Judisi 1
1
Nebukadinesa alimwi aAfakisadi
1Mumwaaka wa 12 wa bwaami bakwe Nebukadinesa, mwaami wa cishi ca Asilya, wakalinga kwikala mundabala yakwe inene ya Ninife. Afakisadi wakalinga kulela bene Medesi mundabala ya Ekibatana. 2Mwaami Afakisadi wakayaka lilinga lilampa mamita 30 mundabala ya Ekibatana, lyakali kulampa mamita 22 paanshi. Lilinga ilyo wakayakisha mabwe akubesa akalinga kucite masentimita 260 mubulaafu amasentimita 130 kuya paanshi. 3Paminjililo bakayakaawo maanda alaafu akulwaninaawo akalinga kucite mamita 44, amamita 26 kuya paanshi. 4Minjililo iyo yakalinga kulampa mamita 30, amamita 18 mulifumo, kwaamba ayi bashilumamba bakwe boonse kabaswa kabotu, nabi bashilumamba bashikweenda paanshi mumindando kabaswa kabotu.
5Lyalo munshiku sheenka isho mwaami Nebukadinesa wakabusha nkondo a mwaami Afakisadi mucinyika cinene ca nyinsa ya Lagesi. 6Bantu boonse bakacatana pantu pomwi aAfakisadi, bakalinga kwikala mucishi ca malundu abaabo bakalinga kwikala mwela milonga ya Efuletisi, Tigilisi alimwi aAyidapesi, abaabo bakalinga kwikala mucinyika abo bakalinga kulelwa aAliyoki, mwaami wa bene Elamu. Aboobo mbaanji bakacafwana abene Babiloni.
7Mpomunyaawo Nebukadinesa mwaami wabene Asilya, wakatuma mulomo kubantu boonse bakuPesha abaabo boonse bakalinga kwikala kumbo lya cishi cabo. Wakeeta bantu aba, bakuSilisiya, Damasikasi, Lembanoni, Antilebanoni, abaabo bakalinga kwikala mweela Lweenge Lunene, 8alimwi aku Kamelo, Gilyadi, Galili wa kumatwa abakucinyika cinene ca Jesililu, 9abaabo boonse bakalinga kwikala kuSamaliya akundabala shiwushingulukite, akwitala lya mulonga waJoodani kuya mukushika kuJelusalemu, Betaniya, Kelusi, Kadesi kushikila akumulonga wa Ijipiti. Bamwi mbobakeeta mbaaba, bakuTapanesi, Lamese akucishi caGosheni kwiinda mushishi shaTanisi a Memfisi, 10abamwi boonse bakalinga kwikala kuIjipiti kushikila kunyinsa yaIsopya. 11Sombi bantu bashishi shoonse isho tabakwe kubikila maano kusheesho shakaamba Nebukadinesa, mwaami wabene Asilya, bakakaka kumucafwa kulwana. Tebakalinga kumuloonda kabaamba ayi ulibo eenka. Aboobo beshinkombe bakababoosha maansabo cintu cilensha nsoni.
12Lyalo boonse abo mwaami Nebukadinesa wakabakalalila abuumbi akulumbila ayi pacuuna cakwe ulaakuboosha cishole. Alimwi wakalumbila ayi ulaakubacaya boonse bekala kuSilisiya, Damasikasi, Silya, Moabu, Amoni, Juda alimwi akuIjipiti kushikila mweela Lweenge Lunene aLweenge lyakuPesha.
13Mumwaaka wa 17 wabwaami bwakwe, Nebukadinesa wakatuma bashilumamba kuya mukulwana amwaami Afakisadi, lyalo Afakisadi wakakomwa. Nebukadinesa wakacaya boonse beshilumamba abaabo balwanina pa maaki abeshi shikoci. 14Wakanyaya mandabala akwe Afakisadi, akushika kuEkibatana kuwisha maanda akwe oonse alaamfu. Wakasaala mishika yakwe yoonse, akunyonyweetabo limwi bubotu bwanjiyo. 15Lakwe Afakisadi bakaya mukumucatila kumalundu a Lagesi. Bakamucaya alisumo pakunyonyoola bwaami bwakwe boonse. 16Pesule Nebukadinesa wakasaala nshakalinga kusuniiwo akuboolela kuNinife, lakwe pantu pomwi abashilumamba bakwe abaabo boonse bakamucafwa bakalinga likoto linene lya nkondo. Lyalo bakookesha, kusekelela akulya shakulya pantu pomwi alikoto lya beshilumamba bakwe kwanshiku 120.
Currently Selected:
Judisi 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.