Apokalis Me key ka ’ar ɗaf ma guma A ləvam:
Me key ka ’ar ɗaf ma guma A ləvam:
«Apokalis» ta mey Grek ka ləva na, me ɓey vaw. Me ɓey tek, ma sərada tek ana me key ana, na me sərey kakay ana, dakay na na ma kəzla na.
Ndaw ma winda ɗeriwel ma Apokalis ana a da winda na dey ta kava a key mevey temere a dəba ma Yezu Kriste. Da har ana ŋga na na, bay ɗuhwa na ma dala ma Romeŋ hay a wuɗey ka namar dəba na andza a ’ərlam. Sa ma kretiyeŋ hay na, a kam tsetseh hərway ma me pey’ar ata. Ama sa na hay na a mətsatar har.
Ɗeriwel ma Apokalis na, a təkəra na a malada ta tek hay, ta mey ’ərdey ma tek hay. Sa na hay a səmawa na da ɗeriwel gurəma na. Lamba ta me nəkey ma tek hay na, a ɓey na tek ana daha kava. Da guma me tsey na, lamba tsəla na a ɓey na ka ləva na, tek ana ma ndasla ha tsay, arka lamba mukwa tey na, tek ana ma ndasla ha kakay ana. Tek babara na na a ɓey na, me zəgey ’ar ma sleɗ, tek gagaza ha na, a ɓey na vərom. Mey ’ərdey ma tek ana hay andza ha haɗadzidzay daha sa. Bəlay na slam ma gədaŋ ma tek haya kakay ana hay ma tsəhaya da huɗa. Zezekw ma tek ana a ɓey na mesəfrey haya kakay ana. Gənaw ana hay na, a kamar mber na, a zezekw ana. Babiloŋ a ɓada zarra da Bible na, wurow ana bay ŋga na haya kakay ana. Ka sləna na na, Rom, wurow ɗuhwa ma dala ma Romeŋ hay.
Tsakay tsəfəmey ana ma Apokalis (1.1—3.22) da huɗa na ɗeriwel hay ma ka ahiya tsəla, a Egliz tsəla, ma Proviŋs Romeŋ ma Azi, na da Turki ekəɗey ana. Ɗeriwel a neney ma winda ha tabiya ha na, a Egliz a neney hay tsəla na (1.4, 11)
Ta Egliz ana hay na, ndaw ma winda ɗeriwel ana a tsatar na a Egliz ahay tabiya. Da tsakay ma ɗeriwel ana me tsetsew ana na (4-20). Ndaw ma winda ɗeriwel ana ma tsakafama a ’ərlam. Ma nəkadata tek me rəzley ndaw ahiya, arka ŋga ma windadata aha. Da lamba ɗuhwa na 4 kasl ka 11, a ɓada ɗagay Yezu Kriste a vəley tsəveɗ ma wurada ta ma tsənada ɗeriwel ana gurəma na na teŋgey. A ɓada satsa na, Mey Hayna Wayna ma Yezu Kriste na a nəkey dey na ka səkway hay tabiya ha. Da lamba ɗuhwa na 12 kasl a 20, a ɓada satsa na, me kəɗey vaw ɗuhwa ha ta gədaŋ ma tek haya kakay ana hay. Yezu na ta dey ana ma ɓa ha na, andza bəzey təɓaŋ. Äəzey təɓaŋ ma Bay’ərlam ma vəlada mendzey ŋga andza bəzey təɓaŋ mandzara malay ana, ma zəga ’ar ma sleɗ ba na.
Lamba ɗuhwa na 21 ta 22 a taləkada mey na, ta tek ma da key waya ha, na Bay ma Bəla ma ləmada na. Da tek ana hana ma ka ha na na, wurow da huɗa daha, Zeruzalem, ma hərɗawa da ’ərlam, andza tek ma Bay’ərlam me vəley ma haya ha na. Da lamba neney ɗuhwa na tsew ana hay na, Apokalis a ndesley na kava. Ama satsa na, Bible ana tabiya ha na. A madama sa ma bəzay ma guma na hay da mezley ma Bible ana. Da Zenez 3.24, madurlam hay ma wuɗadama mambaw me tsəveɗ ma dada ndaw ka vəɗe tek ma mesəfrey ana ba. Da Apokalis 22.2, vəɗe tek ana me vəley mesəfey ana na, ŋga da wuzlah ma wurow ana. Äaslah a ŋga na hay na, a nefey ma ndaladata ndaw hay tabiya ha.
Ɗeriwel ma Apokalis a windama na da har ma viya ger aha, dakay na, da tek haya kakay ana a key andza a fənatara ’ar a tek hay tabiya ha. Ɗeriwel ana a sədəmadata ndaw me pey ’ar ka Yezu ana hay ka dzaŋgəram ka gədaŋ ma tek a neney haya kakay ana hay, arka ma hutada me zəgey ’ar ma sleɗ ma Bay’ərlam madakwaydokw ana.
Currently Selected:
Apokalis Me key ka ’ar ɗaf ma guma A ləvam:: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun