1 Piyer Ma key ka ’ar ɗaf ma guma
Ma key ka ’ar ɗaf ma guma
Ɗeriwel ma Piyer tsəfəmey ana a windadatara na a kretiyeŋ na da Proviŋs a neney zlam ma Romeŋ ana hay. Da tsakay lam ma bəzay ma Azi bəza na, Turki na ekəɗey ana. Taya ma ndzaya da huɗa na, andza mbəlak ahiya, mavəday taya kretiyeŋ ahiya (1.1; 2.11) Ndaw hay a kərəmata, a nəkafəmata andza ndaw hay kakay.
A ŋgəlafəmata so ha, a marəgaɗəmata, a kadəmata ta huɗa kakay. Ndaw me windey ɗeriwel ana a windadatara, na ma səmadata da ’ar ata me pey ta me pey dey ta. A həladatara bəzay ma ka ndzam na, andza səkway ana Bay ma Bəla ma gaɗəma na.
Ɗeriwel ma Piyer tsəfəmey ana a windadatara na a kretiyeŋ hay, na ma bəmawa da kuley hay gəle gəle na hay. Ekəɗey na, ka yadəmatərwa ba waya ahiya. Da mendzey ta na, andza ma baba tete ta hay sakay, dakay satsa na, andza ma sa ma ndaw ana ka tsakay ta na hay sakay (1.13—2.4). A da təram na ndaw ma səkway ma Bay ma Bəla ahiya (2.4-10). A slafama ma ɓəsama tek ger ana hay ta tsetseh kavəday ma mey na a pam aha dey, arka na a səmadata (1.3, 13, 21; 3.15).
Bay ma Bəla ka lətsadərawa Yezu Kriste ba da memətsey: nəkafa me zley ma me pey dey ma kretiyeŋ hay na ŋga. Me pey dey ana ŋga na na, a dzənata me ɓəsey me tseɗey, ta ma marəgaɗəmata andza ma Yezu ma kawa na. Yezu na ka kawa tsetseh ba, ka tsaɗəmərawa ba, ka kəladama ba. Ŋga na ke key ke sele tikay, ama na ŋga na ma pada ’ar aŋga ka Bay ma Bəla (4.12-19). Ɗeriwel ma Piyer tsəfəmey ana a ɓada na andza neney: mendzey ta memətsey ma Yezu na tek me tsey dey kava ha ma kretiyeŋ.
Tek me tsey dey kava na ŋga na, a ɓada mendzey andza ndaw kretiyeŋ kakay ana hay ta da kominite ma kretiyeŋ hay na teŋgey. Ɗeriwel ana a tsatar guma a ’ar ɗoh na a ndaw na ndaw hay ma ɗəmatar ndaw kakay ana hay (2.18—3.6). A tsey na ka gawla ma ’ay na bay ma ’ay ŋga kretiyeŋ kakay ana, ta ŋgwas na zel aŋga kretiyeŋ aha kakay ana. Me key ma mendzey ta na na, a slafa ma ɓadatara a sa ma ndaw hay me pey ’ar ma kretiyeŋ hay na teŋgey. Da kominite na, ma wuɗa vaw ta me ɗey ndaw a vaw ka ’ar vaw ta na hay na, a dzənata ndaw me kəley ka mey ana hay, gawla hay ka ndaw ka ndaw (5.1-7; 1.22—2.3). Mendzey ana andza na ŋga na na, a ɓadatara a ndaw ma ’ar ma bəlay hay na, ndaw a slafa ma ŋgəlatar bəzay a kretiyeŋ hay kakay.
Currently Selected:
1 Piyer Ma key ka ’ar ɗaf ma guma: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun