MALASI 2
2
Ki mumuyuŋ ngi zay sla a slimiɗ masayay
1Kum masayay, wurenna i ra kukum mumuyuŋ ngi zay sla a slimiɗ: 2Da kum anta cinam ta, yo da kum anta tiɓaka a mevel kumo ngi cikikiy hirnga ta na, i sa nisukum, yo ya muɗuwulukum mi zleˀe na, i sa tiri di nis. Naŋ kanah, i sa tiri di nis na, asi a wuzla kumo, ko mbur purla matiɓa ɓi nah a mevele, anta. 3Y'ani i guduk guduk ti dideˀ kumoyo. I sa kupukum zay ngi gwatay avu hiri, i zay ngi ginewey, kum magam taŋ mikuli tapas muguzlum kumoy na. Joˀ a sa slurukum slar slar jom ati zay ngi gwatay vuna ng'avra. 4Ki sa sinaka, ya mukukum mumuyuŋ ngi zay sla a slimiɗ na, ɓa jumoˀay ɗu ati leviheye, a gi i gisiŋ. I ya Bumbulvuŋ misi gidaŋ wãˀ maɓi. 5Jumoˀay ɗu ati leviheye, i ngi vula taŋ siifa ati zuy, asi yi ga le ɓa a cinam mi, ɓa a ɗuvikiy hirnga. Slimiɗ ɗu a jijika taŋ le. 6Ɓi ngi dubun da mizli mabo ti balam taŋ na, naŋ kaslsla, ko ɓi ngi gi gilaw a bo tivi irneˀ taŋ neˀ ta. A cifi avu ya ti ngiɓiˀay mezle, mikaslsla. Mizli mingizlam ng'ar jiviɗ mijeŋ ta na, a mo taŋ le haɗi a wuzla taŋ. 7Asi mike na, masay a dubun di i sin da mizli, yo mizli a sipam dubun mabo ti balam naŋ, asi naŋ i mislin ngi Bumbulvuŋ misi gidaŋ wãˀa. 8Na kumo jak ma na, ki baˀam le avu jiviɗe. Ki zizam mizli haɗi ti dubun, kum madubunaka taŋ di na. Jumoˀay ngi Levi na, ki ngilaka ɓi nah le. I ya Bumbulvuŋ misi gidaŋ wãˀ maɓi. 9Ya kwana, i sa ga ɓa mizli gar a purukum hiris le, a ɗuvam sar ar kum, asi kum anta sipaka jiviɗ ɗu ta, yo ma na, ar ɓi kum majuwaka gar na, kum anta gaka ɓi nah vur mizli rak rak gar ta.
Ngila ɓi ngi jumoˀay ti jiviɗ wal wal cuw
10Ndra gar ndra, cine ndra purla takwa? Miga ndr'i Buymisemuŋ mupurla na takwa? I ngilam ɓi ar wala ndra, yo jumoˀay ngi dideˀ ndrahay ati Buymisemuŋ, i hiryaka kahana vur mike? 11Zudahay a ngilam ɓi le, yo gi gwat malambaˀ mukuyta wãˀ a gi le asi ruwuy Israyele, waɗ a Zeruzaleme ma. Naŋ kanah, Zudahay a hiryaka li mipal ngi Bumbulvuŋ mawuɗ haɗa na le ti zuɓa ngwasay mahuruk hurukam a mbuŋ kulihey. 12Mbur magi kahana na, anja Bumbulvuŋ a kiɗa hilfa ngi hay naŋ gar ti wuzla Israyeleye. Ɓa ngi so ti gwat ngi mikuli ar deɗe naŋ da Bumbulvuŋ misi gidaŋ wãˀa na, anja ko mbur anta mata, 13Gwat kum magaka mucuw naŋ ani ma: Ki luɓoko li gi mikuli ngi Bumbulvuŋ ti tuwuy ngi hiri kumo, hã hirnga naŋ gun ti tuwuy ati niˀici, asi naŋ maki slimiɗ ar gwat kum masakaŋ taŋ ngi mikuli na mata, yo naŋ anta tiɓa taŋ ti mevel mezle tisi haŋ kumo mata. 14Joˀ ki ɓam na: «A gi kahana vur mike?» a gi kahana na, asi Bumbulvuŋ, ngwas ɗik ka muzuɓa paɗ ngi gawla ɗik na, Bumbulvuŋ a gi sedewo naŋ le, amma ki ngila ɓi nah le. Ngwas nah i mucuw ɗik, yo ki jumomˀay le cuwa ngbaŋ. 15Ani Bumbulvuŋ a gukum i dumvu purla, dumvu misi ti musuwun ati siifa takwa? Dum vu purla nah a sipi di i mike? Yi ziri Buymisemuŋ mavula taŋ na takwa? Jam lesl vur dumvu kumo. Anja mbur a ngila ɓi ngi ngwas naŋ muzuɓa paɗ ngi gawla naŋ na ta. 16Asi mike na, ya Bumbulvuŋ Buymisemuŋ ngi Israyele, i ɓi na, ka maɓula ngwas ɗik vur ka mihirsa le na, kite ki gaŋ di i moˀore. I ya Bumbulvuŋ misi gidaŋ wãˀa maɓi. Jam lesl vur dumvu kumo. Anja ki ngilam ɓi ta.
Bumbulvuŋ a sa slino mislin naŋ
17Ki giraka Bumbulvuŋ ti mi kum mukoloŋ koloŋ na. Ki ɓam na: «Ndrˀada i girukuw kwa?» Asi kum maɓam: «Mbur magi malambaˀ na, naŋ kuy a mihiri ngi Bumbulvuŋ, yo mizli misi ka tayna a cirakaŋ hiri», yo ki ɓam ma na: «Buymisemuŋ migi kiita vuna naŋ maka?»
Currently Selected:
MALASI 2: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.