1 Baami 3
3
Solomoni mbwaakasenga busongo
(2 Maka 1:3-12)
1Solomoni wakapanga bushicibusa aFalawo mwaami wa kuIjipiti kweeba mwanaakwe. Wakamuleta mundabala ya Defedi umo mobakalinga kwikala kushikila ndyaakamanisha kuyaka ŋanda yakwe ya bwaami, Ŋanda yakwe Lesa alubumbu kushinguluka Jelusalemu. 2Ŋanda yakwe Lesa keetana kuyakwa bantu bakalinga kubenga milambu yabo pashipaililo shipusenepusene shiinji. 3Solomoni wakalinga kumusuni Mwaami Lesa alimwi wakakonkela kwiisha kwa baishi baDefedi. Sombi alakwe wakalinga kubenga milambu akutenta tununkila kabotu pashipaililo shipusenepusene.
4Bumwi bushiku wakaya kuGibyoni mukubenga milambu mukwiinga nkokwakalinga cipaililo cakalinga kupukite abuumbi. Uko Solomoni wakabengelaako milambu yakutenta ili cuulu. 5Bushiku ubo Mwaami Lesa wakaboneka kuli nguwe muciloto akumwiipusha ayi, “Nciinshi ncoosuni ayi nkupe?”
6Solomoni wakakumbula ayi, “Lyoonse mwakalinga kutondesha lusuno kuli bata baDefedi basebenshi banu mukwiinga bakalinga babotu, bashomeka alimwi baluleme mubushicibusa bwabo amwebo. Mwatolelela kubatondesha lusuno lwanu lunene alimwi lutamaani kwiinda mukubapa mwaana uyo utoopyana bwaami bwabo sunu.
7“Ono noBaami baLesa, baLesa bangu mwansuminisha kupyana bwaami bwa bata, nacibi kwaamba ayi ncili mwanike alimwi nshishi abwakulela. 8Mbulya ndi pakati ka bantu mbomwakasala ayi babe baanu, bantu abo baanji anga ngumuseese. 9Aboobo amumpe busongo bwakukonsha kulela bantu banu cabululami akwishiba cibotu acibiibi. Kwabula boobo inga ndakonsha buyani kulela mushobo wa bantu banu uyu unene bobulya?”
10Mwaami Lesa wakakondwa ayi Solomoni wasenga busongo. 11Lyalo wakamwaambila ayi, “Mukwiinga wasenga busongo akulela cabululami, kuleka kwikala buumi bulaamfu nabi bubile nabi kufwa kwa balwani bako, 12ntoocita ico ncewasenga. Ntookupa busongo alushibo kwiinda shakabawo kale amuntu uli woonse nabi nsheshi akabaasho. 13Ntookupa asheesho nshootakwe kusenga. Mubuumi bwako ulaakuba abubile alimwi abulemu kwiinda bamaami boonse. 14Ono na awebo unoonyumfwila akukonkela kwiisha kwangu amilawo bweenka bwakalinga kucita iso Defedi, ndaakukupa buumi bulaamfu.”
15Solomoni wakapapuka akwishiba ayi Lesa walinga kwaamba anguwe muciloto. Mpeeke wakaya kuJelusalemu waya weemikana kunembo lya Libokoshi lya Cipangano lya Mwaami Lesa akubenga milambu yakutenta aya bwanabwankashi kuMwaami Lesa. Kuswawaawo bacinenenene bakwe boonse bakaba akusekelela uko mwaami nkwaakabapangila.
Solomoni mbwaakoombolosha mulandu ushupite
16Bumwi bushiku banakashi bafuule bobilo bakesa kumwaami Solomoni akwiimikana kunembo lyakwe. 17Umwi wakaamba ayi, “Nomulemekwa, uyu mwanakashi anebo tulekala muŋanda yomwi. Nebo ndakashala mwaana musankwa mweenka muŋanda umo alakwe kaliimo. 18Ndipakeenda nshiku shobilo kuswa bushiku mwanaangu ndyaakashalwa, alakwe wakashala mwaana musankwa. Twakalingabo sobilo muŋanda umo, taaku aumwi wakalingaamo. 19Bumwi bushiku mashiku kaalete wakamulimba mwanaakwe mumapuso akumucaya. 20Wakabuka mashiku, akubwesa mwanaangu musankwa kuswa kulubasu lwangu kaandete akumutola pabulo bwakwe. Lyalo wakabika mwaana ufwite pabulo bwangu. 21Macuunsa ndibwakaca ndakabuka kwaamba ayi njamwishe mwanaangu, kucana ulifwite. Ndindakamulangishisha, ndakabona kwaamba ayi teshi mwanaangu.”
22Sombi walutundu umwi ulya wakaamba ayi, “Sobwe! Mwaana muumi ngwaangu, ufwite ngwaako!” Walutundu mutaanshi wakakumbula ayi, “Sobwe! Mwaana ufwite ngwaako, uyu muumi ngwaangu!” Nkokwaamba ayi bakapikishanya bweenka ubo pameenso amwaami.
23Mpeeke mwaami Solomoni wakaamba ayi, “Uyu waamba ayi, ‘Mwanaangu ngooyu muumi, waako ngooyu ufwite,’ ono awebo waamba ayi, ‘Sobwe, waako ngooyu ufwite, nebo wangu ngooyu muumi.’ ” 24Lyalo mwaami wakatuma muntu kuleta mupeeni. Ndiwakaletwa, 25wakaamba ayi, “Amutimbule mwaana muumi pakati napakati mwaabanye banakashi aba aumwi cipansha aumwi cipansha.”
26Nyina mwiine wakanyumfwa nkumbu abuumbi pamwanaakwe musankwa akwaambila mwaami ayi, “Nomulemekwa, ndaseenga mutacaayi mwaana uyu! Amumupebo walutundu uyu!” Sombi umwi lakwe wakaamba ayi, “Mutapi nabi womwi pakati kesu, amumutimbulebo pakati.”
27Lyalo Solomoni wakaamba ayi, “Mutatimbuli mwaana uyu! Amupe mwanakashi mutaanshi, ngonyina mwiine.”
28Bene Isilaeli ndibakanyumfwa Solomoni mbwaakoombolosha, boonse bakatalika kumulemeka abuumbi mukwiinga ono bakeshiba ayi Lesa wamupa busongo bwakoombolosha milandu cakutanyengelela.
Currently Selected:
1 Baami 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.