Sefaniya 2
2
Mbwaakaambila bantu ayi basanduke kuswa kushibiibi
1Amubungane, amubungane
mwebo nomushobo utacite nsoni
2kacitana kushika ciindi cakasalwa,
kamutana kunyana akufwa anga ndiluba,
kabutana kwisa bukali bwa Mwaami Lesa pali ndimwe.
3Amuyandoole Mwaami Lesa noonse mwebo nobantu babombu ba mucishi,
mwebo nomukonkela milawo yakwe.
Amuyandoole bululami alimwi mulibombye.
Mpashi mulaakutabililwa pabushiku Mwaami Lesa ndyeshi akatondeshe bukali bwakwe.
Kunyonyoolwa kwa mishobo ishingulukite bene Isilaeli
4Ndabala ya Gasa balaakwiishiya,
ayalo ndabala ya Ashikeloni ilaakuba matongo.
Lisuba lyakushika pakati ka mutwi bene Ashidodi balaakutandaanishikwa
ayalo ndabala ya Ekiloni ilaakumwayululwa.
5Mapensho kuli ndimwe nobene Filisiti,
mwebo nomwikala mulombe lwa lweenge.
Maswi a Mwaami Lesa atokwaamba pamapensho ako
webo ocishi ca Kenani ca bene Filisiti.
Maswi ayo aamba ayi, “Ndaakukunyonyoola
alimwi taaku eshi akacaaleewo.”
6Cishi canu mulombe lwa lweenge
cilaakusanduka cikabe musena wa beembeshi
alimwi ashimpati sha mbelele.
7Cishi ico cilaakuba ca bene Juda abo beshi bakacaaleewo.
Balaakunoocana mafulo a mbelele shabo uko.
Macolesha na kwashiya balaakunokoona mumaanda a ndabala ya Ashikeloni.
Mwaami Lesa, Lesa wabo ulaakunoobalama
akubalengesha kuswitilila alimwi.#Isa 14:29-31; Jele 47:1-7; Ese 25:15-17; Jowe 3:4-8; Amo 1:6-8; Seka 9:5-7
8Mwaami Lesa Shinkusu shoonse waamba ayi,
“Ndanyumfwa matushi a bene Moabu,
akunyansha kwa bene Amoni.
Boonse bakalinga kutukana bantu bangu
akwaamba ayi balaakubwesa cishi cabo.
9Bweenka mbocibete lushinisho ayi
Nebo neMwaami Lesa Shinkusu shoonse, Lesa wa bene Isilaeli ndi muumi,
ntooshomesha cakulumbila ayi bene Moabu balaakuba anga mbene Sodoma
abalo bene Amoni balaakuba anga mbene Gomola.
Shishi shabo shilaakuba musena wa nsaku alimwi ashikanda sha mwiinyo,
ee, shilaakuba shishi umo mutekaali bantu kwalyoonse alyoonse.
Bantu bangu beshi bakacaaleewo,
balaakusaala akubwesa shishi shabo.”#Mata 19:24
10Munshila iyo bene Moabu abene Amoni balaakupekwa mulandu
ceebo ca kulisumpula kwabo
pakutukana akuweluluka bantu ba Mwaami Lesa Shinkusu shoonse.
11Mwaami Lesa ulaakubaloondesha
ndyeshi akanyonyoole balesa boonse ba mucishi ca panshi.
Bantu bamumishobo yoonse balaakumulambila,
mushobo womwi awomwi mucishi ca nguwo.#Isa 15:1—16:14; 25:10-12; Jele 48:1-47; Ese 25:8-11; Amo 1:13-15; Jele 49:1-6; Ese 21:28-32; 25:1-7; Amo 1:13-15
12Amwebo nobene Kushi,
mulaakuyaswa kumupeeni wa Mwaami Lesa munkondo.#Isa 18:1-7
13Mwaami Lesa ulaakufungulula lyaansa lyakwe kubantu ba kumatwa
akunyonyoola bene Asilya.
Ulaakulengesha ndabala ya Ninife kuba litongo.
Ncakwiila ilaakuyuma anga nduyanga.
14Shifubwa shoonse shilaakupanga mulela kweenka uko,
kubikaawo anyama sha muluundu.
Abalo bamwiina balaakunookala mumatongo a njiyo.
Balaakunoolila pambwelyo sha maanda.
Bacikwangala balaakunookala kumilyango ya njiyo.
Mitanti ya sida ya maanda a njiyo ilaakucaala patuba.
15Iyi njendabala ilisumpula iyo ikala muluumuno.
Yakalinga kulyaamboosha ayi,
“Ncakwiila taaku ndabala ili mbuli ndime, sobwe.”
Bulya yababo matongo
mwakuyuba banyama ba muluundu!
Abo boonse beendaamo balaakwiiseka
akunooitondeka maansaabo.#Isa 10:5-34; 14:24-27; Naamu 1:1—3:19
Currently Selected:
Sefaniya 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.