SLRA 2
2
ˀUf Mipal misawa
1Hin ngi muguzlum Paŋtekot mindilo na, naɓa mitiɓihey gar a kusom le arleˀe. 2Gurjik si na, hurum ngi gwat a so paɗ a muŋ kaɓa hurum ngi burkataŋ gambara, a naha hay taŋ misi anga tuwa gar. 3Yo a puram gwat kaɓa irne ngi vu, a wuɗuk njilim njilim, a hirnga taŋ purla purla gar. 4ˀUf Mipal a naha taŋ le gar, a zlaka a ɓam ti mi mekelemey, kaɓa ˀUf Mipal vuna muvula taŋ di ɓa a ɓam di. 5Dambalaka Yude misipi jiviɗeye, t'ada a Zerusaleme. A soko ti wuzla sukwi ngisi gazlavay kuɗgulum gar. 6Taŋ micinam hurum ngi gwat tuwa na, zigiduw a kuso timbiɗim, a ga taŋ welele teˀe. Asi ko wa gar na, ara cine mitiɓihey maɓam na, ti mi miyakaŋ cak ti naŋ cak ti naŋ. 7A zuma taŋ hirnga le, a cicam ngirkik ngirkik, a ɓam: «Mizli maɓam tayna gar na, i Galilehey ta kwa? 8Na, a gi mbri mbri ɓa mbur gar a wuzla ndra a cin taŋ maɓam na, ti mi miyakaŋ cak ti naŋ cak ti naŋ naka? 9Mizli mekelemey a wuzla ndra aka, a soko baɗ a Parte, Medi, Elami, Mezopotami, Yude, Kapadosi. Yo mekelemeye baɗ a Poŋ, a Azi, 10Firigi, Pamfili, Ezipte, yo tir vay ngi Libi ngi ciki Sirene. Mekelemey kwana, a soko ti Roma. 11Yude miyaka taŋ cak ti yihey ati mica ti cihey ada haɗa, yo Kretey ati Arapay. Amma slra madiɗa Buymisemuŋ miga na, ndra gar i ra cinam taŋ matilam di mi na, ti mi miyam ndra cak ti naŋ cak ti naŋ!» 12Taŋ gar, a zuma taŋ hirnga le, a ga taŋ welele teˀe. Joˀ a ɓam ar wala taŋ: «Hana mbiɗeˀ avra mbrike?» 13Amma mizli mekelemey a singiram ar mislineye, a ɓam: «A wam le wãˀa!»
Piyer mitil mi ti Ɓimezle da zigiduw
14Dar Piyer a slikiɗ deŋ ati mislin mukuruˀ ngaŋ kaˀhaya. Joˀ a zla a ɓa zigiduw ti ˀay paɗ a muŋ: «Kum Yudehey ati kum Zerusalemey gar, gwatay migam na, cinam kuy kuy, yo jikam slimiɗ asi mingiɓi ɗu na. 15Kay, ki waka kaɓa mizli hanayna a wam le na, a wam ti wi ta. Asi ndra angi pas ngi vula yam a pilis aruŋ. 16Amma hana, i mingiɓi ngi mijiviɗ Zowel migi muduba, a ɓi na:
17«Buymisemuŋ a ɓi:
‹Gwat masa gi angi hin ngi dirbahay ani:
I sa slino ˀUf ɗu a hirnga mizli gar:
Ziri kum mizilehey ati mongosohoy,
a sa tiram mijiviɗ ɗuwoy,
ziri gawla ati diili kumoy,
a sa puram gwat ti kleŋ,
mizli midigila kumoy a sa musuwunam.
18Haˀaw, angi hin tayna,
yi sa slino ˀUf ɗu
a hirnga gawla migi slra ɗuwoy,
mizilehey ati mongosohoyo,
a sa tiram mijiviɗey.
19I sa gi gwat migam ɗaˀtahay
ar birngiŋ a muŋ,
waɗ cekenehey a ruwuy aka:
yi sa gi pumbus, vu
waɗ talangay ngi cunju.
20Pas a sa mbiɗi, a go luvuŋ,
kiya a sa mbiɗi ndez ka pumbusu.
Hana gar na, a sa gi dumbuŋ angi hin ngi Bumbulvuŋ,
hin madiɗa misi ti dudok masa sawa.
21Yo ko wa gar, mazila slimiɗ ngi Buymisemuŋ na, a sa lih.›
22«Kum Israyeley, cinaka mingiɓi ɗu ani: Yesu ngi Nazarete, i mbur Buymisemuŋ mibiga gidaŋ naŋ le ti naŋ. Buymisemuŋ miga cekenehey, gwat migam ɗa tahay ati gwat ngi zuma hirngahay wuzla kum na, mbele naŋ. Kum ti hirnga kumo, ki sinaka le.
23Mbur nah, kum muvulakaŋ asi haŋ ngi mizli migi mungrahay, ɓa a jakaŋ, a zizakaŋ law ar dum mizlira na, naɓa Buymisemuŋ a si na le, a sa gi kahana kahana zleˀe si. 24Amma Buymisemuŋ a slikiɗa le a muŋ ti wuzla mumucahaya, a cukoŋ le tir bonoy ngi muco, ɓa muc a lum gidaŋ ar naŋ, a ja na, a gi ta. 25Asi mike na, Davit a ɓi vurˀe: ‹I ra pura Bumbulvuŋ ndrehhe a mbuŋ ɗu. Asi naŋ da tir vay hazum ɗu, ɓa yi jijik ta. 26Ma na, i ra mumul a mevel ɗu, irne ɗu ara ɓi ɓi ngi zluzluɓ. Mukuy vuna ma na, dumvu ɗu a sa musuk vu ti njaha hiri. 27Asi k'anta kisa pula siifa ɗu mbak ar li ngi mizli mumucahaya ta, yo k'anta kisa pula vagay ngi mbur ɗik mipala, ɓa a zĩˀĩ ta. 28Jiviɗ ngi ru ng'ar li ngi siifa na, ki bigiy di le. Ka misi a ciki ɗu na, kisa vuliy mumul haɗi teˀe.› 29«Sukum ɗuwoy, jiviɗ ada ɓa yi ɓukum njah a hirnga dideˀ ndra Davite. A muc le, a dikaka le. Zivi naŋ, naŋ da a wuzla ndra hã dana aruŋ. 30Naŋ i mijiviɗ zleˀe. A si na le, Buymisemuŋ a ɓaŋ le ti hudum: a sa cifi ar li naŋ ngi zuma buyo, i zuŋ ngi kwacay naŋ. 31Davite, slikiɗ ngi Kristu ti wuzla mumucahaya, a pura le daf dumbuŋ, naŋ miɓi: ‹A pulakaŋ ar li ngi mizli mumucahaya ta, yo vagay naŋ anta sa zĩˀĩ ta na vurˀeŋ.› 32«Yesu nah na, Buymisemuŋ a slikiɗa le a muŋ na, ndra gar i migi sedewo naŋhay. 33Buymisemuŋ a ga Yesu le ɗongor tir vay hazum naŋ. ˀUf naŋ Mipal, naŋ miɓa ɓi naŋ ɗaˀ le tuwa, a lumo di le tivi Cine, naŋ kwana a slino di le nga hirnga ndra. Kum mapuraka ati kum macinaka wurenna na, i nah. 34Davite, a jiɗ ɗaˀ ti dumvu naŋ nga muŋ ta ngbaŋ, amma a ɓi na: ‹Bumbulvuŋ Buymisemuŋ a ɓa Buy ɗu na: ka, cifi joˀ tir vay hazum ɗu, 35hã i hina mesene ɗikey, a tiram gwat ngi ɗuva sar ɗiki.› 36«Anja mizli Israyeley gar a sinaka kaslsla wãˀ gisiŋ: Yesu nah, kum midiraka avu dum na, Buymisemuŋ a cifaŋ le i Buy, yo i Mesi ma gar!» 37Taŋ micinaka mingiɓi hana na, a muɗa taŋ membezleŋ le haɗi. Dar a cufuɗaka Piyer ati mislin mekelemeye: «Sukum ndrahay, ani i gam mbri ska?» 38Piyer a mbiɗa taŋ di: «Mbiɗaka mevel kumoyo, anja mbur gar a ci ar yam ti slimiɗ ngi Yesu Kristu, ɓa mungra kumoy a puyam avra, yo ɓa kisa lumam gwat ngatara ngi Buymisemuŋ, i ˀUf naŋ Mipal. 39Asi gwat Buymisemuŋ miɓia ɗaˀ le, a sa vula na, da kum, da ziri kumoy ati mizli mikileŋ kileŋhey gar, Bumbulvuŋ, Buymisemuŋ ndra masa zilo taŋ haɗi na.» 40Piyere, a ɓa taŋ ɓi mekelemey wal wal haɗi ma, ɓa a tiɓaka ɓi naŋ, yo a vula taŋ gidaŋ, a ɓa taŋ: «Lohoko hirnga kum ti wuzla sukwi ngi migi mungra tayna!» 41Mizli mitiɓaka mingiɓi naŋ gar na, a cam ar yam. Angi hin nana, gwat ngi mizli durmuk makir mujumoko ng'avi taŋ.
Cifi ngi mitiɓihey
42A ndiram deŋ ti deŋ ngi cine ɓi ngi misliney madubunaka taŋ di, waɗ ngi jumoˀay taŋ purla kaɓa sukumuŋhoy, ngi wunka gwat ngi zum jom ar leˀe, yo ngi diradibiɗe ma gar. 43Misliney ara gam gwat migam ɗaˀ tahay ati gwat ngi zuma hirngahay haɗi, hã mizli gar a zluwunam. 44Mizli mitiram mitiɓihey gar na, taŋ jom ar leˀe, yo a jumoko gwat taŋhay gar ar li purla. 45A hiɗikaka gwat taŋhay ati zlili taŋhay avra, ɓa a wunkaka dala nah ar wala taŋ gar, weˀe avu gir ngi mburo.#2.45 weˀe avu gir ngi mbur, malla weˀe avu may ngi mbur. 46Vur hin gar na, a ndiram deŋ ti deŋ ar hay ngi Bumbulvuŋ a Zerusaleme, taŋ ti mevel purla. A hay taŋhaya, a zumaka ɗafa jom ar leˀe, a zumaka ti mumul, yo ti mevel mezle. 47A hunumaka Buymisemuŋ, yo mizli keɗeɗe gar ara hĩyãka taŋ. Vur hin gar na, Bumbulvuŋ ara ko mizli milahahay nga wuzla taŋ.
Currently Selected:
SLRA 2: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.