Mateyo 2
2
Bantu basongo bakaswa kwicwe
1Jesu wakashalilwa mundabala ya Betileemu mucishi ca Judeya, munshiku isho Elodi ndyaakalinga mwaami wa mucishi ico. Ndyaakashalwabo, bantu basongo bakaswa kwicwe bakashika muJelusalemu akwiipusha ayi, 2“Uli kuli mwaana washalwa uyo mwaami wa baJuda? Twabona nyenyeenshi yakwe kwicwe, aboobo twesa mukumulambila.”
3Ndyaakanyumfwa makani aya, mwaami Elodi wakalisukama abuumbi pantu pomwi abantu boonse ba muJelusalemu. 4Mpomunyaawo wakabunganya boonse bamatanjilili ba bapailishi alimwi abafundishi ba Milawo akubeepusha nkwaakalinga kweelete kushalilwa Usalitwe wakwe Lesa.
5Abalo bakamulwiita ayi, “NkuBetileemu mucishi ca Judeya. Kweelana ambwaakalemba mulaluki mukulukulu ayi,
6‘Webo Betileemu wa mucishi ca Judeya,
toobete ndabala iniini pamandabala oonse a muJudeya,
ceebo muli ndiwe mulaakuswa mutanjilili
eshi akeembele bantu bangu bene Isilaeli anga ngumweembeshi.’ ”#Mika 5:2
7Mpomunyaawo Elodi wakabunganya basankwa basongo abo cabushishi, akubeepusha ciindi nyenyeenshi ndiyakaboneka. 8Lyalo wakabatuma kuBetileemu akubaambila ayi, “Kamuya mukamulangoolelangoole mwaana uyu, na mukamucaane mukese mukandwiite kwaamba ayi anebo nkayeeko mukumulambila.”
9Ono ndibakanyumfwa maswi aya, bakanyamuka akunooya. Kucana ayalo nyenyeenshi ilya njebakabona kwicwe ilitanjilite panembo, kushikila yeemikana pamusena pakalinga mwaana. 10Lyalo ndibakabona nyenyeenshi iyo bakasangalala abuumbi. 11Ndibakenjila muŋanda, bakabona mwaana alimwi aMaliya banyina. Mpomunyaawo bakafukama akulambila mwaana. Lyalo bakacalula shoola shabo akupa shipo sha golodi, atumwi tununkila kabotu pakutenta alimwi amafuta anunkila kabotu eetwa ayi mule.
12Lesa wakabacenjesha muciloto mashiku ayi batabooleli kuli Elodi, aboobo bakeenda nshila imwi pakuya kumishaabo.
Jesu mbobakamutola kuIjipiti
13Ono basongo balya ndibakaswaako, munjelo wa Mwaami Lesa wakaboneka kuli Josefu muciloto akumwaambila ayi, “Nyamuka utole mwaana abanyina muye kuIjipiti. Mukekaale kweenka uko kushikila nkamwaambile ayi musweeko, mukwiinga Elodi utooyanda kucaya mwaana.”
14Alakwe Josefu wakanyamuka, watola mwaana abanyina kuIjipiti mashiku. 15Wakekala kuIjipiti kushikila Elodi wafwa. Ici cikani cakacitika kweelana abwaakaamba Mwaami Lesa kwiinda mumulaluki mukulukulu ayi, “Ndakeeta Mwanaangu ayi aswe muIjipiti.”#Osi 11:1
Elodi mbwaakacaisha baana
16Ono Elodi ndyaakabona ayi bamwiinda kumaano bantu balya basongo, wakakalala abuumbi. Lyalo wakatuma bantu ayi baye bakacaye baana basankwa boonse muBetileemu alimwi amumisena yakalinga kushingulukite, abo bakalinga kucite myaaka yobilo kuboola panshi. Wakapima myaaka iyo kweelana aciindi nceyakaboneka nyenyeenshi mbuli mbobakamulwiita basongo.
17Ici cakacitika kweelana abwaakaamba mulaluki mukulukulu Jelemiya ayi,
18“Liswi lyanyumfwika muLama,
kooloma kwa mibila.
Lakelo utoolila bana bakwe,
wakaka akuumushikwa mukwiinga bafwa.”#Jele 31:15
Mbobakaboola kuswa kuIjipiti
19Ono Elodi ndyaakafwa, munjelo wa Mwaami Lesa wakaboneka kuli Josefu kaacili kuIjipiti muciloto, 20akumwaambila ayi, “Nyamuka, ubooshe mwaana abanyina kucishi ca Isilaeli, mukwiinga abo bakalinga kuyanda kucaya mwaana bakafwa.” 21Mpomunyaawo Josefu alakwe wakanyamuka akutola mwaana abanyina mucishi ca Isilaeli.
22Sombi ndyaakalinga kuya munshila, wakanyumfwa ayi Akelosi ngowakekala pacuuna cakwe ishi kuba mwaami mucishi ca Judeya. Paceebo ceeco Josefu wakaloonda kushika, wakaya kuGalili kweelana ambwaakacenjeshekwa alimwi muciloto. 23Lyalo wakaya mukwikala mundabala ya Nasaleti, bweenka mbuli mbobakaamba balaluki bakulukulu ayi, “Ulaakunokwiitwa ayi wakuNasaleti.”#Maako 1:24; Luka 2:29; Joni 1:45
Currently Selected:
Mateyo 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.