɔ, mɔntɔŋna se: 13Mansɩm ɖenɖe ñɛ-ŋgbɛyɛ taa ñɩma wɛɛ yɔ: peeɖe Satanɩ kewiyaɣ kpelaɣ wɛɛ. Pɔɖɔkɩ ma-hɩɖɛ kpam nɛ pɔtɔlɔ lidaʋ ŋgʋ́ pɛwɛnɩ mɔ-yɔɔ yɔ, halɩ pɩkpɛndɩnɩ kɩyakɩŋ weyi ɩ-taa pakʋ ma-aseɣɖe tʋ Antiipaa yɔ. Ɛlakaɣ mbʋ́ ɛɖʋwa yɔ. Đenɖe Satanɩ wɛɛ yɔ, peeɖe pɩtɩŋa payɩ pɩɩlaba ḿbʋ́. 14Ɛlɛ́, man-taa wɛnɩ-wɛ natʋyʋ: pɛ-tɛ ɛyáa nabɛyɛ tisiɣ tɔm ndʋ́ Balaam wɩlaɣ yɔ. Balaam wɩlaɣ Balaakɩ ɛzɩma mbʋ́ ɛɛla nɛ Izrɛɛlɩ ñɩma tɔɔ kɩlaʋ nandʋ nɛ pala acɛyɛ nɛ piyele pɔtɔlɩ Ɛsɔ nʋmɔʋ taa yɔ. 15Đɔɖɔ lɛ, nabɛyɛ wɛɛ nɛ petisiɣ tɔm ndʋ́ Niikolaa ñɩma wɩlɩɣ yɔ ɖɔɖɔ ḿbʋ́. 16Pʋ-yɔɔ lɛ, pɛlɛɣzɩ wɛtʋ. Pɩtɛkɛ ḿbʋ́, mɔnkɔŋ pɛ-tɛ kɩyakɩŋ ɩnɛ ɩ-taa nɛ moyoni-wɛ nɛ sɩɣa ŋgá kalɩɣnɩ mɔ-nɔɔ taa yɔ.
17‹Weyi ɛwɛnɩ nɩŋgbaaŋ lɛ, ɛnɩɩ tɔm ndʋ́ Fezuu Kiɖeɖeu heyiɣ Krɩstʋ aŋgba taa ñɩma yɔ!
‹Weyi ɛwakɩ yɔ, mahaɣ-ɩ tɔɔnaɣ ŋgá kalɩɣnɩ ɛsɔdaa nɛ payaɣ-kɛ se maanɩ yɔ. Mahaɣ-ɩ ɖɔɖɔ pɩyɛ kʋhʋlʋmɩyɛ. Pama ɖɩ-yɔɔ hɩɖɛ kɩfaɖɛ, nɔɔyʋ tasɩm-ɖɩ nɛ pɩtasɩnɩ weyi pɛcɛlɩɣ-ɩ-ɖɩ yɔ.› »
Pama takayaɣ Tiyaatiiri Krɩstʋ ŋgbɛyɛ taa ñɩma
18Ɛyʋ ɛnʋ ɛtasɩ-m heyuu se: «Ma Ɛsɔ tiyiyu weyi ɛcɔŋnɩ Tiyaatiiri Krɩstʋ ŋgbɛyɛ taa ñɩma yɔɔ yɔ takayaɣ nɛ ŋheyi-i se:
‹Ma Ɛsɔ Pɩyalʋ, weyi ma mɛ-ɛsɛ ɖeɣ miŋ pelu pelu ɛzɩ miŋ nzʋlʋmɩyɛ nɛ ma-naŋgbanzɩ wɛɛ ɛzɩ ñɩ́ɣ́yʋ́ʋ kazɩnzɩŋa ñɩŋgʋ yɔ, mɔntɔŋna se: 19mansɩm mbʋ́ ñɛ-ŋgbɛyɛ taa ñɩma lakɩ yɔ, nɛ ɛzɩma mbʋ́ pɛwɛnɩ sɔɔlɩm yɔ, nɛ ɛzɩma mbʋ́ pɛwɛnɩ lidaʋ yɔ, nɛ ɛzɩma mbʋ́ pɔɖɔkʋʋ pa-tɩ yɔ. Mansɩm ɖɔɖɔ se mbʋ́ ɩlakɩ lɛɛlɛɛyɔ yɔ, pɩkɩlɩ ɖooo mbʋ́ ɩlakaɣ yɔ ɖɔʋ. 20Ɛlɛ́, ndʋ́ man-taa wɛnɩ-mɩ yɔ lɛ se: iyeki halʋ weyi payaɣ se Yezaabɛɛlɩ nɛ ɛtɔŋ se ɛkɛ náyʋ yɔ. Ŋgʋ́, ɛwɩlɩɣ nɛ eyiliɣ man-tʋmlaɖaa se pala acɛyɛ nɛ pɔtɔɔ kɩlaʋ nandʋ. 21Maha-ɩ alɩwaatʋ se ɛlɛɣzɩ wɛtʋ, ɛlɛ́, ɛɛcaɣ se eyele ɛ-acɛyɛ lakasɩ. 22Na! Manɖʋʋ-ɩ kʋdɔŋ nɛ ɛnɩɩ siziŋ siŋŋ nɛ pɩkpɛndɩnɩ mbá pa nɛ ɩ palakɩ acɛyɛ yɔ. Yee peyebi pa-lakasɩ ńzɩ́ yɔ, kalɩpiɖeke. 23Mɔnkɔŋ kʋʋ halʋ ɛnʋ e-piya nɛ piyele ma-aŋgba tɩŋa taa ñɩma tɩlɩ se ma lɛ weyi ɛtazɩɣ ɛyáa lɩmaɣza nɛ mbʋ́ pʋwɛ pa-taa yɔ pa-taa. Mɔnkɔŋ hɛyʋʋ paa mɩ-taa weyi mbʋ́ ɛlaba yɔ pʋ-yɔɔ.
24‹Ɛlɛ́, meheyiɣ Tiyaatiiri ñɩma mbá mɩ ɩɩɖɔŋ tɔm ńdʋ́ tɩ-yɔɔ ɛzɩ lɛlaa yɔ nɛ ɩtatazɩ Satanɩ ñɩndʋ ndʋ́ lɛlaa mbá pɔtɔŋ se tɩ-taa wɛ cukaŋ yɔ tɩ-taa yɔ se maatasɩɣ-mɩ sɔzʋʋ sʋʋtʋ natʋyʋ. 25Ɛlɛ́, ɩɖɔkɩ mbʋ́ ɩwɛna yɔ kpam nɛ pʋkɔɔ pɩsɩɩnɩ kɩyakʋ ŋgʋ́ mɔnkɔŋ yɔ. 26-28‹Weyi ɛwakɩ nɛ ɛ́ɖɔ́kɩ ɛ-tɩ man-tʋma taa kpam nɛ pʋkɔɔ pɩtalɩ tɩnaɣ yɔɔ yɔ, mahaɣ-ɩ ɖoŋ se ɛcɔnɩ ajɛya taa ñɩma yɔɔ ɛzɩ man-Caa haʋ-m ɖɔɖɔ yɔ. Eɖiyiɣ-wɛ nɛ ñɩ́ɣ́yʋ́ʋ ɖaʋ nɛ ɛmɩzɩ-wɛ ɛzɩ pɔyɔkʋʋ cʋʋ pɛŋ yɔ. Mɔnkɔŋ-ɩ haʋ ɖɔɖɔ tɩmbalʋʋ.
29‹Weyi ɛwɛnɩ nɩŋgbaaŋ lɛ, ɛnɩɩ tɔm ndʋ́ Fezuu Kiɖeɖeu heyiɣ Krɩstʋ aŋgba taa ñɩma yɔ!› »
Currently Selected:
Wɩlʋʋ 2: KABI
Highlight
Share
Copy
Want to have your highlights saved across all your devices? Sign up or sign in