1 Piyer 1
1
Ma səra vaw ta me tsey guma
1Yah Piyer maslaŋ ma Yezu Kriste, i windukuraɓa a ndaw ma gaɗəma na hay, ma pa mey ahiya da 'ar bəla na hay: da Pont, da Galasi, da Kapados, da Azi ta Bitini. 2Ma gaɗəmaya andza na ma Bay ma Bəla Baba me wuɗey ka key andza ha na, ta har ma Mesəfrey Kokwoɗ ana, ma təradata kokwoɗ ahiya, ma ka tsənamar sləmay a Yezu Kriste, ma aza ka da ndzafam mambaz aŋga, ka da pəradata, hayna hahaya ma Bay'ərlam ta zozoy ŋga, ka safukurawa haɗadzidzay.
Me pey dey ka me buwey
3Hayna ma sambəra Bay ma Bəla Baba ma Bay’ərlam a lakwa Yezu Kriste, da ndaw aŋga ma kar da vaw bəza kakay ana na, ka yadandukurawa ba mekelehe, ta ma mbəlawa ma Yezu Kriste da walaŋ ma ndaw ma mətsa na hay, ma lakwa ka ndzafakwa me pey dey na me vəley mendzey ana, 4ma da ndzafada zleley na me zey kakay ana; me tsəley mesəney kakay ana, me ŋgəsey tikay ana, me dedəfey kakay ana zleley ana ŋga na kuray ma da zəmam ana na, ma pa ha tek a kwar da 'ərlam, 5a kuray, na gədaŋ ma Bay ma Bəla ma wafakwar vaw ta me pey 'ar ana, ma da ndzefey me buwey, ma da ɓey vaw ta pas madakwaydakw anay. 6Kəɗey satsa na, ka maməlam da wuiya, kwa andza da mendzey nekəɗey banay a da ndzafakwar da suwet hay gəle gəle tekeɗe na, 7Tek a neney ger ana hay na ndaraw ma me pey ’ar akwar. Gura a slafa me ŋgəsey, ama na a padama a waw ma sərada haɗaw na hayna na. Ma me pey 'ar a kwar na kalkal andza ha atsa. Ŋga na haya ha bəza kakay a fənada gura, ama na a həlafama suwet tiyatsa. Arka ta pas ma Yezu Kriste ma da bawa na, ka da ndzafam me hesəkey bəzay, me Səmbərey ta me wezley dey. 8Yezu aŋga na kuray ma wuɗama mandzara kuray ka nəkadama na, arka kuray ma pam 'ar ka ŋga, mandzara kuray ka nəkadama na satsa; satsa na, ka da maməlam da wuiya ɗuhwa ha baba salam, 9andza masa ma me pey 'ar, ma da ndzafadama, me buwey mezek a kwar hay. 10Ka me buwey ana ŋga na na, ndaw sek hay ka yam vaw ba kambəlaɓa me səpey, taya ma tsəmawa ka hahaya ma vəla ha, zla ka vaw ma kwar ana: 11ndaw sek a hay a səpam na, tek ma mesəfrey ma Kriste na, a da key na da har waray, a da dawam na kassla ta na waray, Mesəfrey ma Kriste ana ŋga na da vaw ta na na, a da ɓadatara ka vaw na, tsetseh ma Kriste ta me wezley dey ŋga, me ndzefey a dəba na. 12A ɓadəmatərawa na, ma vəla ha ma ta na kakay, amana, a tələkadəmərawa mey ta bəzay ma mey neney na, hərway kwar. Ama ekəɗey ndaw ma tələkey mey ta Mey Wayna na hay ma ɓadəməkurawa ta gədaŋ ma Mesəfrey Kokwoɗ ana, ma sləradəmərawa da 'ərlam ana, na madurlam hay a wuɗam me zerɗey dey a ɗəma na.
Təram kokwoɗ ahiya da mendzey kwar tabiyaha
13Hərway ma mey na, mevel a kwar ma həla vaw ahiya tsoy ka meslərey na, hayna wam daw ka vaw, da mendzey kwar tabiyaha na, pam dey na, ka hahaya ma da vələmakwar da ma da ɓawa vaw ma Yezu Kriste ana. 14Andza na ma bəzey ma tsənam sləmay ana hay na, ka da tələkam a tek me sey kwar a zlekete da har ka səradama Bay'ərlam tsaray kakay ana zlay. 15Amana, andza ma ndaw ma zələkurawa ana ŋga kokwoɗ aha na na, kuray tiyatsa na, təram kokwoɗ ahiya da mendzey kwar tabiyaha tey. 16Kavəday ma winda ha da ɗeriwel kokwɗ ana na: Təram kokwoɗ ahiya, hərway yah na kokwoɗ aha… 17Haɗaw da ma ɗula mey kwar, ka zəlam andza Baba kwar aha na, Ndaw ana me weley ndaw tikay ana na, a kadara sariya ma ndaw na, andza ma mber aŋga me key ana, da mendzey kwar a neney ka dala na na, ndzam na da me tsəney sləmay. 18Hayna səradama, a mbəɗəməkurawa da mendzey ana kuray ma ndzafəmawa ka baba kwar ana hay me nefey kakay ana na, ta tek me devesey ana sumkwo dakay na gura kakay, 19amana, ta mambaz hayna, andza na ma bəzey təɓaŋ zlaɓay kava dakay ana, ma təra ha kava dakay ana, mambaz ana na, ma Kriste, 20ma gaɗəma ha ka vaw, zla bəla daha tsaray kakay, ma ɓawa vaw ka me ndəvey ma bəla hərway kwar. 21Ta Kriste na, ka pam 'ar ka Bay ma Bəla, na ma mbəladərawa da walaŋ ma ndaw ma mətsa na hay, arka ma vəlar maram, ha me pey 'ar a kwar, ta me pey dey kwar ma pa ha na ka Bay ma Bəla na.
Gəlam ta guma ma Bay ma Bəla
22Kuray ka bazləməmata mezek a kwar hay tsoy, da ma tsənar sləmay kwar a dərka da ma wuɗey malam a kwar hay haya haya na, mandzara 'erneh da mey tsew ana. Wuɗam vaw ka 'ar vaw kwar ana hay ta mevel tsəzlakka ahiya, mandzara ka mətsakwar har. 23Akwa na, kuray a neney ma yadəməkurawa mekelehe na na, a yadəməkurawa na, ta haləfaw na me zey ana kakay, amana, ta haləfaw na me zey kakay ana, ta guma ma Bay ma Bəla na ŋga ta dey ana ma tsoy aha na. 24Ma winda ha na:
hərway slaw vaw tabiyaha na, andza guzer,
maram aŋga tabiyaha na, andza meverzey ma guzer ana:
guzer ana ka ŋgweley ba na, meverzey ŋga na a kəley;
25ama guma ma Bay'ərlam na a ndzey na ma kwaza ha. Azlakwa guma ŋga na na, Mey Wayna, na ma tələkadəməkurawa mey ana.
Currently Selected:
1 Piyer 1: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun