Malilo 3
3
Kupekwa Mulandu, Kusanduka Kuswa Kushibiibi Alimwi Akulangila
1Nebo ndi muntu wakabona mapensho
kwiinda mukuumwa amusako wa bukali bwakwe.
2Wakantandaanya akunengesha kweenda mumunshinshe
kuteshi mumumuni.
3Ndushinisho wakanguma lyobilo lyobilo.
Ee, wakanguma cakubula kunyumfwila nkumbu.
4Wakalengesha cikanda amubili wangu kuboneka kucembela,
akuntyoloola mafuwa.
5Wakanshinkila akunshingulusha
mfundilishi alimwi amapensho.
6Wakanengesha kunookala mumunshinshe,
ee, kwikala mumunshinshe anga mbantu bakafwabo kalekale.
7Wakancalila cakwaamba ayi inga nshikoonshi akuloboka,
ncakwiila wakaŋangilila ncetani.
8Nabi njite nabi kulila ayi ancaafwe,
Lesa taankutikiiwo, sobwe.
9Wakashinka nshila yangu alubumbu lwa mabwe,
akunengesha kwiinda nshila ipetookapetooka.
10Bweenka mbuli beya wayubilila muntu,
ee, mbuli nkalamu itoobelamina muntu,
11mbweeke ubo alakwe mbwaakankweelaanya kuswa munshila,
wankwamoona akunshiya cakubula lucafwo.
12Wakabwesa buta amifwi yakwe
akunengesha kuba cintu cakwiilawo lweela.
13Wakayasa moyo wangu
amifwi ya mucipokolo cakwe.
14Ndakaba shikusekwa kubantu boonse.
Balacelebula munyimbo lilaya mukupila.
15Wasusha mubili wangu abucisa bulula
akunshimbilisha ndulwe.
16Wakatyoloola meeno angu kumabwe
alimwi akundyatoola mulusuko.
17Wakankasha kuba aluumuno,
ndakaluba akusangalala mbokubete.
18Aboobo ndaamba ayi, “Bulemu bwangu bwamana
alimwi ashintu shoonse nshendakalinga kulangila kuMwaami Lesa.”
19Nciyeeya mapensho angu akwiingaila kwangu,
ee, mapensho alulabo anga nindulwe.
20Ndyaaingashite kabotu kabotu
cakwaamba ayi moyo wangu ulyuungumene.
21Nakubi boobo ndeebaluka cintu comwi
alimwi cintu ico cilankalika moyo.
22Ceebo ca lusuno lwa Mwaami Lesa lutamaani, teshi tukalobeewo
mukwiinga lakwe lusuno lwakwe ndwamuyayaya.
23Lwalo lulaba lupya bwaca abwaca.
Kushomeka kwakwe nkunene abuumbi.
24Aboobo ndalyaamboosha ayi, “Mwaami Lesa mbobuboni bwangu.
Paceebo ceeco ndaakunoolangila kuli nguwe.”
25Mwaami Lesa ngumubotu kuli baabo balangila kuli nguwe.
Ncakwiila ngumubotu kuli wooyo uyandoola lucafwo kuli nguwe.
26Ncibotu kulindilila kooumwitebo,
ee, pakulangila lupulusho lwa Mwaami Lesa.
27Ncibotu kwiiya kulindilila boobo
koocili mwanike.
28Muntu anoopenga, ekale eenka kaaumwite
ceebo Mwaami Lesa ngowamunyamwisha lijoko ilyo.
29Ashishe ciwa cakwe mulusuko
ceebo mukucita boobo mpashi inga wacana lulangilo.
30Aasumine kuumwa nabi kucobolwa,
ee, aasumine kusebaanishikwa.
31Mwaami Lesa ngushinkumbu,
taabakakili limwi bantu bakwe.
32Nakubi kwaamba ayi waleta mapensho,
pesule ulaakufwa nkumbu
ceebo lusuno lwakwe lutamaani ndunene.
33Mwaami Lesa taakoondwi kuleta buumba,
nabi kulengesha bantu kupenga amyoyo.
34Mwaami Lesa taakoondwi kulyatilila
baangitwe boonse mucishi.
35Lesa Wiindaawo wakwiculu taakoondwi
kulita muntu masuku pamutwi pameenso akwe.
36Na woomboloshekwa cakunyengelelwa,
Mwaami Lesa ulabona shintu sha mushobo uyo shoonse.
37Anu ngani weenga waamba makani akucitika acitika?
Ee, ngani ukonsha kucita cintu ico Mwaami Lesa ncaatakwe kusuminisha?
38Sa te nguLesa Wiindaawo wakwiculu
ulengesha mapensho ashintu shibotu kucitika.
39Ino ono ceebonshi muntu ulatongooka
na wapekwa mulandu pashibiibi shakwe?
40Atubone nshila shesu mboshibete,
ee, atulicenceete akupilukila kuMwaami Lesa.
41Atulilile Mwaami Lesa uli kwiculu
amyoyo yesu yoonse ayi,
42“Twakamubishisha akumwaashukila
alimwi mwebo noBaami baLesa tamuna kutulekelela.
43“Mwakakalala abuumbi akututandaanya,
ee, kututandaanya akutucaya kwakutatufwitawo nkumbu.
44Mwakalifwekelesha likumbi
kwaamba ayi mutanoonyumfwa mipailo yesu.
45Mwatusandula kuba mulwi wa matombe,
ndushinisho twaba matombe pakati ka mishobo imwi.
46“Balwani besu boonse
batootutukana akutucelebula.
47Twapeenga kwiinda mumapensho, mukunyonyoolwa
ee, kwiinda mushintu shicaya alimwi shiloondesha.”
48Mumeenso angu mutookunkabo minsonshi,
ceebo bene misheesu bamana kunyonyoolwa.
49Minsonshi yangu iliciteekobo kukunka.
Ndushinisho inanookunkabo cakutacilekaawo
50kushikila Mwaami Lesa
akalange panshi kuswa kwiculu akutucafwa.
51Nsheembona shilalengesha moyo wangu kuungumana
pakubona shakacitika kubanakashi ba mundabala ine misheesu.
52Balwani bangu bakampatabo pataapu amulandu.
Ndushinisho bakalinga kumfwimabo anga nkayuni.
53Bantu aba bakangwaala mucilindi kaanciyoya
akungwaala mabwe ayi mfwite mumo.
54Maanshi akamfwekelesha,
lyalo ndakayeeya ayi ono ndolufu lwangu.
55Ndakeeta liina lyanu noBaami baLesa
kuswa panshi peene pacilindi.
56Mwakanyumfwa kusenga kwangu kwakwaamba ayi,
“Mutanooshinka matwi anu na ndasenga lucafwo.”
57Mwakasena pafwaafwi ndindakamwiita
akunkumbula ayi, “Utaloondi!”
58NoBaami baLesa mwakanjimikanina mumulandu wangu.
Ndushinisho mwakalubula buumi bwangu.
59Mwebo mulibwene mbobatoombishisha,
anu amumfuneeko mumulandu wangu uyu.
60Mulishi balwani bangu mbobampatite
alimwi ambobapingite kucita pali ndime.
61NoBaami baLesa mwakanyumfwa matushi abo
alimwi ambobapingite kucita pali ndime.
62Mwakanyumfwa makani ngobatepeteshanya
akuŋuŋuna pali ndime bushiku boonse.
63Amubaboone! Bushiite nabi bwiimfwi
balancelebula munyimbo shabo.
64NoBaami baLesa, amubaboosheshe cishole kweelana ambobeelete,
ncakwiila kweelana anshebakacita.
65Amubashinganye
akubalengesha kuba abuumba bunene.
66Amubatandaanye mubukali bwanu akubanyonyoola.
Ee, amubaloobye kuswa mucishi ca panshi.
Currently Selected:
Malilo 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.