Mark 11
11
Yesu mici nga Zerusalem
(Yo pura Mat 21.1-11; Luk 19.28-40; Zaŋ 12.12-19)
1Ti taŋ mandilam nga Zerusalem, gweˀ avu Betfage ati Betani, kini ng'avi muwã Tutumbur na, Yesu a slin mizli ngi seˀehey cuw, a ɓa taŋ: 2«A ram ng'ar walahay ngi mbuŋ kum na. Kum masa cam ti ci aruŋ si na, kisa lumam zinga ngi zungu mujuwa le kaˀ, mbur a jiɗ ɗaˀ a duba naŋ t'aruŋ. Puskoko di, soko di. 3Da mbur a cufuɗukum le: ‹Ki gam di mike› na, ɓakaŋ: ‹I Buy mawuɗo.› Naɓa a sa pulukum di ng'aka kutumo si.» 4Joˀ a ram, a lumam zinga ngi zungu, mujuwa le kaˀ a jiviɗe, gweˀ avu mizlingre. Dar a puskakaŋ. 5Mizli mekelemey misi akẽh a ɓaka taŋ: «Ki puskaka zinga ngi zungu nah ngi gi mike?» 6Taŋ a mbiɗaka taŋ di kaɓa Yesu muɓa taŋ tuwa, joˀ mizli a pulaka, a ram di. 7A ram ti zinga ngi zungu tuwa da Yesu, a ciyaka zana taŋhay a duba naŋ, Yesu a cifi anga. 8Mizli haɗi a ciyaka zana taŋhay a jiviɗe, mekelemey a bucam kalafay, taŋ mungumoko taŋ ar guvahay. 9Mizli maram a mbuŋ, waɗ masipakaŋ na, a tilam mi: «Buymisemuŋ naŋ ti dudok! Anja Buymisemuŋ a ɗuwula mi da mbur maso ti slimiɗ nga naŋ Bumbulvuŋ!
10Anja Buymisemuŋ a ɗuwula mi da Zumabuy masa sawa, zumabuy ngi cine ndra Davit!
Dudok da Buymisemuŋ misesẽŋ a muŋ!» 11Joˀ Yesu a ci nga Zerusaleme, ara ci ar hay ngi Bumbulvuŋ. Naŋ mubula hiri bal bal gun hirnga naŋ, naɓa hiikuɗ migi le si na, a bi, aru nga Betani ati mizli mukuruˀ nga cuwoyo.
Yesu minisa ˀurufu
(Yo pura Mat 21.18-19)
12Ngi li naŋ muwun, ti taŋ maboko ti Betani na, may ara ja Yesu. 13A pur ˀuruf kileŋ, miɗiɗi le tukuf, aru nga pura da zliv a lum yi avaˀa kwana. Amma ti naŋ mindil ava na, a lum sey kalaf tewle, asi i hin ngi yi ngi ˀuruf t'aruŋ. 14Dar Yesu a ɓa ˀurufo: «Anja mbur a zum yi ɗike mata ndiɗaˀ wãˀ!» Mizli ngi seˀehey ara cinakaŋ.
Yesu ar hay ngi Bumbulvuŋ a Zerusalem
(Yo pura Mat 21.12-17; Luk 19.45-48; Zaŋ 2.13-22)
15Yo a ndilam a Zerusaleme, Yesu mici ng'ar hay ngi Bumbulvuŋ na, a zla ɓula migi cikilihey ati mihiɗika gwatay ar hay ngi Bumbulvuŋ, a putukuso tebur ngi mimbiɗi dalahay ati janga ngi migi cikili ngi ɗiyuw dirgwaɗaya. 16A pul mbur ko pal, a zuɓ gwat ɓa a cuh di tir hay ngi Bumbulvuŋ ta wãˀ. 17Joˀ a dubuna taŋ gwat, a ɓa taŋ: «A tohoko na: ‹Hay ɗu, a sa zilaka hay ngi dira dibiɗ vur sukwi ngi mizli gar ta kwa?› Amma kumo, ki tiram di buutum ngi mufuyvuhoy mbrike?» 18Masay madiɗahay ati buy ngi ɓimujuwahay, a cinaka ɓi nah le, a puram wer ngi ziza Yesu, amma ara zluwunam, asi gwat naŋ madubuna da mizli na, a ga mizli welele. 19Hiikuɗ miji na, Yesu ati mizli ngi seˀehey a bam tir walahaya.
Yesu ati ˀuruf muˀulo
(Yo pura Mat 21.20-22)
20Ti taŋ macohom ngi miprike na, a puraka ˀuruf tuwa, a muˀul le sok gar ti slaslalak naŋhaya. 21Piyer a wulka keŋ, a ɓa Yesu: «Kumani, pura ˀuruf ka minisa tuwa, a muˀul le soko.» 22Yesu a mbiɗa taŋ di: «Tuɓaka Buymisemuŋ! 23Gisiŋ, yi ɓu kum na: Da mbur a ɓa muwã hana le: ‹Budugur ti kẽh, ara ndil ar mubuliy›, da a wuluk cuw cuw a mevele ta, amma a tiɓa le, gwat hana a sa gi na, a sa pulakaŋ jiviɗ nah. 24Vurˀe, yi ɓukum na: Gwat gar kum macufuɗam ar diradibiɗ na, tiɓaka, kite ki lumaka le si, a sa vulukum gwat nah vuna. 25Da ki cicam le deŋ, ki ra diram dibiɗ, da ki zluɓam ɓi le avu mbur na, gakaŋ wereke, ɓa Cine kum misemuŋ a pulukum mungra kumoy ya. 26Amma da kum anta ki pulaka gwat malambaˀ ngi mizli magukum di ta na, naɓa Cine kum mise amuŋ anta sa pulukum malambaˀ kumo ta ya.
Yesu a lum gidaŋ ngi gi gwat avu waka?
(Yo pura Mat 21.23-27; Luk 20.1-8)
27Yesu ati mizli ngi seˀeheye, a mam nga Zerusalem a muŋ. Ti Yesu maliˀi a hur hay ngi Bumbulvuŋ na, masay madiɗahay ati buy ngi ɓimujuwahay waɗ mizli micawwahay a kirohoko ng'avaŋ, 28a ɓakaŋ: «Ka maga gwat hana ti gidaŋ ngi waka? Muvuluw gidaŋ ngi gi naŋ i waka?» 29Yesu a ɓa taŋ: «Y'ani cufuɗukum purla si. Mbiɗikiy di. Yo ɓa ya maga gwat hana ti gidaŋ ngi waka na, yi sa ɓukum di ya: 30Zaŋ mici mizli ar yama, mislino di i Buymisemuŋ kwa, malla i mizli mislinoko di? Mbiɗikiy di so.» 31Ammahirik a ngilam wuy ar wala taŋ, a ɓam: «Dˀani i ɓam le: ‹I Buymisemuŋ mislino di› na, a sa ɓi: ‹Na, ki tiɓakaŋ ta vur mike?› 32Malla da i ɓam le: ‹I mizli mislinoko di ma› na, na, i zluwunam ti zigiduw ma, asi mizli gar a sinaka le, Zaŋ i mijiviɗ gisiŋ. 33Dar a mbiɗaka da Yesu: «I si na ka ta» Yesu a ɓa taŋ: «Ya kwana, kanah ya. Ya maga gwat hana ti gidaŋ ngi waka na, y'anta ɓukum di ta ya.»
Currently Selected:
Mark 11: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.