1 Bene Tesalonika 5
5
Kulibambila kwisa kwa Mwaami Jesu
1Ono nobamakwesu, taciyandiki ayi tumulembele shabushiku Mwaami Jesu ndyeshi akese panshi alimwi. 2Ceebo mwebo nobeene mulishi kale kabotu kwaamba ayi Bushiku bwakwisa kwa Mwaami Jesu, bulaakushikila cakutabwiingashila bweenka mwiipi mbweesa mashiku.#Mate 24:43; Luka 12:39; 2 Pita 3:10 3Bantu baakutalika kwaamba ayi, “Shintu shoonse shaba kabotu, taaku acakulisukama,” mapensho alensha boowa ndyeshi akabashikile! Alaakwisa cakuteengashila bweenka mbuli mwanakashi mbwaanyumfwa kucisa na mumala mwabuka, ncakwiila taaku eshi akacice. 4Sombi mwebo nobamakwesu, tamubete mumunshinshe. Aboobo Bushiku ubo tabweelete kushika cakutabwiingashila mbuli mbociba pamwiipi. 5Mwebo noonse muli bantu ba mumumuni bekala anga nshintu shoonse shilacitwa lumwi lubala. Tatubete anga mbantu bacita shicitwa mashiku nabi mumunshinshe. 6Ono aboobo tutabi bantu baliiba mbuli bucita bantu bamwi, sombi tulyeelete kucenjela akulitibuka. 7Mukwiinga abo boona, baloona mashiku alimwi abo bakolwa, balakolwa mashiku. 8Ono swebo tuli bantu bacita shintu sha mumumuni alimwi tulyeelete kulitibuka. Tulyeelete kufwala lushomo alusuno ayi shibe anga ncakufwala ca ceela ca pacaamba, acalo ncimpoompo cesu cibe kulangila kwakwaamba ayi tulaakupuluka.#Isa 59:17; Efe 6:13-17 9Lesa taakwe kutusala ayi tukabone bukali bwakwe, sombi kwaamba ayi tukapulushikwe kwiinda muMwaami Jesu Klistu. 10Lakwe wakatufwita kwaamba ayi tukekaale anguwe. Tacicite mulandu nabi tukacanike katuli boomi nabi katufwite, aakwisa. 11Aboobo kamuyuminishanya akucafwana womwi awomwi bweenka mbuli mbomutoocita.
Maswi akweelaako
12Twamusenga nobamakwesu kwaamba ayi mupe bulemu kubaabo batoosebensa cankusu pakati kanu, abo bamutanjilila akumulwiita mbomweelete kucita mubuKlistu. 13Amubatondeshe bulemu buunji alusuno ceebo ca mulimo wabo. Amwikale muluumuno lyoonse.
14Twamusenga alimwi nobamakwesu, ayi mucenjeshe batolo. Amuyumyeyumye beshiboowa, mucafwe balefukite alimwi bantu boonse kamubakalikila myoyo. 15Mutasuminishi bantu kuboosha cibiibi kucibiibi, sombi mushiindi shoonse amweeleshe cankusu kucafwa babyaanu abantu bamwi boonse.
16Amusangalale lyoonse. 17Amupaile kuli Lesa lyoonse. 18Kamulumba Lesa mushintu shoonse. Ici ncaasuni Lesa kwaamba ayi mucite kweelana ambomuli muli Klistu Jesu.
19Mutakashi ncito ya Mushimu Usalashi. 20Mutasebaanyi makani ayo ashimikila baabo baambililaako Lesa, 21sombi mubone kwaamba ayi na makani ayo alaswa kuli Lesa. Lyalo mwakonkela aayo abotu 22akulitalamusha kushibiibi sha mushobo uli woonse.
23Ono Lesa uyo utulengesha kwaamba ayi twikale muluumuno, amusalashe cakumaninina akulengesha buumi bwanu boonse kubula kampenda pakwisa Mwaami wesu Jesu Klistu. 24Uyo wakamwiita ulashomeka alimwi ulaakumucitila cintu ici. 25Aswebo nobamakwesu, kamutupaililaako. 26Mwaanshe bashominyineesu calusuno lwiine lwiine. 27Muliina lya Mwaami Jesu ndamwaambila ayi nkalata iyi mwiibelenge kubashomi boonse. 28Luse lwa Mwaami Jesu Klistu lube amwebo.
Currently Selected:
1 Bene Tesalonika 5: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.