Romeŋ Ma key ka ’ar ɗaf ma guma
Ma key ka ’ar ɗaf ma guma
Andza ma Pol ma windatar a kretiyeŋ ma Rom hay na, a ndakada ha me heley ŋga ma makar ana ma me slərey ŋga. A wuɗey me husey ma daw kasl a Rom, kavəday ŋga ka husey a huɗa tsaray kakay, arka a da daway pew dəreŋ a mey ŋgwa kasl a Espay, ma da taləkadərawa mey ta Mey Hayna Wayna da huɗa (15.22 kasl ka 24) A katar ɗeriwel a neney na ma ka ləmada ma da daway ŋga ta ma ɓadatəraɓa metetəkey ŋga a kretiyeŋ hay da wurow ana.
Ɗeriwel ana ma katar a Romeŋ ana hay na, bəzay ma guma na na ma ndasla ha ba kalkal andza ma me tetəkey ma Pol ma taləkada mey ana. Andza ma pəɗada ŋga na na, a ləvey andza neney: «Bay ma Bəla a da səradata ndaw hay andza dzerey ahiya na, andza a pam ’ar ka ŋga, arka me pey ’ar a neney na ɗa» (1.17).
Ma gadəgarada bəzay ma guma neney na, ma tsa ka vaw na dey makar: Lamba ɗuhwa na 1 kasl ka 8 a nəkey dey ka me zəgey har a vaw ma me tsəney sləmay a mewey ma kuley hay ta me pey ’ar ka Bay ma Bəla na ma Yezu Kriste ma tərada a key vaw ana. Da Egliz ma Rom ana, ɗuhwa ha da huɗa na kretiyeŋ hay na ma ya hiya Zuif ahiya kakay ana hay. Ama Zuif hay da Rom na haɗadzidzay, arka sa ma Zuif ana sa na hay ma təram kretiyeŋ ahiya. Arka taya na re a tsənəmatar sləmay a me tsekesley tek me mewey ma kuley ma Zuif hay. Ndaw Zuif ahiya tikay ana hay ma təram kretiyeŋ ahiya na, sey ka tsənəmatar sləmay a me tsekesley ma tek ata na hana na hay tiyatsa ɗaw? Bəzay ma guma neney na ma tsəham andza ha na na, ka həɓatar ’ar ba kambəlaɓa a Egliz ana wayna hay. Pol a ləvey na, ndaw hay tabiya ha na ma ŋgəsaya hiya, ndaw Zuif ahiya kakay ana hay ta Zuif a hay dzay. Arka azlakwa tok na, kwa mewey ma me tsekesley ma tek ma kuley waray waray ma badərawa ndaw ba kərem da meŋgəsey ana na dakay. Ama a da buwəmata ndaw hay tabiya ha na, ma dzənata na Mesəfrey Kokwaɗ ana, mavəday ma mey na Yezu Kriste a kəsadata ’ay Bay ma Bəla.
Lamba ɗuhwa na 9 kasl a 11 a nəkey dey na ka me zəgey har a vaw ma Israyel səkaw na Bay ma Bəla ma gaɗəma na ta kretiyeŋ hay. Andza ma vəɗe ma tek na, ma pey ’ar ma kretieŋ hay na, slasləlay ŋga na ma pa ha na da dala ma Zuif hay. Ama sa tok na, səkway ma Zuif ana kərem tabiya ha ka təram kretiyeŋ ahiya kakay. Pol a ləvey na, re Bay ma Bəla a wuɗa ha, a zəla ha səkway ŋga. Ama pas asləta na, ka masləta ha andza səkway hay tabiya ha na, a da sərafama ka haya ha ma Bay ma Bəla ma ɓawa da Yezu Kriste na.
Lamba ɗuhwa na 12 kasl a 15 a nəkey dey na ka ndaraw me mendzey da Egliz ma Yezu Kriste. Pol a wandzalada ɗagay ma kar kuley a Bay ma Bəla na teŋgey, ma ndzey da zozoy andza sa ma ndaw hay na teŋgey. A tsatar a ndaw me pey’ar ata gədaŋ ahiya na hay na ka səradəmata me pey’ar ma ndaw bəle ahiya na hay. Bay ma Bəla na a buwatərawa ndaw hay tabiya ha da meŋgəsey, da memətsey. Ekəɗey na a slafama me ndzey ma dzəma mey ahiya ka ’ar vaw ta na hay, ma dzəmaya ka Kriste ta me dzəney ma Mesəfrey Kokwaɗ ana. Ɗeriwel ma Pol ma katar a Romeŋ hay a ndesley na ta me tsey guma a vaw a ndaw hay haɗadzidzay (lamba ɗuhwa na 16). A sləfey mezəley ma mawal hay ta ŋgwas hay haɗadzidzay. Kəɗey na kretiyeŋ ana zlezle na hay, tərey a təram na andza taya bəse ta na ma teseɗey ana hay.
Currently Selected:
Romeŋ Ma key ka ’ar ɗaf ma guma: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun