Tobiti 14
14
Shaaka shamamanino shakwe Tobiti
1Tobiti ndyaakafwa wakalinga kucite myaaka 112. Lyalo bakamubika mubulemu mucishi ca Ninife. 2Wakalinga kucite shaaka 62 ciindi meenso akwe ndyaakapofola. Ndyaakatalika kulasha, wakaba abubile buunji. Wakalinga kucafwa bantu bapengete akulambila Lesa, taakwe kucileka kulumbaisha bulemu bwakwe.
3Ndyaakalinga pafwaafwi akufwa, wakeeta mwanaakwe Tobyasi akumulwiita ayi, 4“Omwanaangu, bwesa baana bako ucicile kuMediya, pakucana kwaamba ayi ndisuminite maswi akaamba Lesa asha Ninife kwiindila muli Naamu, ncakwiila shilaakucitika. Shoonse nshibakaamba balaluki bakuIsilaeli, bakatumwa aLesa, bakaamba sha Asilya aNinife shilaakucitika cancinencine. Takuuwo maswi eshe akeende palubasu. Ciindi canshisho cakuushikila, shilaakucitika. Cilaakuba cibotu kwikala kuMediya, teeshi kuAsilya nabi kuBabiloni. Ndishi kabotu alimwi ndishinishite ayi shoonse Lesa shakaamba shilaakucitika, ncakwiila shilaakucitika shoonse takuuwo sheshi shikeende palubasu.
“Bantu bene misheesu balaakucatwa boonse kutolwa mubusha, kulaamfu acishi cibotu ici. Lyalo cishi coonse ca Isilaeli cilaakuba luyanga, ndabala sha Samaliya aJelusalemu shilaakunyonyoolwa, paciindi ciniini Ŋanda yakwe Lesa ilaakunyonyoolwa akutentwa. 5Sombi Lesa ulaakubanyumfwila nkumbu bantu bakwe akubaboosha mucishi caIsilaeli. Balo balaakuyaka alimwi Ŋanda yakwe, sombi teeshi ikaboteewo mboyakalinga itaanshi, kushikila ciindi ico cikakwane. Lyalo caakushika ciindi ico, boonse balaakuboola kuswa mubusha, akuyaka Jelusalemu mubulemu. Ciindi ico Ŋanda yakwe Lesa ilaakuyakwa alimwi bweenka mbuli balaluki babeneIsilaeli mbobakaamba.
6“Lyalo mishobo yoonse yapacishi ilaakusandukila kuli Lesa calushinisho, ilaakushiya tulesa twanjiwo twakabalengesha kusoweka ayi banoolambila shabubeshi.
7Lyalo balaakulumbaisha Lesa Walyoonse, pakukonkela lushinisho. Bene Isilaeli boonse beshi bakanooli boomi paciindi ico, balaakushoma Lesa cancinencine, ulaakubabunjika pantu pomwi. Boonse abo balaakushika kuJelusalemu kwaamba ayi bakabwese cishi cakwe Abulaamu, akuya mukwikala kweenka uko mulumuuno lyoonse alyoonse. Boonse basuni Lesa wancinencine balaakusangalala, sombi babiibi abamucita shibi balaakumaninina pacishi ca paanshi.
8“Ono nobanabangu ntoomulasha ayi kamulambila Lesa mulushinisho, akucita shimusangalasha. 9Amwiishe baana banu, kwaamba ayi banoocita shiluleme akucafwa bapengete. Banokwiibaluka Lesa ciindi coonse akulumbaanya Liina lyakwe mulushomo ankusu shabo shoonse.
10Ono webo omwanaangu, swaako kuNinife utakaaliko kuno. Waakumanabo kufukila mubili waba nyoko pafwaafwi anebo ciindi ceenka ico ukasweeko kutonaako. Nebo ndabona kwaamba ayi muno mundabala muliswite shintu shibiibi shilensha nsoni, abalo bantu batoocitabo shibiibi cakubula nsoni. Omwanaangu koyeeya shintu shibiibi nshaakacita Nadabu kuli Aika beeshi bakamulela. Apo ndyaakamukakatisha kwaamba ayi amufukile mucuumbwe kaali muumi. Sombi Lesa wakamubooshesha Nadabu shintu nshaakalinga kusuni kucitila Aika. Lakwe Aika wakabona kubala kwa lisuba, sombi Nadabu wakawiita mumunshinshe utamaani, muceebo wakalinga kusuni kucaya Aika. Ono pakucana kwaamba ayi wakalinga kucafwa bapengete, Aika wakapuluka mukoose kalufu, ako Nadabu nkakamuteya. Nadabu wakacatwa mukoose kakwe akufwita mweenka umo. 11Ono nobanabangu, amubone shintu shibonekela muntu, na kacafwa bantu bapengete. Alimwi amubone shimucitikila muntu mucita shibi, shimukonkela ndufu. Sombi nebo bulya nkusu shangu shamana.” Ndyaakamana kwaamba boobo bakamooneka pabulo bwakwe wafwa akufwa. Wakabikwa cabulemu.
12Abalo banyina ndibakafwa, Tobyasi wakababika pafwaafwi acuumbwe ca beeshi. Ndyaakamana, lakwe amukaakwe abaana, bakacicila kuMediya. Wakaya mukwikala kuEkibatana pantu pomwi aLaguwelo bapongoshi bakwe. 13Wakabalela kabotu bapongoshi bakwe mubucembele bwabo. Abalo ndibakafwa bakababika kuEkibatana kuMediya, akubwesa buboni bwakwe Laguwelo bweenka mbuli buboni bwa beeshi ba Tobiti. 14Tobyasi ndyaakafwa wakalinga abulemu, wakashikisha shaaka 117. 15Kataana kufwa, wakabona kunyonyoolwa kwaandabala ya Ninife alimwi akubona mwaami Sayaselesi waku Mediya kaatola bantu kubusha. Wakabona bene Ninife bakacatwa munkondo kabesaabo kuMediya. Lyalo wakalumba Lesa pali sheesho nshaakacita pa bantu bakuNinife abakuAsilya. Kataana kufwa, wakalinga acoolwe akukondwa pakubona kunyonyoolwa kwa Ninife. Lyalo Tobyasi wakalumba Mwaami Lesa ciindi coonse. Ameni.
Currently Selected:
Tobiti 14: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.