Mark 3
3
Mbur misi haŋ mumuca
(Yo pura Mat 12.9-14; Luk 6.6-11)
1Yo Yesu a ci ng'ar hay diradibiɗ tuwa ma. Mbur mekelem ada akẽh na, haŋ i mumuca. 2Mizli misi akẽh na, ara jiɗaka Yesu, da a sa mbulo mbur misi haŋ mumuca tuwa, tapas sabata kwana, ɓa a kupakaŋ ɓi. 3Yesu a ɓa mbur misi haŋ mumuca tuwa: «Slikiɗi! So deŋ a wuzla.» 4Dar a ɓa mizli mapuram hiri tuwa: «Ɓi ndra a pul jiviɗ ngi gi mi tapas sabata ka? Ngi gimezle kwa, malla ngi gi malambaˀ kwa? Ngi laha hutuŋ ngi mbur kwa, malla ngi zizaŋ kwa?» Amma mizli a roko teteˀ teteˀe. 5Yesu a bula hiri ar taŋ bal bal ti mevel. Hirnga taŋ migidaŋ na, ɓi nah a giraŋ le haɗi. Dar a ɓa mbur tuwa ma: «Murɗo haŋ!» Mbur a murɗo haŋ muruɗ, joˀ haŋ a ɗiyi. 6A dirba nah, Farisahay a boko, a kusom kutum ati mizli ngisi Herodoy, ɓa a lumam wer ngi ziza hirnga ngi Yesu.
Zigiduw muso ng'avi Yesu
7Yo Yesu a baˀam ati mizli ngi seˀeheye nga mi mubuliy, zigiduw haɗi ara sipakaŋ. A soko baɗ ti hirwuy Galile waɗ ti hirwuy Yude, 8mekelemeye baɗ ti Zerusalem, ti hirwuy Idume, hirwuy ngi dubazaw Zurdeŋ, yo waɗ baɗ ti hirwuy Tir ati Sidoŋ. Zigiduw haɗi a soko ng'avaŋ, asi a cinaka ɓi ngi gwat naŋ maga na le gar. 9Yesu a ɓa mizli ngi seˀeheye, ɓa a wakaŋ vu weˀ le ti palalam, vur mizli masa kurpakaŋ. 10A mbul misi jijihey le haɗi teˀe, vurˀe, misi jijihey gar, a roko ngraɓ ngraɓ ng'ava, ɓa a tutumakaŋ. 11Da setenehey mupuraka Yesu le keɗ na, a ndilam a mbuŋ naŋ, a wudam, a ɓam: «Ki Mangal ngi Buymisemuŋ!» 12Joˀ Yesu a mbura taŋ himaˀ, a ɓa taŋ ɓa a njikakaŋ ta.
Yesu a miwini mizli ngi seˀehey kuruˀ nga cuw
(Yo pura Mat 10.1-4; Luk 6.12-16)
13Dar Yesu a jiɗ nga muwã, a zila mizli naŋ mawuɗ taŋ, a soko ng'avaŋ. 14A wini mizli kuruˀ nga cuw asi taŋ, a ca taŋ slimiɗe ‹misliney›, ɓa a cifam bumoˀ, yo ɓa a slina taŋ nga tila mi ti Ɓimezle. 15A vula taŋ gidaŋ ngi ɓula setenehey. 16Mizli mukuruˀ nga cuw tayna, t'ani: Simoŋ, Yesu a caŋ slimiɗ ti migala Piyer, 17Zak ati sukum naŋ Zaŋ, ziri ngi Zebedeheye, Yesu a ca taŋ slimiɗ ti migala Boˀanerges, mbiɗeˀvra: ziri ngi ndisl ngi vuŋhoy, 18Andre, Filip, Bartelemi, Matiye, Tomas, Zak, mangal ngi Alfe, Tadde, Simoŋ muwuɗa hirwuy naŋ, 19waɗ Yudas Iskariyot, mbur muvula Yesu ɓa a jakaŋ vuna.
Yesu, muy naŋhay a wuɗ a mam di ngi hay
20Yo Yesu a mi ngi haya a muŋ, zigiduw haɗi a kus le si ma, hã Yesu ati mizli ngi seˀehey a lumam haŋ ngi zuma gwata gu ta. 21Muy naŋhaya micinaka ɓi nah na, a ram ɓa ra zuɓoko di, asi taŋ a ɓam na: «Lesl a hiryi le.»
Yesu mimbiɗa mi da mizli majakaŋ ɓi
(Yo pura Mat 12.22-32; Luk 11.14-23; 12.10)
22Joˀ buy ngi ɓimujuwahay musoko ti Zerusaleme, a ɓam na: «Beˀelzebul ada a hirnga!» Yo mekelemey a ɓam: «Naŋ maɓula setenehey na, ti gidaŋ ngi buy ngi setenehey vuna!» 23Dar Yesu a zilo taŋ, a wa taŋ ɓi weˀ ti wi, a ɓa taŋ na: «Satan a ɓula Satana gu mbri mbrike? 24Zumabuyo, da a wuɗuk hirnga naŋ le tehhe a muŋ na, naɓa Zumabuy nah na, anta cici gu ta. 25Yo da mizli ngir hay purla a wuɗkamˀay le ar wala taŋ tehhe muŋ na, naɓa mizli ngir hay nah na, anta sa cicam gu ta. 26Yo da Satan ara kiɗ vu ati hirnga naŋ tehhe a muŋ, da a wunuk le cuw na, naɓa naŋ anta sa cici gu ta, a kiɗ mi le.
27«Amma a hay mbur migidaŋ, mbur anta ci ɓa ava gwat naŋhaya gu ta, sey da a juwaŋ le kaˀ kaˀ dumbuŋ ɗagay far, naɓa a sa ci ng'ava gwat naŋhaya ɓula. 28Gisiŋ, yi ɓu kum na: mungra ngi mizli magaka gar, yo taŋ mazaka Buymisemuŋ haɗi gar na, a sa puya taŋ di avra. 29Amma mbur maza ˀUf Mipal na, anta sa puyakaŋ di avra ta wãˀ. Mungra naŋ a ndir hã ngi sete.» 30A ɓa taŋ kahana, asi taŋ maɓam: «Setene mihirya vu ada a hirnga tuwa.»
Sukum ngi Yesuhoy ati mumuŋ naŋ
(Yo pura Mat 12.46-50; Luk 8.19-21)
31Sukum ngi Yesuhoy ati mumuŋ a ndiloko, taŋ dedeŋ avra. A slinam ɓa a ziloko di. 32Zigiduw a ro jojoˀ gun hirnga naŋ, a ɓakaŋ: «Ani, munuk ati sukum ɗikeye, t'ani avra, ara cufuɗukuw.» 33Yesu a mbiɗa taŋ di: «Maha i waka, sukum ɗuwoy i waniy ka?» 34Joˀ a bula hiri bal bal ar mizli mujojoˀ gun hirnga naŋ tuwa, a ɓi: «Maha ati sukum ɗuwoyo, t'ani. 35Asi ko wa gar magi gwat Buymisemuŋ mawuɗ na, i sukum ɗu mizileŋ, mongoso, yo i maha ma gar.»
Currently Selected:
Mark 3: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.