ZOWEL Ɓi madiɗa madiɗa ngi raˀa
Ɓi madiɗa madiɗa ngi raˀa
Mingiɓi ngi Zowel na, a cica mizli zlak gidaŋ gidaŋ wãˀ, hã vi skat skat mbeˀ mbeˀe. Na mijiviɗ Zowel vuna, i waka, a bo hirak ar vi wanaka na, i sinakaŋ ta ɓula. Ɓi Hirnga ngir ɗerewol Zowel na, i tila mi waɗ slufa ɓi ngi hin Bumbulvuŋ mibiga gidaŋ naŋ waɗ naŋ miga kiita da mizli naŋhay ar hay naŋ, yo Israyeley migaka gwat hiri hiri avu Buymisemuŋ taŋ, yo mizli mulakay magaka gwat hiri hiri avu Israyeley. Dumbuŋ ar hin ngi kiita na, masa sawa i mihirya gwat, a sa tika gwataya cek cek, li a ndir njoŋ. Mevreŋhey a sa soko kirmiɗ kirmiɗ ɓaˀ li, kwalay, vu a sa zlizlira gwataya, sojehey sirgiɗim, a sa bunaka ɓi ngi gidaŋ ngi mihirya gwata tapasa (1.2-12, 15-18; 2.1-11). Da mijiviɗ a lumo ɓi naŋ ar gwatay migam gisiŋ ar hin ngi siifa naŋ tapasa malla da i gwat misawa a hirnga naŋ kanah, ɓa a til di mi kwana, ko gwat mabiga ndra di anta. Na gar ti nah kwana, gwat naŋ matil di mi vuna, naŋ njah wãˀ ɓula: A tiɓaka gwat ngi Israyeleye le gar, jom ti gwatay taŋ magam taŋ slra ar hay ngi Bumbulvuŋ, vurˀe, a mbiɗam hiri ng'avi Buymisemuŋ ɓa a tumbulokoŋ, (1.13-14, 19-20; 2.1 2-17). Mutiɓaka gwat ngi Israyeley gar na, a tiri avu taŋ i ngi lih taŋ. Gwat a sa gi avu taŋ ka zay, Buymisemuŋ a ɓa taŋ di ɗaˀ ɗaˀ le (2.1 8-27, 3.1-5; 4.1 7,18-21) Buymisemuŋ miji mevel, a ga ɓa gwat a kica Israyeley, a ndiram njoŋ kine dumbuŋ na, mingiɓi ngir ɗerewol hana a ngum ta. A sa ngizlaka mizli mulakaya ti ja taŋ ar kiita (4.1-16), amma sekvu sekvu na, Israyeley a sa sinaka mbiɗeˀvra ngi Buymisemuŋ misi a wuzla taŋ. Ɗerewol ngi Zowele, a njika, a ɓi ko tuvunaka na, Buymisemuŋ misi a wuzla taŋ na, mbur gar a sa sinaŋ, asi Buymisemuŋ a sa po ˀUf naŋ ar mizli gar (3.1-2). Gwat Buymisemuŋ miɓa ɗaˀ ɗaˀ le tuwa, misikristu mudumbuŋhoyo, a puraka le wãˀ tapas pantekoto (Slra 2.1 6-21).
Currently Selected:
ZOWEL Ɓi madiɗa madiɗa ngi raˀa: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.