EZEKIYEL Ɓi madiɗa madiɗa ngi raˀa
Ɓi madiɗa madiɗa ngi raˀa
Ezekiyel i mbur migi sedege ar hay ngi Bumbulvuŋ. Israyel mijahay nga Babiloŋ ar vi 587, a dirba buy madiɗa Nabukodonozor muzuma walahay Zeruzalem sar mudumbuŋ naŋ na, Ezekiyel vuna, n’ada a wuzla taŋ ya. Vi mufaɗ a dirba nah na, Buymisemuŋ a zila, ɓa a tiri di mijiviɗ naŋ. Ezekiyel misi angi hirwuy mijakaŋ ng’ara tuwa na, a ɓa ɓi ngi ki mumuyuŋ zay sla a slimiɗ da Yude mijahay le nga Babiloŋ, waɗ da Israyeley mindiram a Zeruzaleme ma. Ar vi 587, naɓa Y. K muso t’aruŋ na, Zeruzalem a mi a ruwuy, yo a wahaka hay ngi Bumbulvuŋ le, a dirba nah na, Ezekiyel a ɓa taŋ mi ngi tisla mevel ati ngi njaha hiri bac ng’ara ma. Ɗerewol Ezekiyel a wuɗuk taˀ taˀ mufaɗa: - Mingiɓi micah mududuŋ, i ɓi ngi mbiɗa hirnga ati ngi guco mi da Israyeley, naɓa a ndahaka Zeruzaleme ndah sar mucuw naŋ t’aruŋ (sap 1-24). - Mucuw naŋ, i ɓi ngi Buymisemuŋ masa ga kiita da mizli mulakay migaka gilaw da Israyeley, waɗ taŋ muguzuvuraka taŋ (sap 25-32). - Mimakir naŋ, i ɓi miɓa a dirba Zeruzalem mimi a ruwuy ar vi 587, naɓa Y. K a so t’aruŋ, ɓi madiɗa ara ma na, i ɓi ngi tisla mevel da mizli Israyeley (sap 33-39). - Mumufaɗ naŋ, i ɓi ngi hay ngi Bumbulvuŋ misi ti mbuŋ, mijiviɗ mupura ti kleŋ (sap 40-48). Ezekiyele, a sin gwatay le haɗa ti kleŋ, joˀ a buna ɓi ngi ɓi naŋ matil di na ndrehhe ti gi gwat zliv mabigi gwata. Naŋ misi i mbur migi sedege tuwa na, a cika hirnga haɗa da hay ngi Bumbulvuŋ, amma a si na le ma, gidaŋ ngi Buymisemuŋ n’anta sey cummo ar hay naŋ ngi Zeruzalem ta, ko a Babiloŋ kwana, a gi slra gu (11.16). Ar sirik ngi Israyeley mimbize’ a hirnga na, a ɓam, slra gar na, buyɓi naŋ i taŋ jom gar taŋ, naŋ kine, Zeremi maɓi, ko wa gar i buyɓi ngi slra nga naŋ miga le (sap 18) tuwa na, a puska mizli le. Dar Zeremi a hurdum haɗa, anja mbur na, a ɗiya ɓi ngi joˀ naŋ hiri nah a muŋ, amma a tilmi, a ɓi ma na, mizli ngi Buymisemuŋhoyo, taŋ misa ɗiyam le ti sukwi ngi slikiɗ ti wuzla mumucahay (sap 37) na, a sa mam ng’asi ruwuy taŋ a muŋ (11.14-20; 36.1-38).
Currently Selected:
EZEKIYEL Ɓi madiɗa madiɗa ngi raˀa: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.