ZOWEL 2
2
Hin ngi Bumbulvuŋ ara ndilo gweˀ
1Fam tulum a Siyoŋ,
wudam deŋ a muwã ɗu mipal!
Anja mizli ngi si ruwuyoy gar, a jijikam kirkir:
asi hin ngi Bumbulvuŋ ara ndilo gweˀe.
2I hin ngi luvuŋ, luvuŋ titira mihezek hezek,
hin ngi gazlavay, gazlavay titira lozoŋ lozoŋ.
Keɗ na, mizli sirgiɗim, mizli migidaŋhay,
sirit hirnga muwãkaɓa li mawun maga hirnga muwã njahha zlar,
ko a puram gwat kanah ɗaˀ ta,
yo tumbuŋ kwana anta sa puram kanah mata ndiɗaˀ wãˀ,
hã avu dideˀ ngi misin ti wakahay.
3Vu ara zuma li a mbuŋ taŋ,
yo ti dirba taŋ i irneˀ vu mazlizlira li,
hirwuyo naŋ a mbuŋ taŋ kaɓa guva a Eden zleˀe,
amma ti dirba taŋ, li a ndir kirɗak kirɗak cay.
Ko gwat loŋ malih ava anta.
4A bam vu ati pilisey,
a kilam kaɓa mipi mi ti pilisey.
5A hurumom kaɓa mota ngi vurumoy
majiɗam a hirnga muwã,
kaɓa hurum ngi vu mandisl
ar li wura giziŋ muˀuloŋ,
kaɓa mizli migidaŋhay
micinjaham le ngi gi vurum.
6Mizli a jijikam ngbaˀ ngbaˀ a mbuŋ taŋ,
mihiri taŋhay a mbiɗam ndiryik ndiryik.
7A kilam kaɓa sojehey,
a tuwuɗaka moholoyo, kaɓa migi vurumoy.
mbur gar muɗuva dibiɗe le taˀ na, aru si,
t'anta ngizlam mbak jiviɗe neˀ le ta.
8Ko mbur mahizigiɗa cala anta,
asi mbur gar a sipi jiviɗ naŋ cirre.
Ko gwat fuk a mbuŋ taŋ kwana, a cohom kwaŋ kwaŋ,
anta zliɗa taŋ hirnga ta wãˀ.
9A cam a ngiraka walahaya,
a kilam ar moholoyo,
a cam ngi hayaya,
a jiɗam tir fenetirey kaɓa muhuloy.
10Hirwuy a jijik ngbir ngbir a mbuŋ taŋ,
muŋ a wus zingit zingit ka ngi ndilawa, pas ati kiya a cam ar luvuŋ,
yo wurzlaŋhay a mucaka hiri mbiˀ mbiˀ.
11Bumbulvuŋ, naŋ ara ɓi ˀay kaˀ a muŋ,
a mbuŋ soje naŋhaya.
Soje naŋhaya taŋ haɗa teˀe:
yo migi gwat, naŋ maɓa ɓi naŋ na, naŋ gidaŋ.
Hin ngi Bumbulvuŋ i hin madiɗaŋ,
a gi zluwun haɗi wãˀa: mbur maɓusa gu ada kwa?
Pas ngi mo ng'avu Bumbulvuŋ a ndila le
12Bumbulvuŋ a ɓi: «Moko ng'avi ya zle wurenna,
ti mevel kum wãˀ,
gam dalyam, tuwam, tuwam kaɗam kaɗam.
13Ki ngiram di i zana kumoy ta jak,
mbiɗaka mevel kumoyo,»
yo moko ng'avu Bumbulvuŋ, Buymisemuŋ kum,
naŋ ti mevel mezleŋ, yo a pur ircece haɗi,
a ji mevel kutum ta, a gi mezle haɗa.
malambaˀ naŋ muwuɗ gi naŋ le da mburo na, a wulka a muŋ.
14Da a sa mbiɗa wuluko kwani, misina i waka?
Yo a dirba nah, a sa ɗuwulukum mi,
naɓa, kisa soko ti hapa ngi vul waɗ mbaazla ngi pusl da Bumbulvuŋ, Buymisemuŋ kumo.
Pas ngi gi dalyam waɗ ngi tumbulo Buymisemuŋ
15Fam tulum a Siyoŋ,
tiram pal ti gi dalyam,
tilam mi ngi gi cikil mipal.
16Kusoko mizli,
zilam vu ngi gi kus mipal.
kusoko midigilahaya, cikilaka ziri gawlahay
ati ziri ngi mi ɗuwahaya.
Gawla muzuɓ ngwas wureˀ aruŋ na, anja a pula viŋ naŋ,
ngwas muzuɓ zil wureˀ aruŋ kwana, a pula li hin naŋ.
17Masayay ati mizli ngi slra ngi Bumbulvuŋhoyo,
ara tuwam ar hay ngi Bumbulvuŋ,
ar wala ngi jawleeru ati li gi mikuli.
Anja a tumbuloko Bumbulvuŋ, a ɓam: «Bumbulvuŋ, pura ircece da mizli ɗikeye,
anja ki pula mizli ɗikeye mesem mesem ta,
ɓa sukwi mekelemey a singiram ar taŋ ta,
ɓa a ɓam: «Bumbulvuŋ taŋ naŋ amaka?» ta.
Bumbulvuŋ mizila mi da mizli naŋhay
18Bumbulvuŋ a wuɗ hirwuy naŋ haɗi wãˀ,
ara pura ircece da mizli naŋhaya.
19Bumbulvuŋ a zila mi da mizli naŋhay ani:
«Ani, i ra slinukum
daw alkamari, mbaazla dedeɗeke waɗ mal muɗuco wureˀ aruŋ.
Ki sa mbam taŋ pecek.
Y'anta sa pulukum ɓa sukwi mekelemey a pukum mesem ta ndiɗaˀ wãˀ.
20Mesene kum maso tir vay muŋ na, i sa ɓula kileŋ avu kumo,
i sa ɓulaŋ ng'ar li papala mikiɗak kirɗak,
soje misek ngi mbuŋhoyo, i sa pa taŋ haŋ ng'ar mubuliy mumucaŋ,
yo soje misek ngi dirbahaya, i sa pa taŋ haŋ ng'ar mubuliy Mediterane,
vagay naŋ a sa zĩˀĩ tititi,
zĩˀĩ naŋ a sa tisla li tisl:
haˀaw, ya Buymisemuŋ i gi gwat madiɗahay le.»
21Hirwuy, ki zluwun ta! Zluzluɓ, mumul:
asi ya Bumbulvuŋ i gi gwat madiɗahay le.
22Kum gwat misãmi ngi ɓuhoy, ki zluwunam ta,
li zum kum ngi ɓuh ara pus giziŋ silip silip,
widisey ara yam,
uruf ati gudubuno, a roko locok locok.
23Kum mizli Siyoŋhoy, zluzluɓam, mumulom
asi Bumbulvuŋ Buymisemuŋ kum.
A gukum vuŋ ngi mohoro, ɓa a luhukum,
a gukum vuŋ mezle ti mohor waɗ ti sifi,
ka misi zle muŋ.
24Mǝlaŋhaya, li gar i daw,
magayak madiɗahaya, cikisleˀ cikisleˀ ti mbaazla dedeɗeke maɗ ti mal muɗuco wureˀ aruŋ.
25Buy misemuŋ a ɓi: «Mumuyuŋ, yuk, tuˀuf waɗ jaray,
soje ɗuwoy mihaɗa tayna, ya mislina taŋ ng'ar kum,
vihey misi taŋ muzumaka gwat ngi migam kumoy na,
i wurkukum taŋ a muŋ.
26Ki sa zumam hã pecek,
kisa hunumikiy ya Bumbulvuŋ, Buymisemuŋ kumo,
ya migi cekenehey vur kumo,
mizli ɗuwoy anta pam mesem mata ndiɗaˀ wãˀ.
27Ki sa sinaka na, ya, y'ada a wuzla Israyel, mizli ɗuwoyo,
yo yi Bumbulvuŋ, Buymisemuŋ kum, mekelem anta.
mizli ɗuwoy anta pam mesem mata ndiɗaˀ wãˀ.»
Currently Selected:
ZOWEL 2: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.