Milimo ya Batumwi 1
1
1Nomusunikwi baTeyofilasi,
Mulibuku lyangu lyakutaanguna ndakalemba pamakani a shintu shoonse shakacita Jesu akwiisha, kuswa lyeelyo ndyaakatalika ncito#Luka 1:1-4 2kushikila bushiku ndyaakatolwa kwiculu. Sombi kaatana kutolwa kwiculu, kwiinda munkusu sha Mushimu Usalashi, Jesu wakalwiita batumwi abo mbwaakasala nshebakalinga kweelete kucita. 3Ndyaakafwa akubuka kuswa kubafu, Jesu wakalitondesha kuli mbabo akubeshibisha munshila shipusenepusene ayi ngumuumi. Wakaboneka kuli mbabo inshiku makumi one akwaambaabo shaBweene bwakwe Lesa. 4Ndibakalinga kubungene, wakabalwiita ayi, “Mutaswi muJelusalemu, sombi mulindilile cipo ico ncebakamushomesha baTa, ico ncendakamulwiitaawo anebo.#Luka 24:49 5Mukwiinga Joni wakalinga kubombeka amaanshi, sombi kapatana kwiinda nshiku shiinji mwebo mulaakubombekwa aMushimu Usalashi.”#Mate 3:11; Maako 1:8; Luka 3:16; Joni 1:33
Jesu mbwaakatolwa kwiculu
6Ono batumwi ndibakalinga kubungene pantu pomwi aJesu, bakamwiipusha ayi, “Nkambo, sa paciindi cino mutoobooshesha bene Isilaeli bwaami?”
7Jesu wakabaambila ayi, “Teshi ncito yanu yakwishiba ciindi ndyeshi shikacitike isho shili munkusu sha baTa. 8Sombi mulaakutambula nkusu na Mushimu Usalashi ukese pali ndimwe. Lyalo mulaakuba bakamboni bangu muJelusalemu, muJudeya moonse alimwi amuSamaliya kushikila amucishi coonse ca panshi.”#Mate 28:19; Maako 16:15; Luka 24:47-48 9Ndyaakamana kwaamba boobo, wakatolwa kwiculu boonse kabamubwene. Mpeeke likumbi lyakamufwekelesha bacileka akumubona.#Maako 16:19; Luka 24:50, 51
10Ono ndibakalinga kucilangilishisha kwiculu nkwaakalinga kuya, basankwa bobilo bakalinga kufwete shituba, bakesa mukwiimikana palubasu lwabo. 11Basankwa abo bakabaambila ayi, “Mwebo nobene Galili, ceebonshi mweemikana paapo akulanga kwiculu? Uyu Jesu watolwa kwiculu kuswa kuli ndimwe, ulaakuboola alimwi bweenka mbuli mbomwamubona kaaya.”
Wakapyana musena wakwe Judasi
12Lyalo batumwi bakaboolela kuJelusalemu kuswa kuKalundu ka Olifi, apo pakalingabo mushinso ufwaafwi. 13Ndibakashika, bakenjila muŋanda mucipinda ca peculu mobakalinga kwikala. Batumwi aba bakalinga Pita, Joni, Jemusi aAndulu, Filipo aTomasi, Batolomeyo aMateyo, Jemusi mwanaakwe Alufeyasi, Simoni shikulwanina lwaanguluko alimwi aJudasi mwanaakwe Jemusi.#Mate 10:2-4; Maako 3:16-19; Luka 6:14-16 14Aba bantu bakalinga kubungana akupailila pantu pomwi lyoonse, kubikaawo abanakashi bamwi, Maliya banyina abamakwabo Jesu.
15Ndipakeenda nshiku shiniini, kwakaba libungano lya baabo boonse bakalinga kushoma muli Jesu abo bakalinga kushika mpashi mwaanda amakumi obilo. Lyalo Pita wakanyamuka, 16waamba ayi, “Nobamakwesu, Malembo akwe Lesa akalinga kweelete kucitika ayo akaamba Defedi ndyaakatanjililwa aMushimu Usalashi. Lakwe wakaamba shakwe Judasi, uyo wakatanjilila baabo bakacata Jesu. 17Judasi uyo wakalinga womwi wa mulikoto lyesu, alakwe wakalinga wasalwa ayi asebensele pantu pomwi aswebo.” 18(Ono mumaali alya ngaakapekwa pacibi cilya ncaakacita, Judasi wakoolamo muunda umo mwaakawita panshi, wafwa akupasuka lifumo mala oonse aswita pansengwe. 19Bantu boonse bakalinga kwikala muJelusalemu bakaanyumfwa makani aya, aboobo muunda uyo mumulaka wabo bakootumba ayi Akeludama, nkokwaamba ayi, “Muunda wa bulowa.”)#Mate 27:3-8
20“Ceebo mulibuku lya Kulumbaisha mulilembetwe ayi,
‘Ŋanda yakwe ibe litongo,
Kutabi muntu nabi womwi ukalaamo!’
Alimwi mulilembetwe ayi,
‘Muntu umwi apyane pamusena wakwe wa butumwi!’#Kulu 69:25; Kulu 109:8
21“Paceebo ceeco, tulyeelete kusala muntu umwi pabaabo mbotwakalingaabo, paciindi ico Mwaami Jesu ndyaakalinga aswebo, 22kutalikila kuciindi Joni ndyaakalinga kushimikila shakubombekwa, kushikila pabushiku ubo Jesu ndyaakakushikwa pali ndiswe akutolwa kwiculu. Uyo abe kamboni pantu pomwi aswebo akushimikila ayi Jesu wakabuka kuswa kubafu.”#Mate 3:16; Maako 1:9; Luka 3:21; Maako 16:19; Luka 24:51
23Aboobo bakabanda basankwa bobilo, Josefu aMatiyasi. Josefu uyo wakalinga kwiitwa ayi Basabasi (limwi liina wakalinga nguJusitasi). 24Kuswawaawo bakapaila ayi, “Nkambo, mwebo nomwishi myoyo ya bantu boonse. Amutuboneshe wooyo ngomwasala pabantu bobilo aba 25kwaamba ayi abwese musena uyu wa butumwi, uyo wakashiya Judasi ndyaakaya kumusena umweelete.” 26Ndibakamana kupaila, bakooma cisolo, kucana cawita Matiyasi. Mpeeke wakaba mulikoto lya batumwi bali likumi awomwi.
Currently Selected:
Milimo ya Batumwi 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.