ZOWEL 4
4
Bumbulvuŋ maga kiita da sukwi mekelemmey
1Bumbulvuŋ a ɓi: «Haˀaw, ti di nah na,
ti ya misa ɗiya hiri ngi Zuda ati Zeruzaleme le na,
2i sa kuso sukwi ngi mizli gar,
i sa pi sar ti taŋ ng'ar sozo mazilaka ‹Bumbulvuŋ migi kiita›.
I sa ga taŋ kiita a diga,
asi Israyel, mizli ɗuwoy, yo mi nga yahay:
vur a zliɗaka taŋ hirnga le mber mber nga wuzla mizli mekelemey,
yo a wunkaka hirwuy ɗu le da taŋ.
3A kiɗam caca le ti mizli ɗuwoyo,
ziri mizileheye, a hiɗikam taŋ ngwas sulomehey le,
ziri mongosohoyo, a hiɗikam taŋ mbaazla le,
a sakaŋ.
4Kum mizli Tir ati Sidoŋhoy,
waɗ kum mizli vay Filistihey gar:
Ki wuɗam mi avu yaka?
Ki pulaka cuwal kum avu ya kwa?
Na, da ki wuɗam di i pula bol na,
naɓa y'anta zum vu ta, i sa pula cuwala kutum ar kumo si.
5Kum mizli mihilaka ɓiri bara ati ɓiri tapasl tapasl ɗuwoy na,
kum mipaka zlili ɗu mupuɗaw puɗaway ar hay kuli kumoy na,
6kum mihiɗikaka mizli Zudahay ati Zeruzalemey
da mizli Grekey, ɓa a cohom taŋ kileŋ avu hirwuy taŋ na,
7i ya masa ra puɗuka taŋ angi hirwuy kum mihiɗikaka taŋ ng'ara na,
yo malambaˀ kum migaka na, i sa mbiɗa nga hirnga kum a muŋ.
8Ziri mizile ati mongoso kumoyo, yi sa hiɗika taŋ da mizli Zudahay.
Zudahaya kwana, a sa hiɗika taŋ da mizli Sabeŋ, sukwi mikileŋhey.
Maɓa hana i ya Bumbulvuŋ!
Kiɗavu ngi dirba wãˀ waɗ gi kiita
9Tilam mi da sukwi mekelemeye, ɓaka taŋ na:
Juwam vu nga kiɗa vu, puɗukaka migi vurum kumoyo.
Anja migi vurumoy gar a jaka jiviɗe, a ram.
10Sliŋ ngi gam ngi sla kumoyo, vuɗam taŋ maslalamay.
Slagway kumoyo, vuɗam taŋ ziwitey.
Ko mizli hĩhĩy muwãˀ naŋhay kwana,
anja a ɓam: «Ndr'i bugawlahay!»
11Kum mizli ngir prokoy gar,
wusoko vu, soko,
kusom ar sozo misi purla.
Ka so na Bumbulvuŋ, slin ti bugawla ɗikeye ng'ar taŋ!
12Bumbulvuŋ a ɓi: «Anja sukwi ngi mizli mekelemey a zuɓam jiviɗ,
anja a ram ng'ar sozo
mazilaka ‹Bumbulvuŋ a gi kiita›.
Ya masa cifi ngi gi kiita
da mizli ngir prokoy na, a diga.
13Zuɓaka slagwayay ɓa ki ngumaka taŋ,
kaɓa mangumam daw minih le ti sifi.
Soko, njirslaka taŋ kaɓa maɗucom yi ngi gudubun
manaha li ɗuc naŋ cer cer hã a pi a ruwuy,
manaha magayakaya cer cer.
moˀore taŋ a fini gidaŋ le.
14Akẽh na, zigiduw haɗi, ara ndilawa ng'ar sozo ngi li gi kiita,
asi hin ngi Bumbulvuŋ ara ndilo gweˀ,
hin naŋ masa ga slra naŋ a diga.
15Pas ati kiya a sa goko luvuŋ,
wurzlaŋhay a mucaka pusluɗ taŋ.
16Bumbulvuŋ a buco ti muwã Siyoŋ,
a tilo mi ti Zeruzaleme.
Dar muŋ ati hirwuyo, a jijikam ngbir ngbir.
Amma Bumbulvuŋ a wi vu ti mizli naŋhaya,
naŋ i li ɗum ngi Israyeley.
17Akẽh na, kisa sinikiy, yi Bumbulvuŋ, Buymisemuŋ kum,
ya misi a Siyoŋ, muwã mipal nga ya.
Zeruzalem a sa tiri i li mipal da ya,
mulakay anta sa cam a diga mata ndiɗaˀ.»
Hin ngi mumul ngi mizli Israyeley
18«Hin ara ndilawa,
tapasa, ko a muwãhay kwana, gudubun a sa yi haɗi,
ginewey misi a muwãhaya,
ɗuwa asi taŋ jõh jõh,
Zlazlar ngi ruwuy Zudahay gar a sa ɓulom yam.
Mizaw a sa ɓul yam vil vil ar hay ngi Bumbulvuŋ,
yam naŋ a sa ɓul ng'ar Sozo ngi ngalalay.
19Ezipte a sa tiri diŋ,
hirwuy Edom a sa tiri wuzlaɓuh kirɗak kirɗak,
asi taŋ migaka moˀore da hirwuy Zuda,
mizli ngi raˀahaya a gam gwat ta si na, a kiɗaka taŋ vagay vagay.
20Mizli a sa paka hirwuy Zuda ngi caˀa,
Zeruzaleme, a sa paka ngi sete.
21Haˀaw, i ɓa njah, mizli a gam gwat ta.
Ya Bumbulvuŋ, yi sa ndir a Siyoŋ.
Currently Selected:
ZOWEL 4: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.