Abakuku 1
1
1Aya ngomaswi Mwaami Lesa ngaakayubulwita Abakuku mulaluki.
Abakuku mbwaakatongooka
2NoBaami baLesa, citooba ciindi cilaamfu buyani kaansenga lucafwo
mwebo cakutankumbulaawo?
Citooba ciindi cilaamfu buyani kaamulilila ayi, “Nshimfulunganya kuno,”
mwebo cakutamfunaako?
3Ceebonshi mulanengesha kubona shintu shitaluleme?
Ceebonshi mulalangilishabo shilubo sha mushobo uyu?
Amubone ndishiitebo pakati ka kunyonyoolwa ashimfulunganya.
Kulwana akupikishanya kulibo kumbasu shangu shoonse.
4Milawo yamana nkusu.
Koombolosha cakutanyengelela kwamana.
Bamucita shibi batoolita masuku pamitwi ya baluleme.
Munshila iyo koombolosha cakutanyengelela kwasendama.
Kukumbula kwa Mwaami Lesa
5Lyalo Mwaami Lesa wakaambila bantu bakwe ayi,
“Kamulangilishabo mishobo imushingulukite
alimwi mulaakukankamana nceshi mukabone.
Ndaakucita cintu munshiku shanu
ico nceshi mukabule kushoma
nabibo muntu umwi akamusansulwite.#Mili 13:41
6Ntoonyamuna bene Babiloni,
ee, bantu balya bakali alimwi batacite nkumbu.
Mbantu abo bamana cishi coonse kweenda
kwaamba ayi bakome misena iteshi yabo.#2 Baami 24:2
7Mbantu baloondwa alimwi bayoosha.
Ncakwiila mbantu abo balipangilabo milawo beene
abwalo bulemu balalipabo beene.
8“Maaki abo alacica kwiinda bashiluwe
alimwi ngakali kwiinda baumpe macolesha.
Maaki abo ankondo alatambala abuumbi. 0
Beshimaaki balaswa kulaale
Balesabo anga ngamakubi atookuluka kwaamba ayi afupule nyama.
9“Makoto abo a bashilumamba alesa ashitaala.
Bantu boonse balaloonda na batoosa cipola.
Bantu mbobacata busha balafulabo anga ngumuseese.
10Balanyansha bamaami
akuseka bacinenenene babo.
Taaku ndabala icite lilinga ndyeenga baalilwa kwiinda.
Balayakabo shitunta shakutantaawo pakulwana sha bulongo
akukoma ndabala iyo icite lilinga.
11Ncakwiila baleenda akuya cakufwambaana anga ngumuuwo.
Bashilumamba aba balabona nkusu shabo anga ngolesa wabo.”
Abakuku mbwaakatongooka alimwi
12NoBaami baLesa kuswa kumatalikilo muli baLesa.
Mwebo ndimwe baLesa bangu Basalalite batafwi.
Mwebo noBaami baLesa ndimwe mwakasala bene Babiloni
kwaamba ayi bese batupeenshe ceebo ca mulandu wesu.
Ncakwiila mwebo noMwaandami wesu mwakababika ayi batwaanishe.
13Meenso anu alisalalite abuumbi cakunoolangabo bubi kabucitika.
Tamukoonshi kusuminisha ayi shitaluleme shinoocitikabo.
Ino ono ceebonshi mutokweebelabo bamucita shibi aba batashomeki?
Ino ceebonshi mulyuumwitebo bamucita shibi
kabanyonyoola cakumaninina bantu baluleme kwiinda mbabo?
14Ceebonshi mwasandula bantu kuba anga ninswi sha mulweenge
nabi anga ntulongolo tutacite muleli?
15Bene Babiloni balaloba bantu andoobo anga ninswi.
Balabacata mutoombe twabo.
Lyalo balabakwelaanya akutalika kusangalala alimwi akukondwa.
16Balalambila atoombe twabo akubenga milambu kuli ntuto
mukwiinga kwiinda mutoombe babila alimwi balalya kabotu.
17Sa bakanoosebensesha mipeeni yabo lyoonse alyoonse
akunyonyoola mishobo ya bantu cakutabanyumfwila nkumbu?
Currently Selected:
Abakuku 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.