Mark 2
2
Yesu miɗiya mbur muhulɓa
(Yo pura Mat 9.1-8; Luk 5.17-26)
1Hin neˀ a dirba nah na, Yesu a mi nga Kapernahum. Yo mizli a cinaka le, a ro haya. 2Mizli a kusom haɗi, hã li anta mata, ko a mizlingre kwana, li anta. Joˀ Yesu a dubuna taŋ gwat. 3Mizli mekelemey a ndiloko, a sakaŋ ti mbur muhulɓa, ziley mufaɗ muzuɓoko di. 4Amma a lumam jiviɗ ngi ndil di nga mbuŋ Yesu gu ta, asi zigiduw ngasl ngasl haɗi. Dar a baˀam li njoŋ a hirnga viŋ, hirak ar li Yesu misi anga na. A caka mbur tuwa ti cacala naŋ mutup anga, a pam di sar. 5Yesu mupura tiɓi taŋ na, a ɓa mbur muhulɓa tuwa: «Mangal ɗu, mungra ɗikey a puyam le avra.» 6Mekelemey a wuzla buy ngi ɓimujuwahay ada jojoˀ akẽh. A wulkam a mevel taŋ, a ɓam: 7«Mbur hana a ɓi kahana vur mike? A ra za Buymisemuŋ! Mapuya mungra ngi mburo gu i waka? Sey Buymisemuŋ pal naŋ ta kwa?» 8Angi nah na si na, Yesu a si na taŋ mawulkam a mevel taŋ kanah na le, dar a ɓa taŋ: «Ki wulkam kanah a mevel kumo vur mike? 9Da mbur a ɓa mbur muhulɓa tuwa: ‹Mungra ɗikey a puyam le,› malla: ‹Slikiɗ, zuɓa cacala ɗik, aru na,› mutuwaˀ ta asi taŋ, i wanaka? 10Amma yi wuɗ ɓa ki sinaka, Mangal ngi Mburo naŋ da ti gidaŋ ngi puya mungra ngi mizli a ruwuyo.» A ɓa mbur muhulɓa tuwa: 11«Yi ɓuw, slikiɗ, zuɓa cacala ɗike, aru ngi hay ɗiki!» 12Mbur a slikiɗi. Ar nah si na, a zuɓa cacala naŋ, a bi a mihiri ngi mizli gar, hã a zuma taŋ hirnga teˀ da mizli gar, a gaka dudok da Buymisemuŋ, a ɓam: «Ko i puram gwat kahana ɗaˀ ta wãˀ!»
Yesu mizila Levi
(Yo pura Mat 9.9-13; Luk 5.27-32)
13Yo Yesu a mi nga mi yam madiɗa tuwa a muŋ ma. Zigiduw gar ara so ng'avaŋ, a dubuna taŋ gwat. 14Ti naŋ macuh na, a pura Levi mangal ngi Alfe, ar hay ngi wurka buutu. Yesu a ɓaŋ: «Sipiy!» Levi a slikiɗ, dar a sipaŋ. 15A dirba nah, Yesu ara zum ɗaf a hay Levi tuwa. Micikila buutuhoy ati mizli migi mungrahay haɗi, ara zumam ɗaf ati Yesu waɗ mizli ngi seˀeheye, asi mizli misipi naŋhaya, a gam le haɗi. 16Farisa, buy ngi ɓimujuwahay mupuraka Yesu mazum gwat ati micikila buutuhoy waɗ migi mungrahay na, a ɓaka mizli ngi seˀeheye: «Mbri? A zum gwat ati micikila buutuhoy waɗ migi mungrahay ma sukwa?» 17Yesu micina mingiɓi taŋ na, a ɓa taŋ: «Mizli miwirwireye, t'anta ti may ngi doftoro ta, sey misi jijihey. Yi so ngi zila mizli mijeŋŋehey ta, amma migi mungrahay.
Ɓi ngi dalyam
(Yo pura Mat 9.14-17; Luk 5.33-39)
18Yo ngi pas mekelem ada na, mizli ngisi Zaŋhay ati Farisahay ara gam dalyam. Mizli mekelemey a soko cufuɗaka Yesu, a ɓakaŋ: «Mizli ngisi Zaŋhay ati ngisi Farisahay a ra gam dalyam, amma mizli ngisi kahaya, a gam ta vur mike?» 19Yesu a ɓa taŋ: «Mizli mizilaka taŋ le ng'ar li vula ngwasa, da mbur mavulakaŋ ngwasa, naŋ da a wuzla taŋ na, a gam dalyama gu kwa? Da mbur muzuɓa ngwasa naŋ da ati taŋ aruŋ na, a gam dalyama gu ta. 20Amma hin a sa ndilawa, a sa zuɓaka zil ngi ngwasa ti wuzla taŋ, dar a sa gam dalyam tapasa so. 21«Mbur anta ɗuva zana magala ti gabaga nawaya ta. Asi gabaga nawaya a sa muroho zana magala, a sa ngira nga mbuŋ ava ma. 22Mbur anta zlur mbaazla mideɗek ng'ar kwenekwene magalahaya ta. Asi mbaazla a sa nduzo kwenekweneheye, naɓa kwenekwenehey ati mbaazla, cuw taŋ gar a hiryam le. Amma a zluroko mbaazla mideɗeke ng'ar kwenekwene nawayahay.»
Yesu ati pas ngi sabat
(Yo pura Mat 12.1-8; Luk 6.1-5)
23Yo ngi pas sabat mekelem ada na, Yesu ara cuh tir guva ngi alkamaari. Dar mizli ngi seˀeheye zlaka, a ngurom alkamaari tuwa. 24Vurˀe, Farisahay a ɓaka Yesu: «Pura, gwat mizli ɗikey magaka tapas sabat n'ayɗi, jiviɗ naŋ anta.» 25Yesu a ɓa taŋ: «Ngi pas mekelem ada, Davite, may a jaŋ, a wuɗ gwat ngi zum, naŋ ati mizli naŋhay na, ki slufaka ɓi nah ɗaˀ ta kwa? 26Ti nah na, masay madiɗa i Abiyatar. Davit a ci ng'ar hay ngi Buymisemuŋ, a zuma ɗaf muɗuva hĩˀĩ da Buymisemuŋ. Ɓi ndra a pul jiviɗ da masayay tewle mazumaka ngbaŋ, amma Davit a zum le, a vula mizli ngi seˀeheye ya.» 27Joˀ Yesu a ɓa taŋ: «Sabata, a gaka vur mbur. Amma mburo, a gaka vur sabat ta. 28Vurˀe, Mangal ngi Mburo, i buy ngi sabat vuna.»
Currently Selected:
Mark 2: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.