Mark 12
12
Ɓi ngi mizli misi moˀorehey ar guva ngi gudubun
(Yo pura Mat 21.33-46; Luk 20.9-19)
1Joˀ Yesu a zla a wa taŋ ɓi ti wiˀ, a ɓa taŋ na: «Mbur ada, a gi guva ngi gudubun, a guno hirnga naŋ ti zluɓ, a li vigiɗ ɓa ngi sa ɗuco yi naŋ anga, yo a ndir hay madiɗa ngi jigin naŋ. Dar a pula guva asi haŋ ngi migi slrahay, joˀ naŋ aru nga mulak. 2Hin a ndila le muduba, buy ngi guva, a slin gawla naŋ ng'avi migi slra ngi gudubunoy tuwa, ɓa a tiɓakaŋ mi nga naŋ avu taŋ ya. 3Amma migi slraˀahaya jakaŋ, a mbakaŋ ti kiɗ, a pulakaŋ, a mi kavbar kine. 4A slin gawla mekelem ma. A kiɗakaŋ a hirnga, a zakaŋ. 5A slin gawla mekelem mani, a kiɗaka nah vagay wãˀ waɗ gawla mekelemey haɗi ma, a mbaka mekelemey ti kiɗ, yo numuŋhoy, a kiɗaka taŋ vagay vagay. 6Mindiraŋ na, sey mangal naŋ miteŋteŋ na tewle. Ar kiɗa mi naŋ na, a slinaŋ ng'avi migi slra ngir guvahay tuwa, a ɓi a kwacay naŋ na: ‹Ko mbrike na, a sa kilam mesem ngi mangal ɗu.› 7Amma migi slra ngir guvahaya a ɓam ar wala taŋ: ‹Puraka, ngi diga na, i muzuma hay naŋ. Akum, kuɗukum di, ɓa guva ngi gudubuno, a ndir da ndra.› 8A jaka mangal tuwa, a kiɗaka vagay, a hizigaka tir guva ngi gudubun avra.» 9Yesu a ɓi: «Buy ngi guva a sa gi mbrike? A sa sawa, a sa kiɗa migi slra ngir guva tayna vagay vagay, a sa pula guva asi haŋ ngi mizli mekelemey. 10Ɓimutoho miɓi ani na, ki slufaka ɗaˀ ta kwa:
‹Ɗugur mindira hayay mihizigaka avra na, mitiri ɗugur hirnga i naŋ.
11Hana i slra ngi Buymisemuŋ,
i gwat hirnga wãˀ avu ndra ngi pur hiri ngal ngal!›»
12Joˀ a puram jiviɗ ɓa a jaka Yesu zleˀe, asi a slaka wala nah le kuy kuy, a kicuwula ɓi hana vur taŋ. Amma a zluwunam ti zigiduwo, a pulaka mbak, joˀ taŋ a cohom.
Buutu mawurkaka da buy mimadiɗa
(Yo pura Mat 22.15-22; Luk 20.20-26)
13Buy ngi ɓimuwahay a slinam mizli mekelemey a wuzla Farisahay ati mizli ngisi Herodoy, ɓa ara cam a kwacay Yesu, a jakaŋ ar mingiɓi naŋ. 14A soko, a ɓakaŋ: «Kumani, i sinaka le, ka ki ɓi njah njah, ko mbur matikinuw gu anta. Asi k'anta pur di i deŋ ngi mbur ta, amma ki ra dubuna jiviɗ ngi Buymisemuŋ kasl kasl da mizli. Na jiviɗ ada ngi wurka buutu da buy mimadiɗaa kwa, malla anta kwa? Sey i wurkaka kwa, malla i wurkaka ta kwa?» 15Amma wuluk taŋ mucuw cuw na, Yesu a si na le, a ɓa taŋ: «Ki cam a kwacay ɗu vur mike? Sikiy ti suloy pal ɓa i puraŋ.» 16A sakaŋ di, joˀ Yesu a ɓa taŋ: «Foto hana ati slimiɗ mutoho ngi ra na, i ngi waka?» Taŋ a mbiɗakaŋ di: «I ngi buy mimadiɗa Tiber.» 17Yesu a ɓa taŋ: «Gwat ngi buy mimadiɗa, wurkaka da buy mimadiɗa Tiber, yo gwat ngi Buymisemuŋ kwana, wurkaka da Buymisemuŋ ya.» Ɓi naŋ mumbiɗa taŋ di hana, a zuma taŋ hirnga le haɗa.
Cufuɗ ar slikiɗ ngi mizli mumucahay
(Yo pura Mat 22.23-33; Luk 20.27-40)
18Mekelemey a wuzla Sadukiheye, a soko ng'avi Yesu. Taŋ a ɓam mizli mumucahay anta slikiɗam ta. A cufuɗaka Yesu, a ɓakaŋ: 19«Kumani, Moyis a toho ndra di na: ‹Da mburo, naŋ da ti sukum naŋ, a muc le, a pul ngwas le, amma zuŋ anta na, sey sukum naŋ a ngila wudiga nah, ɓa a yi da sukum naŋ, mumuca tuwa.› 20Zleˀe na, mizli sukumuŋhoy ada tarnaˀ. Mudumbuŋ a zuɓ ngwas, a muc, a pul zuŋ ta.
21Mucuw naŋ a ngila wudiga tuwa, a muc, ko a pul zuŋ ta ma. Naŋ kanah avu sukum taŋ mimakir taŋ ya, 22hã tarnaˀ taŋ gar a ngilaka ngwasa, amma a micam, ko a yam zuŋ pal ta. A dirba taŋ gar kwana, ngwas tuwa a muca ya. 23Ani, tapas mizli mumucahay masa slikiɗam na, ngwas a sa ndir da wa asi taŋ ka? Asi taŋ tarnaˀ taŋ gar a ɗuvaka le.» 24Yesu a ɓa taŋ: «Kumo, ki ra zluɓaka haɗi, vur mike? Asi ki sinaka Ɓimutoho ta, ki sinaka gidaŋ ngi Buymisemuŋ ta ma. 25Asi mike na, tapas mizli mumucahay masa slikiɗam na, zuɓa zil anta, ko zuɓa ngwas anta, amma a sa ndiram kaɓa modrohoy a ciki Buymisemuŋhoy. 26Da vur ɓi ngi mizli mumucahay masa slikiɗam na, ɗerewol ngi Moyis miɓa ɓi ngi sisim mawur na, ki slufaka ɓi nah ɗaˀ ta kwa? Buymisemuŋ a ɓa Moyise: ‹Yi Buymisemuŋ ngi Abraham, Buymisemuŋ ngi Izak waɗ Buymisemuŋ ngi Zakop.› 27I Buymisemuŋ ngi mizli mumucahay ta, amma ngi mizli misi ti siifahay. Ki zluɓaka le haɗi wãˀ.»
Ɓimuɗuva mifineˀ mekelemey
(Yo pura Mat 22.34-40; Luk 10.25-28)
28Mbur ada, i buy ngi ɓimujuwa, a kirahawa, a cine taŋ magam mi na le. A pura na, Yesu a mbiɗa taŋ di le kaslsla. Vurˀe a cufuɗaŋ: «Ɓimuɗuvahaya, madiɗa ngi wuzla taŋ gar i wanaka?» 29Yesu a mbiɗaŋ di: «Mudumbuŋ n'ani: ‹Cin, Israyel, Bumbulvuŋ Buymisemuŋ ndra, Bumbulvuŋ i naŋ pal naŋ. 30Sey ki wuɗ Bumbulvuŋ Buymisemuŋ ɗike ti mevel ɗik wãˀ, ti membezleŋ ɗik wãˀ, ti lesl ɗik wãˀ, waɗ ti gidaŋ ɗik wãˀ.› 31Mucuw naŋ kwana, n'ani: ‹Wuɗ mbur cil ɗike, kaɓa ka mawuɗ hirnga ɗik vuna.› Ɓimuɗuva madiɗa mufuna mucuw hanayna anta mata.» 32Buy ngi ɓimujuwa tuwa, a ɓa Yesu: «Naŋ kuy haɗa, Kumani, ka miɓa na kaslsla: Buymisemuŋ, i naŋ pal naŋ, mekelem mbak naŋ le na, anta. 33Yo wuɗ naŋ ti mevel ɗik wãˀ, ti lesl ɗik wãˀ, ti gidaŋ ɗik wãˀ, yo wuɗa mbur cil ɗik kaɓa vu ɗik na, a funa ginewey mazlumaka taŋ ati magam taŋ mikulihey na le.» 34Yesu a pura mbur nah, a mbiɗaŋ di le ti sinmijileŋ, dar a ɓaŋ: «K'anta kileŋ avu Zumabuy ngi Buymisemuŋ ta.» Mbak ko mbur matum vu ngi cufuɗ naŋ, anta mata.
Mesi ati Davit
(Yo pura Mat 22.41-46; Luk 20.41-44)
35Yesu a dubun gwat da mizli ar hay ngi Bumbulvuŋ a Zerusalem, a ɓi: «Buy ngi ɓimujuwahay a ɓam, Mesi i mangal ngi Davit na, mbri mbri maka? 36Davit vuna, ˀUf Mipal a njikaŋ di, a ɓi:
‹Buymisemuŋ a ɓa Buy ɗu na:
Cifi tir vay hazum ɗu,
ɓa hã i hina mesene ɗikey asi sar ɗiki.›
37Davit ti hirnga naŋ, a zila ‹Buy›. Na, Mesi a sa tiri i mangal naŋ mbri mbri maka?»
Yesu miɓa mizli ɓa a jam lesl avu buy ngi ɓimujuwahay
(Yo pura Mat 23.1-36; Luk 20.45-47)
Zigiduw haɗi ara cine mingiɓi ngi Yesu ti mumul. 38Ar dubuna gwat da mizli na, a ɓa taŋ: «Jam lesl avu buy ngi ɓimujuwahay mawuɗam liˀi ti jibe madiɗahay, mawuɗam sey a jaka taŋ haŋ ar li ngi luuma na. 39Angi hay ngi diradibiɗeye, a wuɗam sey li cifi ngi mbuŋ. Da a zilaka taŋ le nga zuma gwat na, a wuɗam sey li cifi ngi mbuŋ. 40A ra zumaka zlili ngi wudigahaya, yo da ara diram dibiɗ na, a zikam di kwiliŋ kwiliŋ, ɓa mizli a sinaka taŋ. A sa gaka taŋ kiita mutuwaˀ miwãˀ naŋ!»
Ngwas wudiga muvula gwat naŋ
(Yo pura Luk 21.1-4)
41Yo Yesu a cifi le puɗak angi gwat macikilam di dala ar hay ngi Bumbulvuŋ, ara jiɗa zigiduw mapa dala ng'araŋ. Misi zlilihey haɗi a pam dala haɗi. 42Ngwas wudiga misi murga, a so pi dala memeɗehey cuw, i sisihey. 43Yesu a zilo mizli ngi seˀeheye, a ɓa taŋ: «Gisiŋ, yi ɓukum na: ngwas wudiga misi murga hana, a pi dala ng'ar sunduruko, fineˀ mizli mekelemey gar. 44Asi mizli gar na, a vulam di i mineˀ ngir zlili taŋ mawuɗam mata, amma ngwas hana, ko ti viya naŋ na kwana, a zuɓa si haŋ naŋ, naŋ mangir di gar na, a paŋ.»
Currently Selected:
Mark 12: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.