Bene Filipi 2
2
Kuliceesha akusumpulwa kwakwe Klistu
1Na muli kuyuminishikwa muli Klistu, na muli lucafwo mulusuno lwakwe, na muli bwanabwankashi muMushimu Usalashi alimwi kunyumfwilana nkumbu, 2anu ndamusenga ayi munsangalashe abuumbi mukuba bweenka ubo. Amube alunyumfwano, bantu bacite lusuno alimwi bacatene pantu pomwi camoyo amuyeeyo womwi. 3Mutaciti cintu nabi comwi cakulisuna nabi kulisumpula. Sombi muliceeshe, lyoonse kunoobona babyaanu anga balamwiindaawo. 4Woonse muntu ulyeelete kucita shintu shicafwa bamwi, kutaambabo sheesho shicafwa ndimwe nweenka. 5Amube amoyo mbuli wooyo wakalinga kucite Klistu Jesu.
6Lakwe wakalingabo nguLesa lyoonse,
sombi taakwe kuba amuyeeyo wakwaamba ayi eelane aLesa munkusu shakwe mwiine.
7Wakaliceesha camaansa obilo,
akulibika muciimo cabusha
akushalwa mbuli bantu boonse.
8Mubuumi bwa buntu ubo,
wakaliceesha akunoonyumfwila Lesa kushikila palufu lwakwe,
ee, lufu ulo lwa pamucilingano.
9Paceebo ceeco, Lesa wakamusumpula camaansa obilo,
akumupa liina liinda pameena oonse.
10Aboobo ceebo ca bulemu bwa liina lyakwe Jesu,
shoonse shilengwa sha kwiculu, sha pacishi ca panshi
alimwi asheesho shili panshi lya cishi
shilaakufukama kunembo lyakwe.
11Alimwi boonse balaakusumina patuba ayi Jesu Klistu nguMwaami,
mukupa bulemu kuli Lesa Ishiwesu.#Isa 45:23
Bene Klistu babe anga njimimuni
12Ono nomusunikwi, kweelana ambomwalinga kunyumfwila ndindalingaanu, mulyeelete kwaamba ayi mwiindilishe kunoonyumfwila ciindi ici nceentabeteeko uko. Amutolelele kusebensa caboowa akututuma kwaamba ayi mumanishe mulimo wa lupulusho lwanu. 13Mukwiinga Lesa ngoosebensa muli ndimwe ayi muyande akucita shintu kweelana amuyeeyo wakwe.
14Amucite shintu shoonse cakutatongooka alimwi akupikishanya. 15Amube bana bakwe Lesa basalalite, batabishi, batacite mulandu alimwi batacite kampenda. Pakati ka bantu batashomeki, bamucita shibi, mulyeelete kubala mbuli mimuni ili mwiculu,#Duto 32:5 16pakubalwiita maswi abuumi. Na mwacita boobo, ndaakuba asheebo shakunsangalasha ceebo ca ndimwe paBushiku ubo aakuboola Klistu, mukwiinga cilaakutondesha ayi ndakacicila nabi kusebensela ciliiwo.
17Nabi na bulowa bwangu butootilwa anga ncipo ca cakunwa pantu pomwi acipo ico lushomo lwanu ncelutoobenga kuli Lesa, ndasangalala akusekelela pantu pomwi amwebo noonse. 18Aboobo amwebo noonse mulyeelete kusangalala akusekelela pantu pomwi anebo.
Timoti aEpafuloditasi
19Na Mwaami mwiine wayanda, ntooyeeya kufwambaana kutuma Timoti kuli ndimwe kwaamba ayi moyo wangu ukale pakunyumfwa makani atooswa kumishaanu uko. 20Nshiciteewo aumwi muntu ngoonshoma ayi inga wamubikaako maano. 21Mukwiinga bamwi baanji balalisukamabo shintu shakulisangalasha beene kutaamba makani akwe Jesu Klistu. 22Mwebo noonse mulishi kale bubotu bwa milimo yakwe Timoti, mbuli mbondakasebensaakwe anga ngumwaana abaishi pakushimikila Makani Abotu. 23Paceebo ceeco, ntooshoma ayi ntoofwambaana kumutuma, ndaakubona mbweshi shikanyendele shintu. 24Ntooshoma ayi na Mwaami wayanda, anebo ndaakwisa uko coonoono.
25Ono ndayeeya kwaamba ayi inga cacafwa kumubooshesha mukwabesu uyu Epafuloditasi, uyo musebenshima alimwi shilumambama muli Klistu. Lakwe ngumuntu ngomwakatuma ayi ancaafwe. 26Ono wamuyeeya abuumbi noonse alimwi wapenshekwa mumoyo mukwiinga mwakanyumfwa ayi wakalinga mulwashi. 27Ncakwiila wakalinga mulwashi alimwi lwakalingabo lufu, sombi Lesa wakamunyumfwila nkumbu. Kuteshibo lakwe eenka, sombi wakanyumfwila anebo kwaamba ayi nteeliki buumba pabuumba. 28Ntoolangilabo ciindi ndyeshi nkamutume kuli ndimwe, kwaamba ayi amwebo mukasangalale alimwi pakumubona. Lyalo anebo kulisukama kwangu ndyeshi kukaceye. 29Aboobo amumutambule camaansa obilo akusangalala ayi ngumukwabesu muMwaami. Bantu bamushobo wooyu boonse, amubalemeke. 30Wakaboolelabo pakalindi ceebo ca milimo yakwe Klistu. Wakaaba buumi bwakwe kwaamba ayi ancaafwe musheesho nshemwatakalinga kukonsha kuncafwa.
Currently Selected:
Bene Filipi 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.