Esita 2
2
Esita mbwaakasalwa kuba Muka Mwaami
1Pesule bukali bwa mwaami ndibwakamana, mwaami wakalinga kuciyeeya shakacita Fashiti ambwaakamupingula. 2Ono beshikumupandako maano bakamwaambila ayi, “Amuleke kuyandoolwe bamyooye babotu batana kukumanawo kale abasankwa. 3Anu nobaami amusale bacinenenene mushipansha shoonse sha bwaami bwanu kwaamba ayi bakabunganye bamyooye babotu abo kumusena wa banakashi banu kundabala inene ya Susa. Bakabikwe mumaansaakwe Egayi, musankwa wakacaikwa lushalo uyo ulama banakashi banu nobaami. Lyalo anoobapa mafuta akunananana kwaamba ayi babote. 4Ono mwanakashi uyo weshi akamusangalashe nobaami aakabe uyoosha wanu pamusena wa baFashiti.” Maswi aya akasangalasha mwaami, aboobo wakacita bweenka ubo.
5Ono mundabala inene ya Susa mwakalinga kwikala muJuda wa mumukowa wakwe Benjameni uyo wakalinga kwiitwa ayi Modekayi mwanaakwe Jeya. Jeya wakalinga mwanaakwe Shimeyi uyo wakalinga mwanaakwe Kishi. 6Modekayi wakalinga watolwa busha kuswa kuJelusalemu amwaami Nebukadinesa wa kuBabiloni pantu pomwi aJeoyakini mwaami wa bene Juda.#2 Baami 24:10-16; 2 Maka 36:10 7Modekayi wakalinga kucite mupyala wakwe wiitwa ayi Esita uyo wakalinga kucite liina lya ciEbulu lya Adasa. Esita wakalinga kwiimfwi kabotu alimwi mubotu kuciwa. Modekayi wakamulela anga ngumwanaakwe wakulishalila kuswa ciindi bashali bakwe ndibakafwa.
8Ono liswi lya mwaami ndilyakanyumfwika, bamyooye baanji bakaletwa mumusena wa banakashi kuŋanda ya bwaami kundabala inene ya Susa akubikwa mumaansaakwe Egayi. Mpeeke Esita alakwe wakatolwa kuli Egayi shikulama banakashi ba mwaami. 9Mooye uyu wakakonda Egayi abuumbi. Aboobo wakafwambaana kumupa mafuta akunananana kwaamba ayi abote alimwi ashakulya shibotu. Wakamupa abasebenshi banakashi bosanwe abobilo bakasalwa kuswa kuŋanda ya bwaami akumubika pantu pomwi ambabo mumusena wiindaawo kubota mumusena wa banakashi uyo.
10Paciindi ici Esita taakwe kuyubulula mushobo nabi mukowa wakwe mukwiinga Modekayi wakamukasha kucita boobo. 11Anu nshiku shoonse Modekayi wakalinga kwiindaana kufwaafwi alubansa lwa musena wa banakashi uyo kwaamba ayi eshibe Esita mbwaakalinga kubuka ashakalinga kucitika kuli nguwe.
12Ono mooye womwi awomwi kaatana kutolwa kumwaami Sakisesi, wakalinga kweelete kumanisha mwaaka kaanana mafuta kwaamba ayi abote. Myeenshi yosanwe awomwi itaanshi wakalinga kunana mafuta a mule, lyalo myeenshi yosanwe awomwi imwi, wakalinga kunana mafuta anunkila kabotu eetwa ayi bolisamu. 13Ono mooye pakutolwa kuŋanda ya bwaami kuswa kumusena wa banakashi, wakalinga kufwala shakufwala ashakulibotesha shili shoonse nsheenga wasuna. 14Wakalinga kuya macolesha akuswaako macuunsa kuya kumusena umwi wa banakashi akubikwa mumaansa akwe Shaashigasi musankwa wakacaikwa lushalo uyo ulama bakasuwa ba mwaami. Mwanakashi uyo taakoonshi kuya alimwi kumwaami, sombibo na mwaami wamusuna akumwiita liina lyakwe. 15Ono ciindi cakuya kumwaami cakwe Esita mwanaakwe Abiyailo shimishabo Modekayi uyo ngwaakalela anga ngumwanaakwe wakulishalila mwiine ndicakashika, taakwe kusengawo cintu cili coonse, sombibo sheesho shakamwaambila Egayi. Esita wakakonda muntu uli woonse wakamubona. 16Lyalo Esita wakatolwa kumwaami Sakisesi kuŋanda yakwe ya bwaami mumweenshi walikumi wiitwa ayi Tebeti, mumwaaka wasanu ayobilo wa bwaami bwakwe. 17Mpeeke mwaami wakasuna Esita kwiinda bamyooye bamwi boonse. Wakamunyumfwila nkumbu kwiinda bamwi boonse alimwi moyo wakwe wakaya pali nguwe. Aboobo wakamufwalika mushini wa bwaami kumutwi ayi abe uyoosha wakwe pamusena wakwe Fashiti. 18Mpomunyaawo mwaami wakabamba kusekelela kunene mukulemeka Esita akutamba bacinenenene abeendeleshi bakwe. Bushiku ubo wakabwaamba ayi mbwakookesha mushipansha shoonse sha cishi cakwe akupa bantu shipo camoyo woonse kweelana abwakalinga kupa bamaaminyina.
Modekayi mbwaakapulusha buumi bwa Mwaami
19Ono bamyooye aba ndibakabunganishikwa lwabili, Modekayi wakalinga wacinenenene muŋanda ya bwaami. 20Paciindi ico Esita taakwe kuyubulula mushobo nabi mukowa wakwe kweelana abwakamwaambila Modekayi ceebo wakalinga kumunyumfwila kuswa ciindi ndyaakamubwesa ayi anoomulela.
21Ono Modekayi ndyaakalinga kusebensela kuŋanda ya bwaami, Bigitana aTeleshi basankwa ba kubwalo bakacaikwa lushalo abo bakalinga kulindilila shipinda sha mwaami Sakisesi, bakacimwa mwaami abuumbi akupangana kumucaya. 22Modekayi wakanyumfwa makani aya akwaambila Esita muka mwaami, uyo wakaya mukwaambila mwaami makani ayo Modekayi ngaakamwaambila. 23Ono makani aya ndyaakayandoolwa akucanwa ayi ngalushinisho, basankwa aba boonse bobilo bakacaikwa cakubaangilila kushisamu. Makani aya akalembwa mulibuku lya makani a bwaami kweelana abwakaamba mwaami paciindi ico.
Currently Selected:
Esita 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.