Ebree KAJALAƔ TƆM
KAJALAƔ TƆM
Paasɩŋ weyi ɛma takayaɣ ŋgá petiyini Ebree ñɩma yɔ. Paasɩŋ ɖɔɖɔ weyi pama-ɩ-kɛ keekee yɔ. Weyi ɛma-kɛ yɔ, ɛkɛ Grɛɛsɩ tʋ, ɛlɛ́ ɛsɩm Nɔɔ Haʋ Kɩbɩm Takayaɣ taa tɔm camɩyɛ. Paa pɩɩla ɛzɩma yɔ, Krɩstʋ ñɩma mbá pɛkɛ Yuda ñɩma yɔ, ḿbá ɛma takayaɣ kanɛ. Krɩstʋ ñɩma ḿbá, pa-kalɩzasɩ kpɛzaa. Pelesi lidaʋ nɛ laŋhʋlʋmɩyɛ nɖɩ́ paawɛnɩ-ɖɩ kajalaɣ taa yɔ. Halɩ nabɛyɛ caɣ se palɩɩ Krɩstʋ ŋgbɛyɛ taa. Takayaɣ kanɛ ka-mayʋ caɣ se ɛɖaɣnɩ-wɛ wɩlʋʋ Ɛsɔtɔm nɛ pɩɖaɣnɩ-wɛ labʋ hʋnʋm.
Krɩstʋ weyi ɛkɛ Ɛsɔ tiyiyu yɔ, ɛ-yɔɔ pɩtɩŋɩɣna nɛ ɛyáa katɩ Ɛsɔ (1.1-2.18). Toovenim lɛ, Krɩstʋ kɛ Ɛsɔ Pɩyalʋ. Ɛkɛ weyi Ɛsɔ kɛnaa yɔ keekee (1.3). Ɛpɩsɩ ɖɔɖɔ ɛyʋ keekee. Ɛsɩbʋ ɛzɩ ɛyʋ sɩkʋʋ yɔ, ɛlɩzɩ kɩdɛkɛdɩm ɖoŋ weyi ɩwɛ ɛyáa yɔɔ yɔ (2.14).
Krɩstʋ yɔɔ lɛ, Krɩstʋ ñɩma pɩzɩɣ pataa Ɛsɔ liu nɛ powolo ɛ-cɔlɔ (3.1-5.10). Pʋwɛɛ se ɖɩnɩɩ se Yesu Krɩstʋ talɩ Ɛsɔ cɔlɔ nɛ Ɛsɔ lɩzɩ-ɩ se ɛkɛ cɔjɔ sɔsɔ. Nɔɔ Haʋ Kɩbɩm Takayaɣ taa lɛ, weyi ɛpɩzɩɣ ewolo Ɛsɔ cɔlɔ kpam kamaɣ taa yɔ, ɛnʋ payaɣ cɔjɔ sɔsɔ. Ɛlaɣ se Ɛsɔ ekpeɣ ɛyáa pa-kɩwɛɛkɩm. Nɔɔnɔɔ lɛ, Yesu Krɩstʋ ɖeke kɛnɩnɩ cɔjɔ sɔsɔ. Nɔɔ Haʋ Kɩfam Takayaɣ taa lɛ, takayaɣ ŋgá pama Ebree ñɩma yɔ, ke-ɖeke ka-taa pɔyɔɔdɩ tɔm tʋnɛ.
Weyi ɛma takayaɣ kanɛ yɔ, ɛlɩzɩ tɔm ndʋ́ ɛyɔɔdaa se Yesu kɛ Krɩstʋ ñɩma cɔjɔ sɔsɔ yɔ, tɩ-tɔbʋʋ kpayɩ kpayɩ (5.11-10.31). Ɛlɛ́ cɩnɛ lɛ, Yesu fɛyɩ ɛzɩ Yuda ñɩma cɔjɔnaa sɔsaa yɔ: ɛwɛ ndɩ.
Nɔɔ Haʋ Kɩbɩm Takayaɣ taa tɔm natʋyʋ pɩzɩɣ tɩsɩnɩ-ɖʋ nɛ ɖɩlɩzɩ tɔm tʋnɛ tɩ-tɔbʋʋ. Tɔm ńdʋ́, ɖɩnaɣ-tʋ Kiɖe Tɛɛ Tɔm Takayaɣ 14.17-20 taa. Hɔɔlʋʋ ŋgʋ́ kɩ-taa Abraham nɛ Saalɛm wiyaʋ weyi payaɣ-ɩ se Mɛlkɩsedɛɛkɩ yɔ pakataa yɔ, kɩ-taa tɔm pɩzɩɣna tɩsɩnɩ-ɖʋ nɛ ɖɩnɩɩ mbʋ́ pʋyɔɔ payaɣ Yesu se Krɩstʋ ñɩma cɔjɔ sɔsɔ yɔ. Ɛzɩ Mɛlkɩsedɛɛkɩ yɔ, Yesu kɛ cɔjɔ sɔsɔ. Ŋgʋ́ ɛtalɩɩnɩ cɔjɔnaa hɔʋ taa. Pɩtɛkɛ ɛyáa paɣtʋ yɔɔ pɔɖɔma nɛ palɩzɩ-ɩ se ɛkɛ cɔjɔ. Cɔjɔnaa ɖɔwa. Pasɩkɩ ɖɔɖɔ. Yesu Krɩstʋ ñɛkɛ cɔjɔ sɔsɔ tam, nɛ ɛwɛnɩ ɛ-ɛsɛ tam. Ɛkpa ɛsɔdaa Ɛsɔ cɔlɔ. Peeɖe ɛkaɣ-ɖʋ wonaʋ.
Kajalaɣ Nɔɔ Haʋ taa lɛ, cɔjɔnaa kpɛyaɣ tam tam se Ɛsɔ ekpeɣ-wɛ pa-kɩwɛɛkɩm. Pʋyɔɔ lɛ, palawaɣ kpɩna. Ŋgʋ́ Krɩstʋ ñala ɛ-tɩ tam kʋɖʋmʋm kpaagbaa se ɖihiɣ ñʋʋ yabʋ tam. Krɩstʋ ñɩma tɩŋɩɣ nʋmɔʋ kɩfalʋʋ nɔɔnɔɔ. Pɩfɛyɩ se papɩsɩnɩ wayɩ.
Pʋwɛɛ se Ɛsɔ yɔɔ lidaʋ tayaa ɛwɛnɩ lidaʋ ŋgʋ́ pɔ-cɔzɔnaa kaawɛna yɔ. Lidaʋ ŋ́gʋ́ kɩhaɣnɩ-wɛ ɖoŋ nɛ pawa tɩlasɩ nzɩ́ panaɣ sɔnɔ pe-wezuu caɣʋ taa yɔ (11.1-12.13). Kpaɣnɩ 12.14 taa lɛ, takayaɣ kɛdɩɣ ɛzɩma pʋwɛɛ se Krɩstʋ ñɩma nɛ Ɛsɔ pɛwɛɛ yɔ pʋ-tɔm. Hɔɔlʋʋ kʋnɛ, kɩ-taa tɔm yɔɔdʋʋ ɖɔɖɔ ɛzɩma pʋwɛɛ se Krɩstʋ ñɩma nɛ ɛyáa lɛlaa pɛwɛɛ nɛ paɖʋ ɛgbaɣdɩyɛ kɩbanɖɛ yɔ, pʋ-tɔm.
Currently Selected:
Ebree KAJALAƔ TƆM: KABI
Highlight
Share
Copy
Want to have your highlights saved across all your devices? Sign up or sign in