Zaŋ 20
20
Yezu ŋga da tsəvay dasakay
(Mt 28.1-10; Mk 16.1-8; Lk 24.1-12)
1Pas ma zlamar me mbəsley meney ma luma, zla ma ləmɗa, dey a nəkey tsaray kakay na, Mariya ma Magədala ma daway ka ɗay tsəvay, arka a da nəkada na, beber ma wura ha ba ka mey ma tsəvay ana. 2Ŋga ma hway ka tsakay ma Simoŋ Piyer ta gawla naŋgar, na Yezu ma wuɗa na, arka ŋga ma ləvatar: «Ka zəgama vagay ma Bay’ərlam Yezu ba da tsəvay, la səradama a da padama ka waray kakay!» 3Arka na Piyer ma bawa ta gawla naŋgar, arka taya ma dawam ka ɗay tsəvay. 4Taya tsetsuwe ta hiya ka masləta ha ma hwam ta hway, ama gawla naŋgar na a hway a fəna Piyer, ma husafa ba ka mey ka ɗay tsəvay. 5Ŋga ma gweɗəkwey, ŋga ma nəkada petekeɗ yam aha, ma pa ha ka slam ana, amana, ŋga ka fuləkwey kakay. 6Arka Simoŋ Piyer ma səpəraɓa da dəba na, me husey tey, ŋga me fuləkwey a tsəvay ana, ma nəkada petekeɗ yam aha ma pa ha ka slam ana. 7Ta zana ma mbəzadəmara 'ar ana, ŋga na ma pa ha kamasləta hiya ta petekeɗ yam ana tikay, ŋga na ma paɗa ha, ma pa ha slam aŋga gəle. 8Arka tok na, gawla naŋgar ana, ndaw me husey tsəfəmey ana me fuləkwey tey, ŋga ma nəkada na, ŋga me pey 'ar. 9Akwa da varay ana ŋga na na, ka səradama guma ma Mewindey Kokwoɗ ana hay me ləvam: Yezu a da lətsawa da walaŋ ma ndaw ma mətsa na hay ana tsaray kakay. 10A dəba na na, gawla ma Yezu ana hay ma mam tek ata a mbaw.
Bay’ərlam Yezu a ɓar vaw a Mariya ma Magədala
(Mk 16.9-11)
11Mariya na ma ndza ha da bəla ka ɗay tsəvay a tuway aha, ta ma tuway aha na, ŋga ma gweɗəkwey ’ar a tsəvay ana. 12Arka ma nəkadata madurlam hay tsew, ta zana babara hiya ka vaw, ma ndza hiya ka slam ma padama vagay ma Yezu ana kava na, asləta ta slam 'ar, naŋgar ta slam sek. 13Taya ma ləvamar: «Ŋgwas eɗey, ka tuway mey?» Ŋga ma mbəɗafatara kava: «Ka zəgama vagay ma Bay’ərlam Yezu a ɗaw ba, i sərada a padama ka waray kakay.» 14Andza a tsey aha guma na, ŋga me mbəɗey dey, arka ma nəkada Yezu ma lətsa ha ka slam ana, amana a sərada neney na ŋga kakay. 15Yezu ma ləvar: «Ŋgwas eɗey, ɗagay ka tuway mey, ka səpey way?» Ama ka ŋga na, waya atay ndaw ma dzeɗey dzerne na, ma ləvar: «Bay ɗaw, kendzey ma zəga na kah na, ɓadaya ka pada ka waray na, aza i daw, i da zəgərawa.» 16Yezu ma ləvar: «Mariya.» Ŋga me mbəɗey dey, ma tsar ta mey Ebrew: «Rabuni», ka ləva na ‹Miter.› 17Yezu ma ləvar: «Ka zəgadaya zlay, hərway ma mey na, i ka tsəley ’ar ’ay Baba ɗaw tsaray kakay. Kah ekəɗey na, daway da ndzafata malam a ɗaw hay, ləvatar: «I tsəley aha ’ar a 'ay Baba ɗaw, na Baba kwar aha tiyatsa, ’ar a 'ay Bay ma Bəla a ɗaw, na Bay ma Bəla a kwar aha tiyatsa.» 18Arka Mariya ma Magədala ma daway, ma da ɓadatara a gawla ma Yezu hay tok: «I ka nəkadərawa Bay’ərlam Yezu ba, a ləviyawa na andza neney.»
Bay’ərlam Yezu a ɓatar vaw a gawla ŋga hay
(Mt 28.16-20; Mk 16.14-18; Lk 24.36-49)
19Ta hakwaɗ ma pas ana ŋga na na, pas tsəfəmey ana ma zlar me mbəsley meney ma luma na na, gawla ma Yezu hay ma kusa hiya da 'ay, ma wuɗa mambaw ahiya ka vaw, hərway a wasam ta Zuif hay. Yezu ma sawa a walaŋ ata, arka ma ləvatar: «Zozoy ka ndzey ta kuray.» 20Andza a tsatar aha guma na, ma ɓadatara har aŋga hay ta dzəham aŋga. Andza taya ma nəkadama Bay’ərlam Yezu na, gawla ma Yezu hay ma rəha hiya ta wuiya. 21Arka satsa na, Yezu ma ləvatar: «Zozoy ka ndzey ta kuray, andza ma Baba ma sləradiyawa na na, yah ekəɗey tey na, i da sləradakwar.» 22Andza me tsey ba andza ha na, ŋga ma vəzlatar Mesəfrey, arka ma ləvatar: «Ndzafam Mesəfrey Kokwoɗ ana. 23Ndaw na kuray ma safəmata yam ba ka meŋgəsey ta na hay na, meŋgəsey ta hay a da key na ma sa yam ahiya ba. Ndaw andza kuray ka mbəkadəmatara ba na a da ndzam re ma mbəka ha».
Yezu ta Tomas
24Azlakwa Tomas na zəlamar Didim ana, ndaw asləta da walaŋ ma gawla ŋga kurow kava tsew ana hay ŋga dakay, andza Yezu ma sawa ana na. 25Sa ma gawla ma Yezu a sa na hay ma ləvamar: «La ka nəkadama Bay’ərlam ba!» Ama ŋga ma mbəɗatar kava: «Haɗaw i ka nəkada vavay mbəlek ma seferey da huɗa har aŋga kakay, haɗaw i ka tələkada bəzey har a ɗaw a vavay mbəlek ma seferey kakay, haɗaw i ka tələkey har a ɗaw a tsəham aŋga na kakay na, i da təɓa ha tikay!» 26Ama a key meney tsakar a dəba na na, gawla ma Yezu hay ma kusa 'ar ahiya da 'ay ana sa, Tomas taya dzaya, Yezu ma sawa mambaw hay tabiyaha ma wuɗa hiya, ŋga me lətsey a wuzlah ata ma ləvatar: «Zozoy ka ndzey ta kuray.» 27Arka ŋga ma ləvar a Tomas: «Guradərawa bəzey har eɗek ka sləna, nəkafata ka har a ɗaw hay. Hadərawa har eɗek, tələkada a dzəham a ɗaw, mbəkada me key waway ɗek a neney, tərey ndaw me pey 'ar aha. 28Tomas ma mbəɗar kava: «Bay’ərlam a ɗaw, Bay ma Bəla.» 29Yezu ma ləvar: «Ka da təɓa na hərway kah ma nəkadaya, ndaw ma pam 'ar mandzara ka nəkadama na hay na, taya da wuiya.
Guma ma mber ma ɗeriwel a neney
30Yezu na ka key zeheɗ hay ba mekele hiya haɗadzdzay, ka slam dey ma gawla ŋga hay, amana sa na hay na ma winda hiya da ɗeriwel a neney kakay. 31A windəmatərawa neney hay na, ma aza kuray ka pam 'ar Yezu na Kriste, Bəzey ma Bay ma Bəla, ma aza da me pey 'ar a kwar na, ha da ndzafam mendzey da mezəley ŋga.
Currently Selected:
Zaŋ 20: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun