LEVIHEY 1
1
MEZEGWEL NGI GI MIKULIHEY
Mikuli ngi zlum ti zlum
1Bumbulvuŋ a zila Moyise zle ar guɗuk ngi zlir ti naŋ, a ɓaŋ na: 2«Ɓa Israyeleye na: da kaɓa mbur muwuɗ le ɓa a vuliy gwat da ya Bumbulvuŋ ngi giy di mikuli na, sey a so di i tumuŋ, ˀaw malla sla. 3Da mbur a wuɗ le, ɓa a gi mikuli mizlam zlam wãˀ ti sla na, sey a jo di i sla mizile, manja hereweɗ ava. Aru di nga mizlingre guɗuk ngi zlir ti ya, ɓa i tiɓaŋ. 4Mbur tuwa, a buca haŋ bac a hirnga ginewe, ginew nah na, kite i mitiɓa le ti haŋ mbur muso di ngi gi mezegwel ngi vula jiviɗ ngi pula mungra. 5A slaka ˀay ngi ginewe daˀ a mbuŋ ɗu. Akẽh, masay, ziri ngi Aroŋhoy, a tiɓaka pumbus ngi ginew tuwa, a bigikiy di. Li gi mikuli mikaˀ a mizlingre guɗuk ngi zlir ti ya Bumbulvuŋ na, masayay a kucaka ciki naŋ gun gun zlar ti pumbus tuwa. 6A suwutaka ginewe, waɗ a puwaka ti sila ti sila. 7Akẽh na, masay Aroŋ, ziri naŋhay a bulam vu ar li gi mikuli waɗ a pam dumoy ar vu tuwa. 8Useˀ mupuwaka ti sila ti sila, jom ati hirnga, mungul naŋ, ziri ngi Aroŋhoy a paka taŋ ng'ar dum miɗiyam di vu ar li gi mikuli tuwaŋ. 9A bunaka gwat ngi kwacay naŋhay ati poprokoyo, joˀ masay a wura taŋ gar ar vu, ar li gi mikuli. Hana i gwat ngi zum mizlam zlam wãˀ, misi zĩˀĩ naŋ a tisliy mevel da ya Bumbulvuŋ. 10Da mbur a wuɗ le a gi mikuli mizlam zlam wãˀ ti tumuŋ malla ˀaw na, sey a jo di i ginew mizileŋ, manja hereweɗ ava. 11A slaka ˀay naŋ a mbuŋ ɗu, ya Bumbulvuŋ. A slaka kini tir vay muŋ ngi li gi mikuli. Akẽh na, masayay, ziri Aroŋhoy a kucaka ciki li gi mikuli gun ti pumbus naŋ. 12A puwaka ti sila ti sila, hirnga jom ati mungul naŋ, masay a pa taŋ ng'ar dum miɗiyam di vu ar li gi mikuli tuwaŋ. 13A bunaka gwat ngi hur kwacay ati poprokoyo. A dirba nah, masay a bigiy taŋ, a zluma taŋ zlam zlam wãˀ ar li gi mikuli. Hana i gwat ngi zum mizlam zlam wãˀ, misi zĩˀĩ naŋ a tisliy mevel da ya Bumbulvuŋ. 14Da mbur a wuɗ le a gi mikuli mizlam zlam wãˀ da ya Bumbulvuŋ ti ɗiyuw na, sey a jo di i gonok malla ɗiyuw dirgwaɗa. 15Masay aru di a mbuŋ li gi mikuli. A muɗa hirnga naŋ ndeɗ, a wura ar li gi mikuli. A dirba nah, a pula pumbus naŋ a mul a hur li gi mikuli gun. 16Masay a ɗiɗo mombok naŋ ti gwat ngi huroˀo gar, a hiziga fuk a ciki li gi mikuli, kini tir vay sipas ngi mipriki, ng'ar li mapaka fucu ngir li gi mikuli anga na. 17A ja kirpasl ngi ɗiyuwo kaw, waɗ a ngira pitikay. Amma a wuɗka a wuzla cuw ta ɓula. A dirba nah na, masay a zluma ɗiyuwo ar dum miɗiyam di vu ar li gi mikuli tuwaŋ. Hana i gwat ngi zum mizlam zlam wãˀ, misi zĩˀĩ naŋ naŋ a tisliy mevel da ya Bumbulvuŋ.
Currently Selected:
LEVIHEY 1: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.