1 Tesalonisieŋ 4
4
Mendzey ma dar 'ar a Bay'ərlam ana
1Ekəɗey ana na, malam a ɗaw hay, nəkafama tek ala me tsəhey ka kuray, da na la ma həladəmakwar bəzay da medzəmey vaw ta Bay’ərlam Yezu ana, kuray ma tatəkadəməraɓa ka la ndaraw ma mendzey ma dar ’ar a Bay ma Bəla na, ekəɗey kuray ma ndza hiya na andza ha, hayna səkadama adiya satsa. 2Akwa kuray ana ka səradəmata ha guma na hay, la ma tsəmakwar a 'ar, da mey ma Bay’ərlam Yezu ana seŋgey. 3Tek ma Bay ma Bəla me wuɗey na, ha təram kokwoɗ ahiya, ha mbəkadama me tsəley so ha ba. 4Kwa way way da walaŋ a kwar ka sərada me zəgey ŋgwas aŋga, ma ha da ndzam da mendzey na təɗe ma dar ’ar a Bay ma Bəla na. 5Mandzara tek me sey ka pafakwar wuiya andza ma ndaw Zuif ahiya kakay ana hay ma səradama Bay ma Bəla kakay ana zlay. 6Hayna kwa ndaw ka da kar tek a malam aŋga zlay, ma ka da tərafa malay aha da tek ana ma kar ana zlay, hərway da tek ana ŋga na na, Bay’ərlam a mada gandaf ba, andza na la ma tsəməkurawa ta waw aha kava na. 7Akwa na, Bay ma Bəla a zəlandukurawa na, ma lakwa ka da ndzakwama da me zləɓey kakay, amana, a zəlandukurawa na ma da tərey kokwoɗ ahiya. 8Kəɗey tok na, ndaw ana ma kəladata guma neney ma tsaya a 'ar ana hay na, a key na, a kəley na ndaw kakay, a kəley na Bay ma Bəla ana, ŋga Ndaw ma vəlakwar Mesəfrey ŋga kokwoɗ ana. 9Ka ma wuɗa vaw ka 'ar vaw kwar ana ta malam hay na, ka wuɗam la ka windəməkuraɓa kava dzay kakay, hərway ma mey na, kuray ana ka tatəkəmawa ba ka Bay ma Bəla, me wuɗey vaw ka 'ar vaw kwar ana hay. 10Akwa kuray ana ka kama ha, hərway ma malam hay tabiyaha. Da Maseduwan tabiyaha, la həladəmakwar bəzay ekəɗey ŋgey malam a ɗaw hay, hayna səkadama adiya sa. 11Hayna mevel a kwar ka sərada me ndzey səfekke, hayna ka nəkakwar a dey na, tek a kwar ana hay, ha kam mber ta har a kwar ana hay, andza na la ma ləvəmukurawa na. 12Ma aza da mendzey kwar na, ka slam dey ma ndaw ma 'ar bəla hay na, ka hasəkadəmakwar bəzay, ma kuray ka da ndzam kavəday ma ndaw zlay.
Ma mbəlawa ma ndaw ma mətsa na hay ta me hutey pas ma Bay’ərlam
13Malam ala hay, la wuɗam ma mbəkadəmakwar mandzara ha səradama tek, ka guma ma ndaw ma mətsa na hay kakay, ma aza ha da ndzam da magwam andza ndaw me hutey tek ka mey kakay ana hay zlay. 14Haɗaw azlakwa ka pakwa 'ar, Yezu na ka mətsey ba, arka na ka mbəlawa ba sana, andza ha tiyatsa na, ndaw ma mətsa na hay na, Bay ma Bəla, kavəday ma Yezu na, a da dzəmadata ta Yezu. 15Nəkafama la ma ləvam ana, andza ma me tetəkey ma Bay’ərlam ana, lakwa neney ta dey ana hay ma da ndzey kasl ka ma da mawa ma Bay’ərlam ana na, i da tsafukwata ha mey ka ndaw ma mətsa na hay dakay. 16Hərway ma mey na, Bay’ərlam ana ta 'ar aŋga na, ka da vəla zeheɗ ana ba, ɗay ma madurlam ɗuhwa na, ka da tsəney ba, ta tolom ma Bay ma Bəla ka da tsəney ba na, a da hərɗawa da 'ərlam, arka na, ndaw na ma mətsam ta Kriste na hay, a da mbələmawa ba ka mey ɗagay; 17arka lakwa neney ma zukwawa ta dey ana hay na, a da hələmandakwar ka 'ar ma pazlay andza taya ka masləta ha, ma da tsey 'ar ta Bay’ərlam ka'ar lalaŋ, kəɗey aza tok na, i da ndzakwama səlekw na andza Bay’ərlam. 18Mam 'ərev a vaw ka 'ar vaw kwar ana, ta me tetəkey a neney ana.
Currently Selected:
1 Tesalonisieŋ 4: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun