Romeŋ 1
1
Ma tsey guma a vaw
1Yah Pol, bəzey ma slərey ma Yezu Kriste, ma zəla ha ka da tərey maslaŋ aha, ma wala ha, ma paha gəle ma da tələkada mey ta Mey Wayna ma Bay ma Bəla. 2Mey Wayna a neney na, Bay'ərlam ka tsadatərawa ba zla ka vaw, a ndaw sek aŋga hay da Mewindey Kokwoɗ ana hay na, 3-4Mey ana, a tsey na ka Bəzey ŋga: haɗaw andza da slaw vaw na, a bawa da bəzay ma David. Haɗaw andza da Mesəfrey Kokwoɗ ana na, ma paha ta ma slafa ŋga, Bəzey ma Bay ma Bəla aha, ta ma mbəlawa ŋga da walaŋ ma ndaw ma mətsa na hay. Na ŋga na na, Yezu Kriste, Bay’ərlam lakwa. 5Ta har aŋga na, la ma ndzafam hahaya ma da tərey maslaŋ aha, ma da kəsadata a me tsəney sləmay ta me pey ’ar, a maram ma mezəley ŋga, səkway Zuif ahiya kakay ana hay tabiyaha. 6Kuray tiyatsa na, kuray da walaŋ ata, Yezu Kriste ka zələkurawa ba. 7I windəkuraɓa a kuray, ndaw Bay ma Bəla ma wuɗata na hay tabiyaha da Rom ana, a ndaw Kokwaɗ ana hay ta me zəley ma Bay ma Bəla, hayna Bay ma Bəla Baba lakwa, ta Bay’ərlam Yezu Kriste ka vəlakwar hahaya ŋga, ta zozoy ŋga!
Pol ta Kretieŋ ma Rom hay
8Tsufəmey aha na, i madara sise a Bay ma Bəla ɗaw, ta har ma Yezu Kriste, hərway kwar tabiyaha: ka bəla tabiyaha na, a tələkadama ha mey, waya kuray na ka pam aha 'ar. 9Hərway Bay ma Bəla na, ndaw seydewe ɗaw ana, ŋga na i ma kar kuley ta mezek a ɗaw adzay ana, da ma tələkada mey ta Mey Wayna ma Bəzey ŋga na. I mətsar aha har ma sləfakwar kakay, 10zarra da ma ɗuley mey ɗaw na, i tsəhey, i wuɗey, andza ma ŋga ma wuɗey na, i ka ndzafaɓa ma daɓa a 'ay kwar. 11A saya nduk nduk akwa i ka nəkadakwar, ma aza i ka ɓadakwar tek ma haya ha ma Mesəfrey nekəɗey aza ka da səmadakwar. 12Dakay dzadzak na, i ka wanəkadukurawa wuiya kamasləta ha da 'ay kwar, ta ma pey 'ar alakwa na asləta na, kuray ta yah adzay. 13A saya na, kuray ka səradama malam a ɗaw hay, i dzeley 'ar zarra ma daɓa a 'ay kwar, ma i ka ndzafawa tek ma merɓey ɗaw, andza na i ma ndzafawa da sa ma səkway Zuif ahiya kakay ana hay, amana tek ana ka təkaya ba. 14Mber a ɗaw na, ma daway ka tsakay ma ndaw hay tabiyaha: a 'ay ndaw ma fira na hay, kalkal andza a 'ay ndaw ma fira hiya kakay ana hay, a 'ay ndaw ma dzaŋga na hay, kal kal andza a 'ay ndaw ma dzaŋga ahiya kakay ana hay. 15A saya akwa na ma təlkadakwar mey ta Mey Wayna, a kuray ndaw ma Rom hay tiyatsa na, hərwuiya.
Dzerey ma Bay ma Bəla
16Hərway yah na, hwaray a kaya ta Mey Wayna tikay: ŋga na, ma slafa ma Bay ma Bəla ma buwey kwa way way ma pey 'ar ana tsəfəmey aha na Zuif hay ba ɗagay, a dəba na na Grek hay. 17Da Mey Wayna na, a ɓada na neney: Bay ma Bəla na, a tərada ndaw dzerey aha ka slam dey ŋga, ta ma pey 'ar ka ŋga. ’Ar me pey ana ŋga na na, ɗa tsa. Andza na ma windaha na da ɗeriwel Kokwoɗ ana: ‹Ndaw ana dzerey aha ta ma pey 'ar ana na, a da səfərey.›
Meŋgəsey ma ndaw Zuif ahiya kakay ana hay
18Akwa na zla da mekekəle ma həzlay ma 'ərlam na, Bay ma Bəla ma ɓada me tsey mevel ŋga ka meŋgəsey ta tek dzerey ahiya kakay ana hay ma ndaw hay ma zəgadama dərka na beke ma dzerey dakay ana. 19Hərway, tek na ma slafama ma səradəmarawa ka Bay ma Bəla ana na, ndaw hay a səradama tabiyaha, hərway Bay ma Bəla ka ɓadatara ba. 20Akwa zla da mezley ma bəla na, ndaraw aŋga ma nəkey kakay ana hay na, gədaŋ aŋga ma slafa tabiyaha na me ndəvey kakay ana, ta vaw ŋga ’ərlam aha na, a nəkam na da mber aŋga hay me sərey tek; arka taya tok na, amboh ata na dakay. 21Kwa andza a səradama Bay ma Bəla tekeɗe na, kwa ka hasəkadəmara bəzay kakay, kwa ka madəmara sise andza na akwa ka madəmara a Bay ma Bəla na kakay. Dzadzak tok na, ta meterŋgleŋ taya ka zləgam ba da ma dzeley 'ar ata tedehe na hay, da mevel ata mandzara me dzeley ’ar ana na, a da təram na tek ma ləvaŋ ahiya. 22Key a kadama vaw andza a səradama ’ar tok na, azlakwa a da təram na 'ar ma mbəɗey ahiya. 23Taya ma mbəɗadama ma wezley dey ma Bay ma Bəla me mətsey tikay ana, ta mey ’ar dey ma tek na ma kaya ta har ana: andza ndaw me mətsey ana, ɗiyeŋ hay, gənaw ta sek faɗ ana hay, ta tek ma vey ta hwaɗ ana hay. 24Kavəday ma mey na, Bay ma Bəla ma mbəkafata har a tek na ma katar dey da mevel ata na hay, a tek ma zləɓey ndaw ana hay, ma taya ka da ɗəmatar ndaw a bay ’ar ma vaw ta na hay sazlay. 25Taya ma mbəɗadama dərka na ma Bay ma bəla ba ta maləwaɗay, ma namar dəba ta ma kamar kuley a tek na ma ka ahiya na, a veɗ ma Ndaw ma katərawa na, ma pəsa mey aha ma kwoza ha na. Amen! 26Kavəday ma mey na Bay ma Bəla ma mbəkafata har a tek ma sey, ma mey ndaw ta dəba na hay, ŋgwas ata na hay ma dzəmam vaw ka 'ar vaw ta na ŋgwas hay, andza na ma mewey ma bəla ma wuɗey kakay ana. 27Mawal hay ma kam andza ha satsa, ma mbəkadama me dzəmey vaw ta ŋgwas ata hay, andza na ma bəla ma ləvey ana, ma kam dey ka vaw ka 'ar vaw ta na hay, ma nam mawal ta mawal, arka na ma ndzafam masa da vaw ta na, kassla ma ma zəɗey ta na. 28Andza taya ma wuɗam ma səradama Bay ma Bəla kakay na, Bay ma Bəla ma mbəkadata paɗ ka ma dzeley 'ar ata so lamba ha na. Kəɗey na, a kam tek na a da fa taya ka kama zlay ana hay. 29Taya ma rəha vaw ahiya ta tek na dzerey a kakay ana hay tabiyaha: a kam tek haya kakay ana hay, a kam dey ka tek ma ndaw hay, taya seweɗ ahiya, ma rəha hiya ta səleŋ, a kəɗam ndaw vagay aha, a təram vaw, a zləgadəmata sa ma ndaw hay, a kam tek hay so ha, a tsam maləwaɗay ka ndaw hay, 30a ŋgəlam bəzay a vaw ka ’ar vaw ta na hay. Taya dəgwan ma Bay ma Bəla ahiya, a zaram mey so, a rəsam vaw, a ɓam ta vaw, a səpam wewer teŋgey teŋgey na me key tek hay kakay ana hay. A tsənəmatar sləmay andza baba, ta maya ta hay kakay. 31A səradama tek kakay, a mbəɗam sler a guma ta, mevel ata təɗo təɗo, ndaw a katar da vaw kakay. 32Kwa andza tekeɗe a səradama sariya ma Bay ma Bəla na ma ləvey ndaw me key tek andza ana ŋga na na hay na, me kəɗey ta na na vagay ahiya na na, a kama na ta key dada tsa kakay, amana, a həladəmatara bəzay a ndaw ma kam andza ha na hay satsa.
Currently Selected:
Romeŋ 1: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun