Mika 1
1
1Paciindi ca bwaami bwakwe Jotamu, Aasi abwakwe Esekiya bamaami ba bene Juda. Mwaami Lesa wakaamba maswi aya kuli Mika uyo wakalinga kundabala ya Molesheti. Pabene Samaliya abene Jelusalemu, Mwaami Lesa wakayubulula shintu ishi mucili anga nciloto.#2 Baami 15:32-38; 2 Maka 27:1-7; 2 Baami 16:1-20; 2 Maka 28:1-27; 2 Baami 18:1—20:21; 2 Maka 29:1—32:33
Kulila pabene Samaliya abene Jelusalemu
2Amunyumfwe cikani ici mwebo nobamumishobo yoonse.
Kutika ocishi ca panshi abaabo boonse bekalaamo.
Mwaami Lesa Shinkusu shoonse utoomushinina.
Ncakwiila utoomupa mulandu kuswa muŊanda yakwe isalalite.
3Amubone, Mwaami Lesa utoosa kuswa kumusena wakwe usalalite.
Utoosa pacishi ca panshi akweenda peculu patulundu.
4Tulundu tutoosunguluka bweenka bucita bukato kumulilo.
Tutoopuumukila mushinyika
anga ngamaanshi atookunka kuswa pakalundu.
5Shoonse ishi shitoocitika ceebo cakubisha kwa bamulunyungu lwakwe Jakobo,
nkokwaamba ayi shibiibi sha bene Isilaeli.
Ino ngani wakalengesha bamulunyungu lwakwe Jakobo kubisha?
Sa te nindabala inene ya Samaliya?
Ino ngani wakalengesha bene Juda kulambila shibumbwabumbwa?
Sa te nindabala inene ya Jelusalemu?
6Paceebo ceeco Mwaami Lesa wakaamba ayi,
“Samaliya iyo ndaakwiisandula kuba matongo,
musena wakulimaamo minyansa.
Mabwe a njiyo ndaakwaasowela mucinyika.
Lwiimbi lwa njiyo lulaakucaalabo patuba.
7Shibumbwabumbwa sha njiyo shoonse shilaakupwayoolwa.
Shipo shipekwa kuŋanda yakulambililaako shilaakutentwa amulilo,
ee, ndaakunyonyoola shikoshanyo shoonse sha balesa ba njiyo.
Ceebo cakwaamba ayi yakalinga kucana shipo kuswa mubufuule,
balwani ba njiyo balaakushitola kubafuule ba mumaanda akulambililaamo kumisena imwi.”
8Lyalo nebo neMika ndakaamba ayi,
“Paceebo nebo ndaakooloma akulila.
Ndaakunooya ceenda myeendobo alimwi matakosha.
Ndaakunookooloma anga ngumwaaba,
akunoolila anga ngumwiina.
9Cilonda ca ndabala inene ya Samaliya tacishilikiki.
Ono cishi ca Juda citooyanda kuba acilonda ca mushobo womwi.
Ncakwiila cashika apamwinjililo wa bantu bangu,
ee, cashika akundabala inene ya Jelusalemu iine.”
Balwani mbobakasena pafwaafwi andabala ya Jelusalemu
10Mutalwiiti balwani besu muGati ayi twakoomwa
alimwi mutaliili kutondesha buumba.
NobamuBeti Ofula amwaalabangane mulusuko.
11Nobene Shafili, kamuya mubusha matakosha alimwi munsoni.
Abo bekala mundabala inene ya Saanani bateeleshi kuswa mundabala iyo.
Bene Beti Eselo batoolila.
Teshi bakamufuneewo, napaceyi.
12Bekala muMaloti batoosalooka mumapensho
pakulindila lucafwo
ceebo Mwaami Lesa waleta mapensho
ayo ashika akumwinjililo wa Jelusalemu.
13Mwebo nomwikala muLakishi
amwaange maaki kushikoci.
Ndimwe mwakatola bene Jelusalemu mucibiibi
ceebo kubisha kwa bene Isilaeli kwakacanika muli ndimwe.
14Ono nobene Juda amupe cipo cakulasha
kundabala ya Molesheti Gati.
Bene Akisibu teshi bakacafwewo
bamaami bene Isilaeli.
15Mwebo nomwikala mundabala ya Malesha
Mwaami Lesa ulaakumuletela uyo weshi akamukoome.
Mwaami wa bene muIsilaeli wabulemu
ulaakuya mukuyuba mucimfwengo ca kuAdulamu.
16Nobene Juda, amukulule mitwi yanu mukulila
ceebo ca bana banu abo mbomusunishi.
Amulikulule minkunyu akuba anga ndikubi
ceebo balaakumushiya akutolwa mubusha.
Currently Selected:
Mika 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.