Abakuku 2
2
1Nebo neAbakuku ndaakwiimikana anga ngushikulindilila paŋanda ilaamfu yakusompelaawo. Ndaakunoolindila kunyumfwa Mwaami Lesa nsheshi akandwiite ayi ŋambe akukumbula kwakwe pamatongooshi ngooncite.
Mwaami Lesa mbwaakakumbula abakuku
2Mpeeke Mwaami Lesa wakankumbula ayi,
“Lemba maswi aya ngoontookuyubulwita.
Waalembe cakubonekesha pamabwe apampamene
kwaamba ayi muntu woonse akanookuubilwa pakwaabelenga.
3Ee, waaleembe ceebo ciindi ca ngawo tacina kushikila.
Nakubi boobo ciindi ca ngawo citoosa cakufwambaana.
Ncakwiila alaakucitika cancinencine.
Nabi aboneke kucelwa mukucitika, ukaalindilebo
mukwiinga alaakucitika cancinencine alimwi teshi akacelwewo, sobwe.#Ebulu 10:37
4Maswi ngaaya: ‘Uyo eshi akalisumpule ulaakucaikwa.
Sombi uyo ululamikwa ceebo cakushoma, ulaakuba abuumi.’ ”#Loma 1:17; Gala 3:11; Ebulu 10:38; Isa 11:9
Bataluleme mbweshi bakanyonyoolwe
5Waini ulacenjeeka!
Balyabi balalisumpula alimwi tabakalikani.
Tabakuti bweenka musena wa bafu mbootakuti.
Nceceeco ncebakomena mishobo yoonse
akutola busha bantu ba njiyo boonse.
6Kuswawaawo abo batolwa busha balaakuseka baabo babatola ayi,
“Mapensho kuli ndimwe nomubwesa buboni buteshi bwaanu
akulilengesha kubila kwiinda mukukakatisha bantu kulipila nkongole shakubabekesha.
Ino ishi shilaakutola ciindi cilaamfu buyani?”
7Ono cakuteengashila abo mbomwakakongolaako balaakukupolela akusesa.
Balwani banu balaakwisa akumulengesha kututuma.
Balaakusaala shintu shanu shoonse.
8Mwakasaala shintu sha bamumishobo iinji.
Ono abo bakacaalaawo balaakumusaala amwebo
mukwiinga mwakatila bulowa bwa bantu baanji
alimwi mwakanyonyoola shishi shiinji, mandabala aanji pantu pomwi abantu ba mumo.
9Mapensho kuli ndimwe nomubilisha bamumaandaanu munshila italuleme.
Ee, mwebo nomweelesha kulengesha maandaanu kubula cakulisukama amapensho.
10Mwakapinga kunyonyoola bantu ba mishobo iinji,
sombi pakucita boobo mwalensha nsoni bamuŋanda yanu,
ncakwiila mwakaliletela kunyonyooka nobeene.
11Mabwe a kulubumbu alaakunoolila
ayalo mitanti ilaakunoobooshawo kulila kwanu.
12Mapensho kuli ndimwe nomwakaliyakila ndabala kwiinda mukutila bulowa
ee, mwebo nomwakeemika ndabala kwiinda mubucayi.
13Mwaami Lesa Shinkusu shoonse washinisha kwaamba ayi
kusebensa kwa bantu kuli anga ninkuni shakusonselesha mulilo,
ncakwiila bantu ba mishobo yoonse balilemyabo cakubula mpindu.
14Sombi mucishi ca panshi coonse bantu balaakunooswitebo
lushibo lwa bulemu bwa Mwaami Lesa
bweenka lweenge mboluswite maanshi.
15Mapensho kuli ndimwe nomulengesha babyaanu kunwa shikola,
ee, kuli ndimwe nomulengesha babyaanu kutalantanta ayi mubabonene matakosha abo.
16Ono mwebo nweenka mulaakulenshekwa nsoni mumusena wa bulemu.
Ncakwiila mwebo nobeene mulaakukolwa akutalantanta.
Mwaami Lesa ulaakumulengesha kunwa nkomeshi ya bukali bwakwe,
lyalo bulemu bwanu bulaakusandulwa kuba musebaanyo.
17Mwakatimboola shisamu mumusaansa wa kuLebanoni,
ono bulya ndimwe mweshi mukatimboolwe.
Mwakacaya banyama ba kuLebanoni,
ono bulya banyama balaakumuyoosha.
Ishi shilaakucitika ceebo mwakatila bulowa bwa bantu
akucita shalunkutwe kushishi shiinji,
kumandabala akubantu boonse bakalinga kwikalaamo.
18Anu cibumbwabumbwa cilicite mpindunshi?
Sa te ncintubo ico muntu ncaakapanga?
Taaku nceenga muntu wacanaako kulekabo bubeshi.
Ino nimpindunshi uyo wakacipanga njeenga wacanaako mukucinka manungo muli ncico?
Amubone, cibumbwabumbwa ico tacikoonshi kwaamba!
19Mapensho kuli ndimwe nomwaambila cisamu ayi, “Buka!”
Nabi kwaambila libwe litayooyi ayi, “Nyamuka!”
Sa cibumbwabumbwa inga camuyubulwitawo cintu cili coonse?
Cilananikwa silifa agolodi,
sombi tacicite buumi muli ncico.
20Mwaami Lesa uli muŊanda yakwe isalalite
aboobo bantu boonse ba mucishi ca panshi aboomunebo tontolo kunembo lyakwe.
Currently Selected:
Abakuku 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.